Xana Swa Koteka Ku Tiva Vito Ra Xikwembu?
Hakunene i lunghelo ku vitana munhu la xiximekaka hi vito swin’we ni ku n’wi xeweta. Hakanyingi vanhu lava tlakukeke va vitaniwa hi swithopo swo tanihi leswi nge “Presidente,” “Hosi” kumbe “Muchaviseki.” Kutani a swi kanakanisi leswaku u ta swi teka ku ri lunghelo loko munhu wo karhi la tlakukeke a ku eka wena, “Ndzi kombela u ndzi vitana hi vito.”
XIKWEMBU xa ntiyiso xi hi byela leswi eRitweni ra xona, ku nga Bibele: “Hi mina Yehovha. Rero i vito ra mina.” (Esaya 42:8) Hambileswi xi nga ni swithopo swo tala, swo tanihi leswi nge “Muvumbi,” “Lowa Matimba Hinkwawo,” tlhelo “Hosi Leyi Lawulaka,” xi nyike malandza ya xona lama tshembekaka lunghelo ro va ma xi vitana hi vito.
Hi xikombiso, muprofeta Muxe u tshame a kombela Xikwembu a ku: “Ndzi khomele Yehovha.” (Eksoda 4:10) Loko ku nyiketeriwa tempele ya le Yerusalema, Hosi Solomoni u sungule xikhongelo xakwe hi marito lama nge: “Oho Yehovha.” (1 Tihosi 8:22, 23) Loko muprofeta Esaya a vulavula ni Xikwembu a yimela Vaisrayele, u te: “Wena Yehovha, u Tata wa hina.” (Esaya 63:16) Swi le rivaleni leswaku Tata wa hina wa le tilweni u lava leswaku hi n’wi vitana hi vito.
Hambileswi ku vitana Xikwembu hi vito swi nga swa nkoka, ku xi tiva swi katsa swo tala. Yehovha u tshembisa munhu la n’wi rhandzaka ni la n’wi tshembaka a ku: “Ndzi ta [ku] sirhelela hikuva u tiva vito ra mina.” (Pisalema 91:14) Swi le rivaleni leswaku ku ni swo tala leswi katsekaka ku tlula ku tiva vito ra Xikwembu, hikuva ku tiva vito ra xona hi swona leswi nga ta endla leswaku xi hi sirhelela. Kutani i yini leswi u faneleke u swi endla leswaku u tiva vito ra Xikwembu?