Xana Yesu A A Ta Hlamula Njhani?
Vanhu vo tala lava chavaka Xikwembu va vona onge vukhongeri byi fanele byi katseka eka tipolitiki. Va ehleketa leswaku vukhongeri byi nga pfuna ku lulamisa swiphiqo swa vanhu. Hambiswiritano, vapfumeri van’wana va ntiyiso va ehleketa leswaku vukhongeri ni tipolitiki swi fanele swi nga vi nchumu wun’we. Xana wena u ehleketa leswaku vukhongeri byi nga va ni xiphemu xihi eka tipolitiki? Xana vukhongeri ni tipolitiki swi fanele swi tirhisana?
YESU KRESTE u hlamuseriwe tanihi “loyi a veke ni nkucetelo swinene eka matimu ya vukhongeri bya vanhu.” Kutani ehleketa loko a ho n’wi vutisa xivutiso xa leswaku, Xana vukhongeri byi fanele byi katseka eka tipolitiki? Xana a a ta hlamula njhani? Loko a ri laha misaveni, u hlamule xivutiso xexo hi marito ni swiendlo. Hi xikombiso, eka Dyondzo yakwe leyi dumeke ya le Ntshaveni, Yesu u nyikele swiletelo leswi a swi ta pfuna valandzeri vakwe ku twisisa leswaku va fanele va tihlanganisa njhani ni vanhu. A hi kambisiseni tinhla tin’wana ta dyondzo yoleyo leyi dumeke.
Pfuna Vanhu Van’wana
Yesu u hlamusele langutelo leri valandzeri vakwe a va fanele va va na rona hi misava. U te: “N’wina mi munyu wa misava; kambe loko munyu wu heleriwa hi ntamu wa wona, ku dzunga ka wona ku nga pfuxetisiwa ku yini? A wu nge he tirhi nchumu kambe wu ta cukumetiwa ehandle wu kandziyeriwa hi vanhu. N’wina mi ku vonakala ka misava. . . . Ku voninga ka n’wina a ku vonakale emahlweni ka vanhu, leswaku va ta vona mintirho ya n’wina leyinene kutani va vangamisa Tata wa n’wina la nge matilweni.” (Matewu 5:13-16) Ha yini Yesu a fanise valandzeri vakwe ni munyu ni ku vonakala?
Marito ya Yesu ma kombisa leswaku valandzeri vakwe va fana ni munyu, ku nga ri eka ntlawa lowutsongo ntsena, kambe eka vanhu hinkwavo. Va fana ni ku vonakala, ku nga ri eka vanhu vo karhi ntsena, kambe eka vanhu hinkwavo lava lavaka ku vona kahle. Hi ku tirhisa swifaniso sweswo, Yesu u swi veke erivaleni leswaku a a nga lavi valandzeri vakwe va tihambanisa ni vanhu. Ha yini?
Xiya leswi landzelaka: Munyu a wu nge swi koti ku sirhelela swakudya loko wu nga cheriwanga eka swona. Rivoni a ri nge voningi ekamareni loko ri vekiwe ekule na rona. Hikokwalaho, a swi hlamarisi leswi Yesu a nga va lerisangiki vadyondzisiwa vakwe leswaku va rhurha va ya endhawini leyi nga ekule laha misaveni leswaku va sungula ndhawu leyi vaaki va yona ku nga vapfumeri ntsena. Nakambe a nga va byelanga valandzeri vakwe leswaku va hanya bya guwela. Ematshan’weni ya sweswo, tanihi leswi munyu wu faneleke wu cheriwa eswakudyeni kasi rivoni ri faneleke ri voninga, Vakreste va fanele va vuyerisa vutomi bya vanhu van’wana.
“A Hi Xiphemu Xa Misava”
Hambiswiritano, nkongomiso wa Yesu wa leswaku valandzeri vakwe va fanele va tirhisana ni vanhu-kulorhi wu tlakusa xivutiso xa nkoka malunghana ni langutelo ra Vakreste hi tipolitiki. Ha yini? Emahlweninyana ka rifu rakwe, Yesu u khongelele valandzeri vakwe eka Xikwembu a ku: “Ndza ku kombela leswaku u nga va susi emisaveni, kambe u va rindza hikwalaho ka lowo homboloka. Vona a hi xiphemu xa misava, tanihi leswi mina ndzi nga riki xiphemu xa misava.” (Yohane 17:15, 16) Kutani, xana Vakreste va swi kotisa ku yini ku ka va nga vi xiphemu xa misava kambe hi nkarhi lowu fanaka va hanya ni vanhu lava nga emisaveni? Leswaku u kuma nhlamulo, a hi kambisiseni swivutiso swin’wana swinharhu:
• Xana Yesu a a ti languta njhani tipolitiki?
• Xana Vakreste namuntlha va fanele va nghenelela etimhakeni ta tipolitiki?
• Xana tidyondzo ta Vukreste ti va khumba njhani vanhu?
[Marito lama tshahiweke exihlokweni lama nga eka tluka 4]
Yesu u swi veke erivaleni leswaku a a nga lavi valandzeri vakwe va tihambanisa ni vanhu van’wana