Xana Tidyondzo Ta Vakreste Ti Va Khumba Njhani Vanhu Lava Tshamaka Na Vona?
XIHLOKO lexi hundzeke xi kombise swivangelo leswi endlaka leswaku Vakreste va ntiyiso va nga ngheneleli eka tipolitiki. Kambe, xana Vakreste va nga swi kombisa njhani leswaku va swi tsakela ku antswisa vutomi bya vanhu lava tshamaka na vona? Ndlela yin’wana i ku landzela xileriso xa Yesu lexi nge: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona.”—Matewu 28:19, 20.
Ku ni ku yelana exikarhi ka ku yingisa xileriso xa Yesu xa ku ‘endla vadyondzisiwa’ ni ku yingisa xiletelo xa ku va va fana ni munyu ni ku vonakala emisaveni. (Matewu 5:13, 14) Hi kwihi ku yelana ka kona? Naswona ntirho lowu wu nga va khumba njhani vanhu?
Rungula Ra Kreste Ra Hlayisa Ri Tlhela Ri Voninga
Munyu wu sivela ku bola. Hilaha ku fanaka, rungula leri Yesu a leriseke valandzeri vakwe leswaku va ri yisa eka vanhu va matiko hinkwawo ri ni nkucetelo lowu hlayisaka. Lava amukelaka ni ku hlayisa leswi Yesu a swi dyondziseke va tisirhelela eka ku hohloka ka mahanyelo loku vonakaka namuntlha. Hi ndlela yihi? Va dyondza ndlela yo papalata swiendlo leswi nga vekaka rihanyo ra vona ekhombyeni swo tanihi ku dzaha, naswona va va ni timfanelo to tanihi rirhandzu, ku rhula, ku va ni mbilu yo leha, musa ni vunene. (Vagalatiya 5:22, 23) Timfanelo leti ti endla leswaku va hoxa xandla eku pfuneni ka vanhu lava tshamaka na vona. Vakreste lava byelaka vaakelani va vona hi rungula leri leri hlayisaka va hoxa xandla swinene eka vanhu lava tshamaka na vona.
Ku vuriwa yini hi xifaniso xa ku voninga? Tanihi leswi n’weti wu voningaka hikwalaho ka dyambu, valandzeri va Kreste va voninga ku “vonakala” loku humaka eka Yehovha Xikwembu. Va voninga ku vonakala loku humaka eka Yehovha hi ku hoxa xandla entirhweni wo chumayela ni hi ku endla mintirho leyinene.—1 Petro 2:12.
Yesu u ye emahlweni a kandziyisa ku yelana loku nga kona exikarhi ka ku va rivoni ni ku va mudyondzisiwa hi ku vula a ku: “Vanhu va lumeka rivoni va ri veka ehenhla ka xo tlhandleka rivoni, ku nga ri ehansi ka xirhundzu xo pima, kutani ri voningela hinkwavo lava nga endlwini. Hi ku fanana ku voninga ka n’wina a ku vonakale emahlweni ka vanhu.” Rivoni leri voningaka leri vekiweke ehenhla ka xo tlhandleka rivoni ri kota ku voniwa kahle hi munhu un’wana ni un’wana loyi a nga ekusuhi na rona. Hilaha ku fanaka, ntirho wo chumayela ni mintirho yin’wana leyinene leyi Vakreste va ntiyiso va yi endlaka yi fanele yi voniwa kahle hi vanhu hinkwavo lava tshamaka ekusuhi na vona. Ha yini? Yesu u vule leswaku lava va vonaka mintirho yoleyo leyinene va ta vangamisa Xikwembu ku nga ri Vakreste volavo.—Matewu 5:14-16.
Vutihlamuleri Lebyi Va Nga Na Byona
Loko Yesu a ku “N’wina mi ku vonakala ka misava” ni loko a ku “ku voninga ka n’wina a ku vonakale” a a vulavula ni vadyondzisiwa vakwe hinkwavo. Xileriso xa Yesu xi nge hetisisiwi hi vanhu vatsongo ntsena lava hangalakeke ni vukhongeri byo hambana-hambana. Ematshan’weni ya sweswo, vanhu hinkwavo lava nga vapfumeri i ku “vonakala.” Timbhoni ta Yehovha leti endlaka nkombo wa timiliyoni, leti tshamaka ematikweni yo tlula 235 ti tshemba leswaku i vutihlamuleri bya tona ku endzela vaakelani va tona leswaku ti va byela hi rungula leri Kreste a lavaka leswaku valandzeri va yena va ri twarisa.
Xana rungula ra Timbhoni ta Yehovha ri vulavula hi yini? Loko Yesu a humesa xileriso xa ku chumayela, a nga lerisanga valandzeri vakwe leswaku va chumayela hi minhlangano ya tipolitiki kumbe ya ntshamisano, minhlangano ya Kereke ni ya Mfumo kumbe tidyondzo tin’wana ta misava. Ematshan’weni ya sweswo, u vule ka ha ri emahlweni a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo.” (Matewu 24:14) Xisweswo, ku va va yingisa swileriso swa Yesu, Vakreste va ntiyiso namuntlha va ya emahlweni va vulavula ni vaakelani va vona hi Mfumo wa Xikwembu, ku nga hulumendhe yi ri yoxe leyi nga ta herisa fambiselo ra Sathana ro biha ni ku tisa misava leyintshwa yo lulama.
Entiyisweni, eka Tievhangeli hinkwato, ku ni swilo swimbirhi leswi nga erivaleni malunghana ni vutirheli bya Yesu leswi khumbaka mintirho ya Vakreste va ntiyiso namuntlha. Havumbirhi ka swona swi ta kambisisiwa eka xihloko lexi landzelaka.
[Marito lama tshahiweke exihlokweni lama nga eka tluka 8]
Xana rungula ra Vakreste ri fana njhani ni munyu?
[Marito lama tshahiweke exihlokweni lama nga eka tluka 9]
Xana rungula ra Kreste ri fana njhani ni rivoni leri lumekiweke endhawini ya munyama?