Muhakeri Wa Vanhu Hinkwavo Lava Xi Tirhelaka

“NDZA NKHENSA.” A nga kona loyi a nga swi laviki ku nkhensiwa kumbe hambi ku ri ku nyikiwa nyiko leyi humaka embilwini loko a endle ntirho lowunene. Hinkwerhu ha swi lava ku vona loko matshalatshala ya hina ya tlangeriwa, ngopfu-ngopfu hi vanhu lava hi va rhandzaka. I ntiyiso leswaku hi rhandza Xikwembu xa hina, ku nga Yehovha, ku tlula swilo hinkwaswo. Xana xa ma tlangela matshalatshala ya hina yo xi tirhela? A hi voneni ndlela leyi xi tirhisaneke ha yona na Ebedi-meleke, ku nga wanuna loyi a vekeke vutomi byakwe ekhombyeni leswaku a ponisa un’wana wa vaprofeta va xona.—Hlaya Yeremiya 38:7-13 na 39:16-18.

Ebedi-meleke a a ri mani? Entiyisweni a a ri mutirhela-mfumo wa le hubyeni ya Hosi Sedekiyasi wa tiko ra Yuda.a Ebedi-meleke u hanye enkarhini wa Yeremiya, loyi Xikwembu xi n’wi rhumeke leswaku a ya lemukisa vanhu lava nga tshembekiki va le Yuda hi ndzoviso lowu a wu ta va wela. Hambileswi a a rhendzeriwe hi tihosana leti nga pfumeriki eka Xikwembu, Ebedi-meleke a a ri munhu la chavaka Xikwembu naswona a a n’wi xixima swinene Yeremiya. Timfanelo leti tsakisaka Xikwembu ta Ebedi-meleke ti ringiwile loko tihosana to biha ti hehle Yeremiya hi leswaku u vanga mpfilumpfilu kutani ti n’wi hoxa exihlobyeni xa ndzhope leswaku a ta fa. (Yeremiya 38:4-6) Xana Ebedi-meleke a a ta endla yini?

Ebedi-meleke u kombise xivindzi ni ku tiyimisela, handle ko chava ku xupuriwa hi tihosana. U ye eka Sedekiyasi a ri karhi a voniwa hi mani na mani kutani a lwisana ni ndlela yo biha leyi Yeremiya a khomiweke ha yona. Kumbexana u byele hosi a ri karhi a kombetela vanhu volavo lava endlaka swo biha a ku: “Vanhu lava va endle swo biha . . . eka Yeremiya.” (Yeremiya 38:9) Ebedi-meleke u humelerile eka bulo rolero kutani Sedekiyasi u lerise leswaku vavanuna va 30 va famba na Ebedi-meleke va ya humesa Yeremiya exihlobyeni.

Ebedi-meleke u kombise mfanelo yin’wana leyi navelekaka: ku nga musa. U teke “switlakati leswi hlakaleke ni swiphemu swa malapi leswi hlakaleke kutani a swi rhelerisela eka Yeremiya . . . hi mapindza.” Ha yini a teke switlakati ni malapi? A a endlela leswaku Yeremiya a ta vekela emakeheleni yakwe leswaku a nga vaviseki loko va ri karhi va n’wi humesa exihlobyeni xa ndzhope xo enta.—Yeremiya 38:11-13.

Yehovha u swi vonile leswi Ebedi-meleke a swi endleke. Xana U swi tlangerile? Hi ku tirhisa Yeremiya, Xikwembu xi byele Ebedi-meleke leswaku ku lovisiwa ka Yuda ku tshinele. Kutani Xikwembu xi nyike Ebedi-meleke switiyisekiso swa ntlhanu swa leswaku xi ta n’wi ponisa. Yehovha u te: “Ndzi ta ku kutsula . . . A wu nge nyiketiwi evokweni ra vanhu . . . Ndzi ta ku ponisa . . . A wu nge dlayiwi hi banga . . . Kunene moya-xiviri wa wena wu ta kotisa leswi phangiweke.” Ha yini Yehovha a tshembise Ebedi-meleke leswaku u ta n’wi sirhelela? Yehovha u n’wi byele a ku: “Hikuva u ndzi tshembile.” (Yeremiya 39:16-18) Yehovha a a swi tiva leswaku Ebedi-meleke a nga endlanga leswi a swi endleke ntsena hileswi a khathala hi Yeremiya kambe ni hileswi a a tshemba Xikwembu.

Dyondzo yi le rivaleni: Yehovha wa swi tlangela leswi hi swi endlaka leswaku hi n’wi tirhela. Bibele yi hi tiyisekisa leswaku u tsundzuka hambi ku ri swilo switsongo leswi hi swi endlaka swa vugandzeri leswi susumetiwaka hi mbilu leyi nga ni ripfumelo. (Marka 12:41-44) Xana u susumeteleka ku tshinela ekusuhi ni Xikwembu lexi, lexi tlangelaka ntirho wa wena? Loko swi ri tano, u nga tiyiseka leswaku xi hi ndlela leyi Rito ra xona ri xi hlamuselaka ha yona loko ri ku: “[I] muhakeri wa lava va xi lavaka hi mbilu hinkwayo.”—Vaheveru 11:6.

Tindzimana ta Bibele leti u nga ti hlayaka hi May:

◼ Yeremiya 32-50

[Nhlamuselo ya le hansi]