Xana Bibele I Buku Leyi Fanaka Ni Tibuku Tin’wana?

“Matsalwa hinkwawo ma huhuteriwe hi Xikwembu naswona ma pfuna . . . leswaku munhu wa Xikwembu a faneleka hi ku helela, a hlomisiwa hi ku helela eka ntirho wun’wana ni wun’wana lowunene.”—2 TIMOTIYA 3:16, 17.

VANHU van’wana a va pfumelelani na wona marito lama nga laha henhla malunghana ni Bibele. Xana wena u ri yini hi mhaka leyi? Eka tinhla leti nga laha hansi, hi yihi leyi yi hlamuselaka kahle ndlela leyi u yi tekaka ha yona Bibele?

• I buku leyi nga ya nkoka hikwalaho ka marito ya yona lamanene ni marungula ya yona lama twalaka kahle ni ku twisiseka

• Hi yin’wana ya tibuku to hlayanyana to kwetsima leti nga ta nkoka

• I buku ya mintsheketo leyi nga ni milawu ya mahanyelo

• I Rito ra Xikwembu

Xivutiso xin’wana lexi fambisanaka ni mhaka leyi hi lexi nge, Xana swi na mhaka leswaku u pfumela yini? Xiya leswi Bibele yi swi vulaka: “Swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Varhoma 15:4) Xisweswo, Bibele yi vula leswaku xikongomelo xa yona i ku hi letela, ku hi chavelela ni ku hi nyika ntshembo.

Hambiswiritano, loko Bibele a yo va buku ntsena, kumbe a yo va yin’wana ya tibuku to kwetsima, xana a wu ta yi tshemba leswaku yi nga letela wena ni ndyangu wa wena, ngopfu-ngopfu loko ku ri hileswaku rungula ra yona ri hambane ni leswi u anakanyaka leswaku i swinene? Loko Bibele a yo va buku ya mintsheketo, xana a wu ta kuma nchavelelo ni ntshembo eka switshembiso swa yona?

Hi hala tlhelo, timiliyoni ta vanhu leti dyondzeke Bibele ta kholwa leswaku i Rito ra Xikwembu leri hlawulekeke. Ha yini? I yini leswi kombisaka leswaku Bibele yi hambanile ni tibuku letin’wana hinkwato? Ha ku rhamba leswaku u kambisisa tinhla ta ntlhanu leti endlaka leswaku Bibele yi hambana ni tibuku tin’wana eka swihloko leswi landzelaka.