Nhlangano Lowu A Wu Ri Ni Vun’we Ni Swilo Leswi Tsakisaka Leswi Kunguhatiweke

MINHLANGANO ya lembe ni lembe ya Watch Tower Bible and Tract Society of Pennsylvania minkarhi hinkwayo ya tsakisa. A swi ri tano ni hi nhlangano wa lembe ni lembe wa vu-127, lowu a wu khomiwe hi Mugqivela, hi October 1, 2011! Vaendzi lava rhambiweke lava humaka ematikweni yo hambana-hambana a va hlengeletane eHolweni ya Tinhlengeletano ya Timbhoni ta Yehovha le Dorobeni ra Jersey, eNew Jersey, le U.S.A.

Gerrit Lösch la nga xirho xa Huvo leyi Fumaka u sungule nongonoko hi ku amukela ntshungu wolowo lowu tsakeke. U byele vapfhumba volavo lava a va huma ematikweni ya kwalomu ka 85 leswaku va ni vun’we byo hlawuleka. Vun’we byolebyo byi nyikela vumbhoni lebyinene naswona byi dzunisa Yehovha. Entiyisweni, ku vulavuriwe ngopfu hi vun’we enhlanganweni lowu.

XIVIKO LEXINENE LEXI HUMAKA EMEXICO

Eka xiyenge xo sungula xa nongonoko lowu ku vulavuriwe hi swikombiso swa vun’we bya vanhu va Yehovha. Baltasar Perla u vulavurisane ni vatirhi-kulobye vanharhu va le ndyangwini wa le Bethele ya le Mexico malunghana ni ku hlanganisiwa ka tihofisi ta marhavi ta tsevu ta le Amerika Xikarhi ni rhavi ra le Mexico. Hikwalaho ka ku hlanganisiwa loku, endyangwini wa le Bethele ya le Mexico ku ni vanhu va mindhavuko yo hambana-hambana ni lava humaka ematikweni man’wana. Ku fika loku ka vapfumeri-kulorhi vo tala lava humaka ematikweni yo hambana-hambana ku endle leswaku ku va ni ku khutazana. Onge hiloko Xikwembu xi herise mindzilakana ya le matikweni wolawo.

Xiphiqo xin’we lexi vangiweke hi ku hlanganisiwa loku a ku ri xa ku pfuna vahuweleri leswaku va nga titwi onge a va ha ri xiphemu xa nhlengeletano ya Yehovha hambileswi tihofisi ta marhavi a ti nga ha tirhi ematikweni ya vona. Leswaku va va pfuna, vandlha rin’wana ni rin’wana ri ni e-mail leswaku hambi lava va nga le tindhawini ta le kule va kota ku vulavurisana hi ku kongoma ni vamakwerhu lava nga ni vutihlamuleri ehofisini ya rhavi.

MAHUNGU LAMA HUMAKA EJAPANI

James Linton la humaka erhavini ra le Japani u hlamusele ndlela leyi vamakwerhu va khumbiweke ha yona hi ku tsekatseka ka misava ni ti-tsunami leswi hlaseleke tiko rero hi March 2011. Timbhoni to tala ti fele hi vanhu lava ti va rhandzaka ti tlhela ti lahlekeriwa hi swilo swa tona. Timbhoni ta le tindhawini leti nga hlaseriwangiki ti nyikele hi tiyindlu to tlula 3 100 ni hi madzana ya timovha. Vatirhi vo tirhandzela va le ka Tikomiti to Aka ta Xifundzha va tirhe vusiku ni nhlikanhi leswaku va lunghisa tiyindlu ta vamakwerhu. Vanhu vo tlula 1 700 va tirhe hi ku tirhandzela laha a ku ri ni xilaveko. Nakambe a ku ri ni vatirhi vo tirhandzela va 575 lava pfuneteke eku lunghisiweni ka Tiholo ta Mfumo ku katsa ni ntlawa wa vatirhi vo tirhandzela lava humaka eUnited States.

Ku endliwe swo tala leswaku ku chaveleriwa vanhu lava hlaseriweke hi mhangu leyi ni ku tiyisa ripfumelo ra vona. Vakulu vo tlula 400 va endzele vanhu lava hlaseriweke. Huvo leyi Fumaka yi rhumele vafamberi vambirhi va marhavi lava humaka eyindlu-nkulu ya misava hinkwayo leswaku va ya khutaza vamakwerhu endhawini leyi hlaseriweke. Swikombiso swa leswaku Timbhoni emisaveni hinkwayo ta khathala ha vona swi va chavelele ngopfu.

KU HLULA ETIHUBYENI

Vayingiseri a va rhiye ndleve loko Stephen Hardy la humaka erhavini ra le Britain a bula hi ku hlula ka hina ka le tihubyeni ka sweswinyana. Hi xikombiso, hulumendhe ya le Furwa a yi lava leswaku vandla ra le nawini leri hi ri tirhisaka eFurwa ri hakela xibalo lexi endlaka R626 wa timiliyoni. Mhaka yoleyo yi tlhantlhiwe loko Huvo ya le Yuropa ya Timfanelo ta Vanhu (European Court of Human Rights [ECHR]) yi yime na hina, yi vula leswaku hulumendhe ya le Furwa yi tlule Ndzima 9 ya Nhlengeletano ya le Yuropa, leyi sirhelelaka timfanelo ta vanhu to va ni ntshunxeko wa vukhongeri. Marito ya xiboho xexo ma kombise leswaku Huvo yi pfumerile leswaku Timbhoni a ti nga ringeti ku papalata ku hakela xibalo, hikuva ma hlayeka hi ndlela leyi: “Ku ala ku amukela nhlangano wa vukhongeri, ku lava ku wu herisa, ku tirhisiwa ka marito yo poyila nhlangano wa vukhongeri, hinkwaswo leswi i xikombiso xa ku lwisana ni mfanelo leyi wu nyikiweke yona eka Ndzima 9 ya Nhlengeletano yoleyo.”

ECHR yi tlhele yi yima na hina eka nandzu lowu katsaka tiko ra Armenia. Ku sukela hi 1965, ECHR yi vule leswaku Nhlengeletano ya le Yuropa a yi va sirhelelanga vanhu eka nawu lowu va sindzisaka ku ya evusocheni. Huvo Leyikulu, ku nga yona leyi tlakukeke swinene eHubyeni ya le Yuropa, yi vule leswaku “munhu la nga laviki ku ya evusocheni hikwalaho ka tidyondzo leti a pfumelaka eka tona” u fanele a nyikiwa mpfumelelo wo ka a nga yi hi Nhlengeletano ya le Yuropa. Xiboho lexi xi ta endla leswaku tiko ra Armenia ni matiko yo tanihi Azerbaijan na Turkey ma xixima mfanelo leyi.

MATSIMA YO AKA

Guy Pierce la nga xirho xa Huvo leyi Fumaka u nyikele nkulumo leyi landzelaka kutani a vula leswaku vanhu hinkwavo lava a va ri kona a va lava ku tiva hi matsima ya hina yo aka eXifundzheni xa New York. U va kombe vhidiyo ya ntirho lowu se a wu sunguriwile ni lowu a wa ha ta endliwa eWallkill ni le Patterson ni switandi leswi swa ha ku xaviwaka eWarwick ni le Tuxedo le New York. Le Wallkill, muako lowuntshwa wo tshama eka wona lowu nga ta hetiwa hi 2014 wu ta va ni makamara yo tshama eka wona yo tlula 300.

Ku kunguhatiwe ku akiwa le Warwick endhawini leyi nga tihekitara ta 100. Makwerhu Pierce u te: “Hambileswi hi nga tiyisekiki hi ku rhandza ka Yehovha malunghana ni ndhawu ya le Warwick, hi tilunghiselela ku aka hi ri ni xikongomelo xo rhurhisela yindlu-nkulu ya misava hinkwayo ya Timbhoni ta Yehovha kwalaho.” Ku kunguhatiwa ku tirhisa ndhawu leyi nga tihekitara ta 20 leyi nga eka mpfhuka lowu endlaka khume ra tikhilomitara en’walungwini wa Warwick leswaku ku hlayisiwa michini ni swilo swo aka ha swona kwalaho. Makwerhu Pierce u te: “Loko hi kala hi nyikiwa mpfumelelo wo aka, hi anakanya ku heta ntirho lowu hinkwawo ku nga si hela malembe ya mune. Endzhaku ka sweswo hi nga yi xavisa miako ya hina ya le Brooklyn.”

Makwerhu Pierce u vutisile a ku: “Xana Huvo leyi Fumaka yi anakanya leswaku nhlomulo lowukulu a wa ha ri kusuhi?” U hlamule a ku: “Nikatsongo. Loko nhlomulo lowukulu wo kavanyeta makungu ya hina, yoleyo ku ta va ku ri mhaka yo tsakisa swinene!”

TIVONELENI NGHALA LEYI VOMBAKA

Endzhaku, Stephen Lett, loyi na yena a nga xirho xa Huvo leyi Fumaka u vulavule hi 1 Petro 5:8 leyi nge: “Hlayisani mianakanyo ya n’wina leyi hlutekeke, mi hiteka. Xirha xa n’wina, Diyavulosi, xa famba-famba ku fana ni nghala leyi vombaka, yi lava wa ku n’wi dya.” Makwerhu Lett u vule leswaku loko hi anakanyisisa hi leswaku tinghala i swiharhi swa njhani, hi ta swi twisisa leswaku xifaniso xa Petro xi n’wi hlamusela kahle Diyavulosi.

Tanihi leswi tinghala ti nga ni matimba naswona ti nga ni rivilo ku tlula vanhu, a hi fanelanga hi ringeta ku lwa kumbe ku siya Sathana hi matimba ya hina. Hi lava mpfuno wa Yehovha. (Esa. 40:31) Loko nghala yi hlota ya nyandlamela, hikwalaho hi fanele hi papalata munyama wa moya lowu Sathana a hlotaka vanhu eka wona. Tanihi leswi nghala yi dlayaka mhala leyi nga riki na khombo kumbe n’wana wa mangwa la etleleke, Sathana na yena u ni tihanyi naswona u lava ku hi dlaya. Loko nghala se yi hete ku dya, xiharhi lexi yi xi hlaseleke xi sala xi nga ha vonaki, hilaha ku fanaka ‘swiyimo swo hetelela’ swa vanhu lava hlaseriweke hi Sathana hi tlhelo ra moya “swi [biha] ngopfu ku tlula leswo sungula.” (2 Pet. 2:20) Hikwalaho hi fanele hi lwisana na Sathana naswona hi yi namarhela swinene milawu ya le Bibeleni leyi hi yi dyondzeke.—1 Pet. 5:9.

TLANGELA NDHAWU YA WENA ENDLWINI YA YEHOVHA

Xivulavuri lexi landzeleke ku nga Samuel Herd la nga xirho xa Huvo leyi Fumaka u te: “Hinkwerhu hi ni ndhawu endlwini ya Yehovha.” Vakreste hinkwavo va ni ndhawu “endlwini” ya Xikwembu—tempele ya xona ya moya, ku nga lunghiselelo ro xi gandzela exisekelweni xa gandzelo ra nkutsulo ra Yesu. I ndhawu leyi faneleke yi tlangeriwa tanihi lunghelo ra risima. Ku fana na Davhida, hi navela ku “tshama endlwini ya Yehovha masiku hinkwawo ya vutomi bya [hina].”—Ps. 27:4.

Makwerhu Herd u vulavule hi Pisalema 92:12-14 kutani a vutisa a ku: “Yehovha u hi pfuna njhani leswaku swilo swi hi fambela kahle?” U hlamule a ku: “Eparadeyisini ya moya, Xikwembu xa hi chavelela, xa hi sirhelela naswona xi hi nyika mati lama phyuphyisaka ya ntiyiso. A hi xi nkhenseni hikwalaho ka sweswo.” Endzhaku ka sweswo Makwerhu Herd u khutaze vayingiseri a ku: “A hi enerisekeni hi ku tshama endlwini ya Yehovha—ku nga ri swa xinkarhana kambe hilaha ku heriki.”

VAKRESTE VA NTIYISO VA XIXIMA RITO RA XIKWEMBU

David Splane, loyi na yena a nga xirho xa Huvo leyi Fumaka u hlamusele eka nkulumo leyi landzeleke leswaku Vakreste va ntiyiso minkarhi hinkwayo va xixima Rito ra Xikwembu. Hi lembe-xidzana ro sungula, va tirhise rona leswaku va tlhantlha xiphiqo xa mhaka yo yimba. (Mint. 15:16, 17) Kambe hi lembe-xidzana ra vumbirhi, vanhu van’wana lava a va tivula Vakreste va sungule ku xixima filosofi ya Magriki ku tlula Matsalwa. Endzhaku, van’wana va dyondzise mavonelo ya vafumi va le Rhoma ni ya vanhu lava a va va vitana Vatatana va Kereke, ematshan’weni yo dyondzisa tidyondzo ta le Bibeleni kutani va nghenisa tidyondzo to tala ta mavunwa.

Makwerhu Splane u vule leswaku exifanisweni xa yena, Yesu u kombise leswaku a ku ta tshama ku ri ni Vakreste lava totiweke va xiviri emisaveni lava a va ta lwela ntiyiso. (Mat. 13:24-30) A hi tiyiseki leswaku a va ri vamani. Hambiswiritano, eka malembe-xidzana lama hundzeke, vo tala va sole tidyondzo ni mikhuva leswi nga sekeriwangiki ematsalweni. Van’wana va vanhu volavo a ku ri Bixopo-nkulu Agobard wa le Lyons wa hi lembe-xidzana ra vukaye, Peter wa le Bruys, Henry wa le Lausanne na Valdès (kumbe Waldo) va hi lembe-xidzana ra vu-12, John Wycliffe wa hi lembe-xidzana ra vu-14, William Tyndale wa hi lembe-xidzana ra vu-16, Henry Grew na George Storrs va hi lembe-xidzana ra vu-19. Ninamuntlha Timbhoni ta Yehovha ti ya emahlweni ti hlayisa milawu ya le Matsalweni naswona tidyondzo ta tona ti sekeriwe entiyisweni wa le Bibeleni ntsena. Hi yona mhaka Huvo leyi Fumaka yi hlawuleke Yohane 17:17 tanihi ndzimana ya hina ya lembe ya 2012 leyi nge: “Rito ra wena i ntiyiso.”

KU CINCA LOKU TSAKISAKA ESWIKOLWENI SWA BIBELE

Xitiviso lexi endliweke hi Anthony Morris la nga xirho xa Huvo leyi Fumaka xi hlamusele ku cinca loku endliweke eka varhumiwa ni maphayona yo hlawuleka. Ku sukela hi September 2012, ku ta khomiwa mintlawa ya Xikolo xa Bibele xa Mimpatswa leyi nga Vakreste ematikweni yo karhi. Xikongomelo xa Xikolo xa Giliyadi xi cinciwile. Ku sukela hi October n’wexemu, hinkwavo lava nga ta leteriwa eGiliyadi va ta va va ri eka ntirho wa nkarhi hinkwawo wo hlawuleka—varhumiwa lava nga si yaka eGiliyadi, maphayona yo hlawuleka, valanguteri lava famba-fambaka kumbe vatirhi va le Bethele. Mathwasana lawa ma ta tiyisa vanhu va Xikwembu etihofisini ta marhavi, entirhweni wo famba-famba kumbe ma rhumeriwa ku ya chumayela emadorobeni lamakulu ma tirha ni mavandlha ya kwalaho.

Maphayona yo hlawuleka lama engetelekeke ma ta sungula ku tirha nsimu etindhawini ta le kule ni leti nga toxe. Ku sukela hi January 1, 2012, mathwasana man’wana ya le Xikolweni xa Bibele xa Vamakwerhu Lava Nga Tekangiki ni ya Xikolo xa Bibele xa Mimpatswa leyi nga Vakreste ma averiwe ku va maphayona yo hlawuleka ya nkarhinyana naswona ma averiwe ku chumayela ensin’wini leyi ku nga ni vahuweleri va nga ri vangani kumbe ku nga riki na vahuweleri. Ma ta averiwa ku va maphayona yo hlawuleka ya nkarhinyana lembe rin’we, loko ma tirha kahle ma nga tirha ku ringana malembe manharhu. Lava va fanelekaka va nga ha namba va averiwa ku va maphayona yo hlawuleka.

Nhlangano wa lembe ni lembe wa 2011 a wu ri nkarhi wo tsakisa. Hi titshege hi Yehovha leswaku a katekisa malunghiselelo lamantshwa yo chumayela etindhawini leti engetelekeke emisaveni hinkwayo ni ku endla leswaku vamakwerhu emisaveni hinkwayo va va ni vun’we—sweswo hinkwaswo swi ta yisa ku dzuneka eka yena.

[Bokisi/Swifaniso leswi nga eka matluka 18, 19]

KU VA TIVA KU ANTSWA

Eka nongonoko lowu ku vulavurisaniwe ni tinoni ta ntlhanu eka ta kaye ta swirho swa Huvo leyi Fumaka. Makwerhu wa xisati Marina Sydlik, Edith Suiter, Melita Jaracz, Melba Barry na Sydney Barber va hlamusele ndlela leyi va dyondzeke ntiyiso ha yona ni ndlela leyi va sunguleke ntirho wa nkarhi hinkwawo ha yona. Hinkwavo ka vona va hlamusele vayingiseri mintokoto leyi nga rivalekiki leyi va veke na yona, timfanelo letinene ta vanuna va vona ni mikateko leyi va yi tsakeleke swin’we. Mimbulavurisano yoleyo yi gimetiwe hi ndlela leyi khutazaka loko lava a va ri kona va yimbelele risimu 86, leri nga ni nhloko-mhaka leyi nge, “Vavasati Vo Tshembeka, Vamakwerhu Va Xisati Lava Nga Vakreste.”

[Swifaniso]

(Ehenhla) Daniel na Marina Sydlik; Grant na Edith Suiter; Theodore na Melita Jaracz

(Ehansi) Lloyd na Melba Barry; Carey na Sydney Barber

[Mepe lowu nga eka tluka 16]

(Leswaku u vona rungula leri hleriweke hi ku helela, vona nkandziyiso wa kona)

Marhavi ya tsevu ma hlanganisiwile ivi ma languteriwa hi rhavi ra le Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Xifaniso lexi nga eka tluka 17]

Xifaniso xa ndlela leyi yindlu-nkulu ya misava hinkwayo ya Timbhoni ta Yehovha yi nga ta va xiswona eWarwick le New York