TINHLAMULO TA SWIVUTISO SWA BIBELE

Ha yini Yesu a vuriwa N’wana wa Xikwembu?

Xikwembu a xi na nsati wa xiviri loyi xi nga na vana na yena. Xi vumbe swilo hinkwaswo. Vanhu va vumbiwe va ri ni vuswikoti bya ku tekelela timfanelo ta Xikwembu. Hi yona mhaka leyi munhu wo sungula loyi Xikwembu xi n’wi vumbeke, ku nga Adamu, a a vitaniwa “n’wana wa Xikwembu.” Hilaha ku fanaka, Yesu u vitaniwa “N’wana wa Xikwembu” hikuva u vumbiwe a ri ni timfanelo to fana ni ta Tata wakwe.—Hlaya Luka 3:38; Yohane 1:14, 49.

Yesu u vumbiwe rini?

Xikwembu xi vumbe Yesu xi nga si vumba Adamu. Entiyisweni, Xikwembu xi vumbe Yesu kutani xi n’wi tirhisa ku endla swilo hinkwaswo, ku katsa ni tintsumi. Hi yona mhaka leyi Bibele yi vitanaka Yesu “mativula ya ntumbuluko hinkwawo” lowu vumbiweke hi Xikwembu.—Hlaya Vakolosa 1:15, 16.

Yesu a a ri ntsumi etilweni loko a nga si velekiwa eBetlehema. Loko nkarhi wu fika, Xikwembu xi hundzisele vutomi bya Yesu ku suka etilweni byi ya embelekweni wa Mariya leswaku a ta velekiwa tanihi munhu wa nyama.—Hlaya Luka 1:30-32; Yohane 6:38; 8:23.

Ha yini Xikwembu xi endle leswaku Yesu a velekiwa laha misaveni tanihi munhu wa nyama? Xana Yesu u hetisise ntirho wihi wo hlawuleka? U nga kuma tinhlamulo ta swivutiso sweswo eBibeleni naswona ti ta engetela ku twisisa ni ku tlangela ka wena leswi Xikwembu na Yesu va ku endleleke swona.