Hikwalaho Ka Yini Yesu A Vitaniwa N’wana Wa Xikwembu?

Nhlamulo ya Bibele

Mikarhi yo tala Bibele yi vitana Yesu “N’wana wa Xikwembu.” (Yohane 1:49) Xiga lexi nge “N’wana wa Xikwembu” xi kombisa leswaku Xikwembu i Mutumbuluxi, Xihlovo xa vutomi ku katsa ni vutomi bya Yesu. (Pisalema 36:9; Nhlavutelo 4:11) Bibele a yi dyondzisi swona leswaku Xikwembu xi ve tatana ku fana ni ndlela leyi vanhu va vaka va tatana ha yona.

Bibele yi tlhela yi vitana tintsumi leswaku i “vana va Xikwembu xa ntiyiso.” (Yobo 1:6) Nakambe yi vula leswaku Adamu, munhu wo sungula a a ri “n’wana wa Xikwembu.” (Luka 3:38) Kambe hikwalaho ka leswi Xikwembu xi nga rhanga xi vumba Yesu hi ku kongoma, Bibele yi hlamusela Yesu tanihi N’wana wa Xikwembu wa nkoka swinene.

• Xana Yesu a a tshama etilweni a nga si velekiwa laha misaveni?

• Yesu u endle yini loko a nga si ta laha misaveni?

Xana Yesu a a tshama etilweni a nga si velekiwa laha misaveni?

Ina. Yesu a a ri xivumbiwa xa moya lexi tshamaka etilweni loko a nga si velekiwa a ri munhu wa nyama laha misaveni. Yesu u vule a ku: “Ndzi xike hi le tilweni.”—Yohane 6:38; 8:23.

Xikwembu xi vumbe Yesu xi nga se vumba swilo leswin’wana hinkwaswo. Bibele yi vula leswi hi Yesu:

• “I . . . mativula ya ntumbuluko hinkwawo.”—Vakolosa 1:15.

• I “masungulo ya ntumbuluko wa Xikwembu.”—Nhlavutelo 3:14.

Yesu u hetisise vuprofeta lebyi vulavulaka hi “loyi a veke kona ku sukela khale ka khaleni.”—Mikiya 5:2; Matewu 2:4-6.

Yesu u endle yini loko a nga si ta laha misaveni?

A a ri ni xikhundlha lexi tlakukeke swinene etilweni. Yesu u vulavule hi xikhundlha xolexo loko a khongela a ku: “Tatana, ndzi nyike xikhundlha lexi a ndzi ri na xona etlhelo ka wena misava yi nga si va kona.”—Yohane 17:5.

U pfune tata wakwe ku tumbuluxa swilo leswin’wana hinkwaswo. Yesu a a tirha ni Xikwembu a ri “mutirhi la nga ni vuswikoti.” (Swivuriso 8:30) Bibele yi vula leswi hi Yesu: “Xikwembu xi tirhise yena ku tumbuluxa swilo leswin’wana hinkwaswo ematilweni ni la misaveni.”—Vakolosa 1:16.

Xikwembu xi tirhise Yesu ku tumbuluxa swilo leswin’wana hinkwaswo. Swilo sweswo leswi tumbuluxiweke swi katsa swivumbiwa swa moya ni swilo hinkwaswo leswi nga etilweni ni le misaveni. (Nhlavutelo 5:11) Ndlela leyi Xikwembu na Yesu va tirhisanaka ha yona hi nga yi fanisa ni ndlela leyi mudirohi wa tipulani ni muaki va tirhisanaka ha yona. Mudirohi u dirowa pulani ya yindlu ivi muaki a aka hi ku landza pulani yoleyo.

A a ri Rito. Loko Bibele yi vulavula hi Yesu a nga si ta laha misaveni yi vula leswaku a a ri “Rito.” (Yohane 1:1) Swi vonaka onge Xikwembu xi tirhise Yesu ku hundzisa rungula ni swileriso eka swivumbiwa leswin’wana swa moya.

Nakambe swi tikomba onge Yesu a a tirha tanihi Muvulavuleri wa Xikwembu loko a vulavula na vanhu emisaveni. Swi nga endleka Xikwembu a xi tirhisa Yesu tanihi Rito leswaku a byela Adamu na Evha swileriso swa Xikwembu loko va ri entangeni wa Edeni. (Genesa 2:16, 17) Kumbexana a ku ri Yesu loyi a a ri ntsumi leyi rhangeleke Vaisrayele emananga naswona swi nga endleka leswaku a ku ri rito rakwe leri Vaisrayele a va fanele va ri yingisa.—Eksoda 23:20-23.a