Xana Vakreste Va Fanele Va Yi Tlangela Paseka?

Encyclopædia Britannica yi hlamusela Paseka tanihi “nkhuvo lowu eka wona Vakreste va vaka va tlangela ku Pfuxiwa ka Yesu Kreste.” Kambe, xana Vakreste va fanele va yi tlangela?

Leswaku ku tiyisekiwa loko mhaka yo karhi yi ri ntiyiso, ku rhanga ku kambisisiwa rungula ra kona. Hilaha ku fanaka, leswaku hi tiva loko Vakreste va fanele va tlangela Paseka, i swa nkoka leswaku hi kambisisa rungula leri fambisanaka ni Paseka.

Xo sungula, Yesu u lerise valandzeri va yena leswaku va tsundzuka rifu ra yena ku nga ri ku pfuxiwa ka yena. Xiendlakalo lexi, muapostola Pawulo u xi vitane “Xilalelo Xa Hosi.”—1 Vakorinto 11:20; Luka 22:19, 20.

Ku engetela kwalaho, Britannica yi vula leswaku mikhuva yo tala ya Paseka “a yi fambisani” ni ku pfuxiwa ka Yesu, “kambe yi huma eka mindhavuko.” Hi xikombiso, malunghana ni mimfungho leyi tolovelekeke ya Paseka ku nga ku tirhisiwa ka mandza ni mimpfundla, buku leyi nge The Encyclopedia of Religion yi ri: “Tandza ri fanekisela vutomi lebyintshwa lebyi humaka eka xifunengeto xo tsindziyela xa tandza.” Yi tlhela yi ku: “Mimpfundla yi tiviwa yi ri swiharhi leswi taleke swinene naswona mpfundla wu fanekisela ku ta ka ximun’wana.”

Philippe Walter, mutivi wa tibuku ta khale, u hlamusela ndlela leyi mukhuva lowu wu veke xiphemu xa ku tlangela Paseka ha yona. U tsale leswaku “evukhongerini bya vuhedeni,” a swi olova ku hlanganisa nkhuvo wa vuhedeni lowu a wu tlangela “ku hela ka xixika ni ku nghena ka ximun’wana” ni ku pfuxiwa ka Yesu. Walter u tlhele a vula leswaku yoleyo yi ve ndlela leyi endleke leswaku leswi “Vakreste a va swi tlangela” swi hundzuriwa swi fambisana ni masiku ya minkhuvo ya vuhedeni.

Mukhuva lowu a wu sungulanga loko vaapostola va ha ha hanya, hikuva a va ri “xisirhelelo” eka vuhedeni. (2 Vatesalonika 2:7) Muapostola Pawulo u vule leswaku ‘loko se a fambile,’ a ku ta “humelela [vavanuna] va vulavula swilo leswi soholotiweke leswaku va tikokela vadyondzisiwa.” (Mintirho 20:29, 30) Naswona loko lembe-xidzana ri ya eku heleni, muapostola Yohane u tsale leswaku vavanuna van’wana a va hambukisa Vakreste. (1 Yohane 2:18, 26) Se a ku ya ku nghena mikhuva ya vuhedeni.

Hambiswiritano, van’wana va nga ha vula leswaku a swi hoxanga ku amukela mikhuva yin’wana ya Paseka—sweswo swi endla leswaku “vahedeni” va ku twisisa kahle leswi ku pfuka ka Yesu ku vulaka swona. Kambe, Pawulo a ta va a nga swi pfumelelanga sweswo. Hambileswi loko a fambafamba eMfun’weni wa Rhoma a a xiyeke mikhuva yo tala ya vuhedeni, a nga hlanganyelanga eka yona ku endlela leswaku vanhu va ta n’wi tiva kahle Yesu. Ku hambana ni sweswo, u lemukise Vakreste a ku: “Mi nga paniwi ni lava va nga riki vapfumeri. Hikuva ku lulama ni ku kala nawu swi ni xinakulobye xihi? Kumbe ku vonakala ni munyama swi hlangana kwihi? ‘Hikokwalaho humani exikarhi ka vona, mi tihambanisa,’ ku vula Yehovha, ‘naswona tshikani ku khumba xilo lexi nga basangiki’”—2 Vakorinto 6:14, 17.

Xana rungula leri hi buleke hi rona ri hi dyondzisa yini? Ri swi veke erivaleni leswaku Vakreste a va fanelanga va yi tlangela Paseka.