Xana Makumu Ma Tshinele?

Xana Xikwembu xi ta pfumelela vanhu va ya mahlweni va tshikilela van’wana ni ku onha vumundzuku bya vona? Doo! Hilaha se hi dyondzeke hakona, xi ta nghenelela kutani xi herisa mbitsi ni ku tshikileriwa. Muvumbi wa vanhu ni misava, u lava u swi tiva leswaku nkarhi wa ku va a teka goza wu tshinele. Xana mhaka yoleyo ya nkoka u ta yi paluxa njhani?

Xiya xikombiso lexi: Loko u ta teka riendzo hi movha, u nga ha sungula u languta ndlela eka Internet, mepe ni nkongomiso lowu tsariweke. Loko u vona mimfungho laha u nga kona yi fambisana ni leswi nga eka mepe, u va ni ntshembo wa leswaku u ta fika laha u yaka kona. Hilaha ku fanaka, Xikwembu xi hi nyike Rito ra xona leri hi hlamuselaka kahle leswi endlekaka emisaveni hinkwayo. Loko hi swi vona swi ri karhi swi endleka, ha tiyiseka leswaku makumu ma tshinele.

Bibele yi hlamusela leswaku ku ta fika nkarhi wa nkoka swinene lowu nga ta tlhela wu hundza. Hi nkarhi wolowo ku ta va ni swiendlakalo swa misava ni swiyimo leswi nga si tshamaka swi va kona ematin’wini. Xiya swin’wana leswi vuriweke eRitweni ra Xikwembu.

1. KU PFILUNGANYEKA KA MISAVA HINKWAYO Vuprofeta lebyi tsariweke eka Matewu ndzima 24, byi xaxameta swiendlakalo swa misava leswi kombaka nkarhi wolowo. Swikombo swoleswo swi vula “makumu ya mafambiselo ya swilo” naswona endzhaku ka swona ‘makumu ma ta fika.’ (Tindzimana 3, 14) Swi tlhela swi katsa ni tinyimpi letikulu ku kayivelaka swakudya, ku tsekatseka ka misava etindhawini to tala, ku andza ka vubihi, ku pfumaleka ka rirhandzu, ni matshalatshala ya vafundhisi yo kanganyisa vanhu. (Tindzimana 6-26) I ntiyiso leswaku swiendlakalo leswi se i khale swi endleka. Kambe leswi makumu ma yaka ma tshinela, hinkwaswo swi ta endleka hi nkarhi wun’we. Swi ta tlhela swi fambisana ni swilemukiso swinharhu leswi landzelaka.

2. MAHANYELO YA VANHU Bibele yi vula leswaku “emasikwini yo hetelela” ku nga nkarhi lowu endzhaku ka wona ku nga ta fika makumu, vanhu va ta tikhoma hi ndlela yo biha. Ha hlaya: “Vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu.” (2 Timotiya 3:1-4) I ntiyiso, ku nga xiximani swi tolovelekile kambe “emasikwini yo hetelela” ku ta nyanya naswona swa twisiseka ku va nkarhi wolowo wu vuriwa “minkarhi ya mangava leyi swi nonon’hwaka ku langutana na yona.” Xana u yi xiyile ndlela yo biha leyi vanhu va tikhomaka ha yona?

3. MISAVA YA ONHIWA Bibele yi vula leswaku Xikwembu xi ta “lovisa lava onhaka misava.” (Nhlavutelo 11:18) Xana vanhu va onha misava hi ndlela yihi? Nkarhi lowu Nowa a a hanya ha wona a wu hlamuseriwa hi ndlela leyi fanaka: “Misava yi onhaka emahlweni ka Xikwembu xa ntiyiso, misava yi tala madzolonga. Hikwalaho Xikwembu xi languta misava, kutani waswivo, a yi onhakile.” Xana Xikwembu xi te yini hi vanhu va nkarhi wolowo vo homboloka? Xi te: “Ndzi ta va lovisa.” (Genesa 6:11-13) Xana u yi xiyile ndlela leyi madzolonga ma andzaka ha yona emisaveni? Ku engetela kwalaho, swiendlo swa vanhu swi ya swi chavisa: Va nga kota ku yayarhela vanhu hinkwavo emisaveni. Va ni matlhari lama nga kotaka ku endla sweswo. Misava yi le ku onhiweni hi tindlela tin’wana. Swilo leswi endlaka leswaku hi kota ku hanya, swo tanihi—moya lowu hi wu hefemulaka, swiharhi, swimilana, lwandle—swi le ku onhiweni hi vanhu.

Tivutise: ‘Xana eka malembe ya dzana lama hundzeke vanhu a va ri na wona matlhari lama nga yayarhelaka vanhu?’ Kambe sweswi va na wona matlhari wolawo naswona va tlhela va onha mbango. Ku antswisiwa ka thekinoloji swi tikomba swi endla leswaku vanhu va nga ha koti ku twisisa ni ku lawula swiyimo swa misava. Hambiswiritano, vumundzuku bya misava, a byi le mavokweni ya vanhu. Xikwembu xi ta teka goza ra ku herisa lava onhaka misava va nga se yi onha hi ku helela. Xolexo i xitshembiso xa Xikwembu!

4. NTIRHO WA KU CHUMAYELA WA MISAVA HINKWAYO Xin’wana lexi kombisaka leswaku hi hanya eminkarhini ya makumu, i ntirho lowukulu lowu ku profetiweke leswaku wu ta endliwa: “Mahungu lamanene lawa ya Mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Ntirho lowu wo chumayela a wu nge fani ni lowu endliweke hi tikereke to tala eka madzana ya malembe lama hundzeke. Eka masiku ya makumu, ku ta vulavuriwa ngopfu hi rungula ro karhi, ku nga “mahungu lamanene lawa ya mfumo.” Xana ku ni vukhongeri byo karhi lebyi u byi tivaka lebyi vulavulaka ngopfu hi rungula rolero? Hambiloko van’wana swi tikomba va chumayela rungula ro fana ni leri, xana va chumayela laha u tshamaka kona ntsena, kumbe va chumayela mahungu lawa lamanene “emisaveni hinkwayo leyi akiweke leswaku byi va vumbhoni ematikweni hinkwawo”?

Web site leyi nge www.jw.org yi vulavula ngopfu hi “mahungu lamanene lawa ya mfumo.” Eka yona ku ni tibuku ni swibukwana leswi vulavulaka hi rungula leri hi tindzimi leti tlulaka 700. Xana va kona van’wana lava u va tivaka lava vulavulaka ngopfu hi mahungu lamanene ya Mfumo hi ndlela leyi? Khale loko Internet yi nga si va kona, Timbhoni ta Yehovha a ti tiviwa hi ku endla matshalatshala leswaku ti hangalasa mahungu lamanene hi Mfumo wa Xikwembu. Ku sukela hi 1939, xifunengeto xa magazini wa Xihondzo xo Rindza xi tsariwe marito lama nge “Xi Huwelela Mfumo Wa Yehovha.” Buku yin’wana ya vukhongeri yi vule leswaku ntirho wa ku chumayela wa Timbhoni ta Yehovha “i wukulu swinene lerova a ku na van’wana lava endlaka ku fana na tona.” Ku chumayela loku, ku vulavula ngopfu hi mahungu lamanene ya leswaku Mfumo wa Xikwembu wu ta endla leswaku ‘makumu ma fika’ ku nga ri khale.

NKARHI WA NKOKA EMATIN’WINI YA MISAVA

Xana wa swi xiya leswaku swilemukiso hinkwaswo swa mune swa le Bibeleni leswi hlamuseriwaka eka xihloko lexi swi le ku endlekeni? Se i malembe lama tlulaka dzana, magazini lowu wu ri karhi wu nyika vahlayi va wona rungula hi swiendlakalo swa misava ku va pfuna leswaku va tivonela hi ya vona leswaku hakunene makumu ma tshinele. Van’wana va ha kanakana va vula leswaku swilemukiso swoleswo ko va swiendlakalo ntsena leswi nga vuliki nchumu. Va tlhela va vula leswaku hambiloko tindlela to vulavurisana emisaveni tiya ti andza, kambe swiyimo swa vutomi swi ya swi nyanya. Ku ni vumbhoni byo tala bya leswaku hi hanya emakun’wini ya nkarhi wa nkoka swinene wa matimu ya vanhu.

Vativi van’wana va vula leswaku hi le kusuhi ni ku cinca lokukulu emisaveni. Hi xikombiso, hi 2014, magazini lowu vuriwaka Bulletin of the Atomic Scientists Science and Security Board wu lemukise Huvo ya Vusirheleri ya Nhlangano wa Matiko hi makhombo lamakulu eka vanhu. Van’wasayense volavo, va vule leswaku “ku kambisisiwa ka makhombo lawa swi tikomba kahle leswaku vanhu va le khombyeni lerikulu swinene.” Vanhu vo tala va ya va tiyiseka leswaku sweswi hi hanya eka nkarhi wa nkoka swinene wa matimu ya vanhu. Vakandziyisi va magazini lowu ni vahlayi vo tala va wona, va tiyiseka leswaku hakunene nkarhi lowu wo hlawuleka, i masiku ya makumu ni leswaku makumu ma tshinele. Kambe ematshan’wini ya ku chava vumundzuku, u nga tsaka hikwalaho ka vuyelo bya kona. Ha yini? Hikuva u nga pona.