Tirha Na Yehovha Siku Ni Siku

1. Hi nga tirha na Yehovha hi tindlela tihi?

MUVUMBI a a swi vurile leswaku vanhu lava hetisekeke a va ta tirhisana na yena leswaku va hetisisa xikongomelo xa yena. Hambileswi sweswi vanhu va nga hetisekangiki, vanhu vo tshembeka va nga swi kota ku tirha ni Xikwembu siku ni siku. Hi xikombiso, “hi vatirhi-kulobye ni Xikwembu” loko hi chumayela mahungu lamanene ya Mfumo wa xona ni ku endla vadyondzisiwa. (1 Kor. 3:5-9) Hakunene i lunghelo ku tekiwa hi ri lava fanelekaka ku tirha swin’we ni Muvumbi wa vuako hinkwabyo eka ntirho lowu a wu tekaka wu ri wa nkoka! Hambiswiritano, ku chumayela ni ku endla vadyondzisiwa a hi tona ntsena tindlela leti hi tirhaka swin’we na Yehovha ha tona. Eka xihloko lexi, hi ta kambisisa tindlela tin’wana to endla tano, ku nga ku pfuna mindyangu ya hina ni vamakwerhu, ku va ni malwandla, ku tinyiketela hi ku tirhandzela eka mintirho leyi hleriweke hi nhlengeletano ni ku engetela vutirheli bya hina.—Kol. 3:23.

2. Hikwalaho ka yini hi nga fanelanga hi pimanisa ntirho lowu hi wu endlelaka Yehovha ni wa van’wana?

² Loko hi ri karhi hi kambisisa rungula leri, u nga pimanisi ntirho lowu u wu endlelaka Yehovha ni wa van’wana. Tsundzuka leswaku vanhu va hambana hi malembe, rihanyo, swiyimo ni hi vuswikoti. Muapostola Pawulo u huhuteriwe ku tsala a ku: “Un’wana ni un’wana a a kombise leswi ntirho wa yena wu nga swona, kutani u ta va ni xivangelo xo khana malunghana na yena hi yexe, naswona ku nga ri hi ku tiringanisa ni munhu un’wana.”—Gal. 6:4.

PFUNA NDYANGU WA WENA NI VAMAKWERHU

3. Hikwalaho ka yini hi nga vulaka leswaku un’wana ni un’wana loyi a wundlaka ndyangu wakwe u tirha swin’we ni Xikwembu?

³ Yehovha u langutele leswaku malandza yakwe ma wundla mindyangu ya wona. Hi xikombiso, swi nga ha lava leswaku u tirha leswaku u ta wundla ndyangu wa wena hi tlhelo ra timali. Va manana vo tala va boheka ku tshama ekaya leswaku va khathalela tincece ta vona. Nakambe vana lava kuleke va nga ha boheka ku khathalela vatswari va vona lava dyuhaleke. Leswi swa fanela. Rito ra Xikwembu ri ri: “Loko munhu a nga va wundli lava nga va ka vona, ngopfu-ngopfu lava nga swirho swa ndyangu wakwe, u landzule ripfumelo naswona u bihe ngopfu ku tlula munhu la nga riki na ripfumelo.” (1 Tim. 5:8) Loko u ri ni vutihlamuleri byo tano, hakanyingi a wu nge vi na wona nkarhi wo tala wo endla mitirho ya Mfumo hilaha a wu ta lava hakona. Kambe u nga vileli! Yehovha wa tsaka loko u wundla ndyangu wa wena.—1 Kor. 10:31.

4. Xana vatswari va nga swi rhangisa njhani swilaveko swa Mfumo naswona ku va na vuyelo byihi?

⁴ Vatswari lava nga Vakreste va tirha swin’we na Yehovha loko va pfuna vana va vona ku tivekela tipakani to tirhela Xikwembu. Vo tala lava endleke tano, hi ku famba ka nkarhi va vone vana va vona va amukela swiavelo swa ntirho wa nkarhi hinkwawo swa le kule ni le kaya. Van’wana i varhumiwa, van’wana va phayona laha ku nga ni xilaveko lexikulu nakambe van’wana va tirhela eBethele. Leswi va nga le kule na le kaya, swi nga endleka va nga swi koti ku vonana ni maxaka ya vona hilaha a va ta lava hakona. Nilokoswiritano, vatswari lava rhandzaka Yehovha va khutaza vana va vona leswaku va khomelela eswiavelweni swa vona. Hikwalaho ka yini? Va tsaka swinene hi ku tiva leswaku vana va vona va rhangisa swilaveko swa Mfumo. (3 Yoh. 4) Kumbexana vo tala eka vatswari lava, va titwa ku fana na Hana loyi a vuleke leswaku n’wana wakwe Samuwele u n’wi “lombe” Yehovha. Vatswari lava va teka ku tirhisana ko tano na Yehovha tanihi lunghelo ra risima. Va teka sweswo tanihi ndlela leyinene yo tirhela Yehovha.—1 Sam. 1:28.

5. Hi tihi tindlela leti u nga pfunaka van’wana ha tona evandlheni ra ka n’wina? (Vona xifaniso lexi nga eku sunguleni.)

⁵ Loko u nga ri na vutihlamuleri bya ndyangu bya xihatla, xana u nga pfuna vamakwerhu lava khathalelaka lava vabyaka ni vadyuhari kumbe lava nga ni xilaveko xo karhi? Hikwalaho ka yini u nga vi na vuxiyaxiya evandlheni ra ka n’wina leswaku u ta tiva lava lavaka ku pfuniwa? Kumbexana u nga sala ni mutswari la dyuhaleke loko n’wana wakwe la nga Mukreste loyi a n’wi khathalelaka a ri karhi a endla swin’wana. Kumbe u nga pfuna van’wana hi xo famba loko u ya eminhlanganweni, ku va yela exitolo, ku va endlela swintirhwana swo karhi kumbe u famba na vona loko va lava ku ya pfuxela un’wana exibedlhele. Loko u endla tano, u nga ha tikuma u ri karhi u tirha swin’we na Yehovha loko a hlamula xikhongelo.—Hlaya 1 Vakorinto 10:24.

VANA NI MALWANDLA

6. I yini leswi katsekaka eku kombiseni ka malwandla?

⁶ Vatirhikulobye ni Xikwembu va tiviwa hi ku kombisa malwandla. Eka Matsalwa ya Vukreste ya Xigriki rito “malwandla” ri vula ku va ni “musa eka lava u nga va tiviki.” (Hev. 13:2) Rito ra Xikwembu ri ni swiendlakalo leswi hi dyondzisaka ku va ni rirhandzu ro tano. (Gen. 18:1-5) Hi nga swi kota naswona hi fanele hi tshamela ku lava tindlela to pfuna van’wana hambiloko va nga ri “swin’we na hina eripfumelweni.”—Gal. 6:10.

7. Hikwalaho ka yini swi ri swinene ku kombisa malwandla eka lava nga eka ntirho wa nkarhi hinkwawo lava hi endzeleke?

⁷ Xana u nga tirha swin’we ni Xikwembu hi ku va ni malwandla eka vatirhi va nkarhi hinkwawo lava hi endzeleke? (Hlaya 3 Yohane 5, 8.) Mikarhi yo tano hakanyingi yi endla leswaku hi va ni nkarhi wo “khutazana.” (Rhom. 1:11, 12) Xiya ntokoto wa Olaf. U tsundzuka leswaku khale evandlheni ra ka vona, a ku nga ri na munhu loyi a lava ku amukela mulanguteri wa muganga la nga tekangiki. Olaf, loyi a ha ri muntshwa u kombele vatswari vakwe lava nga riki Timbhoni leswaku va amukela mulanguteri wa muganga ekaya ra vona. Va pfumerile kambe va vule leswaku Olaf a ta boheka ku etlela esofeni. Sweswo swi ve ni vuyelo lebyinene. Olaf u ri: “Rolero ku ve vhiki leri tsakisaka! Mina na mulanguteri wa muganga a hi pfuka nimixo siku ni siku hi bula hi timhaka to tsakisa loko hi ri karhi hi fihlula. Xikhutazo lexi ndzi xi kumeke xi endle leswaku ndzi navela ku nghenele ntirho wa nkarhi hinkwawo.” Emalembeni ya 40 lama hundzeke, Olaf u tirhe tanihi murhumiwa ematikweni yo hambanahambana.

8. Hi swihi swivangelo leswi hi nga na swona swo va ni musa hambiloko swi vonaka swi nga tlangeriwi? Kombisa.

⁸ Hi nga komba vanhu lava hi nga va tiviki rirhandzu hi tindlela to tala hambiloko hi vona onge matshalatshala ya hina a ma tswali mihandzu. Xiya xikombiso lexi. Loko muhuweleri wa le Spain a ri karhi a dyondza Bibele ni wansati un’wana la humaka eEcuador la vuriwaka Yesica, u xiye leswaku Yesica a tshama a ri eku rileni. Muhuweleri u lave ku tiva xivangelo xa kona. Yesica u vule leswaku loko a ha ri eEcuador, a ri evuswetini lerova siku rin’wana a pfumala ni swakudya. A a boheka ku nyika n’wana wakwe mati ntsena. Yesica u ringete ku mbuwetela n’wana wakwe leswaku a etlela naswona u khongelele ku kuma mpfuno. Swi nga siya kwihi, Yesica u endzeriwe hi Timbhoni timbirhi kambe u ti hlundzukerile naswona u handzulele timagazini leti ti n’wi nyikeke tona. U vutise Timbhoni teto a ku: “Xana leswi i swakudya leswi mi lavaka ndzi swi nyika n’wananga?” Vamakwerhu lava va ringete ku n’wi chavelela kambe a ko fana na kwala. Endzhakunyana va n’wi tisele swakudya. Yesica u khumbiwe hi musa lowu va n’wi kombeke wona naswona a ti vona nandzu hi leswi a nga swi lemukangiki leswaku Xikwembu xi hlamule xikhongelo xakwe. Kambe sweswi a a tiyimisele ku tirhela Yehovha. Vona ndlela leyi malwandla ya vamakwerhu volavo ma tswaleke mihandzu ha yona!—Ekl. 11:1, 6.

PFUNETA EKA MATSIMA LAMA HLERIWEKE HI NHLENGELETANO

9, 10. (a) Hi le ka swiyimo swihi swa le mikarhini ya ku tsariwa ka Bibele laha a ku laveka vatirhi va ku tirhandzela exikarhi ka vanhu va Xikwembu? (b) Hi swihi swilo swin’wana leswi endliwaka hi vavanuna lava tiyimiseleke ku pfuna evandlheni?

⁹ Eka swiyimo swo hambanahambana ematin’wini ya Israyele wa khale, vatirhi va ku tirhandzela a va laveka. (Eks. 36:2; 1 Tikr. 29:5; Neh. 11:2) Ninamuntlha, u ni lunghelo ro tirhisa nkarhi wa wena, swilo swa wena ni vuswikoti bya wena leswaku u pfuna vamakwerhu. Loko u endla tano, u ta kuma ntsako lowukulu ni ku tlhela u kuma mikateko.

¹⁰ Rito ra Xikwembu ri khutaza vavanuna evandlheni ku ti karhatela ku fanelekela ku tirha tanihi malandza ya vutirheli kumbe vakulu. (1 Tim. 3:1, 8, 9; 1 Pet. 5:2, 3) Lava endlaka tano, va lava ku pfuna vamakwerhu va va ni vuxaka lebyi tiyeke na Xikwembu ni hi swin’wana leswi va swi lavaka. (Mint. 6:1-4) Xana vakulu va tshame va ku kombela leswaku u tirha tanihi murindzi kumbe ku pfuna hi mikandziyiso, hi nsimu, ku khathalela holo ni swin’wana? Lava endlaka mitirho yo tano va ta ku byela leswaku swa tsakisa ku pfuna van’wana.

11. Xana Margie u pfuniwe njhani hi vanghana lava a va kumeke loko a ha ri eka matsima yo aka lama hleriweke hi nhlengeletano?

¹¹ Lava pfunetaka eka matsima lama hleriweke hi nhlengeletano hakanyingi va kuma vanghana lavantshwa. Xiya xikombiso xa Margie loyi a tshameke a tirha eka matsima yo aka Tiholo ta Mfumo ku ringana malembe ya 18. Eka malembe wolawo a rhandza ku letela vantshwa. U xiye leswaku sweswo a swi va nyika nkarhi lowunene wo khutazana hi tlhelo ra moya. (Rhom. 1:12) Loko Margie a langutana ni swiyimo swo tika u khutaziwe hi vanghana lava a va kumeke loko a ha ri eka matsima yo aka. Xana u tshame u pfuneta eka matsima wolawo yo aka? Hambiloko u ri na vuswikoti kumbe u nga ri na byona, xana u nga ti endla u kumeka?

12. Xana u nga pfuna hi ndlela yihi endzhaku ka mhangu?   

¹² Loko ku va ni timhangu, vanhu va Xikwembu va kuma nkarhi wo tirha swin’we ni Xikwembu hi ku pfuna vamakwerhu. Hi xikombiso, va pfuna vamakwerhu lava weriweke hi timhangu hi mali. (Yoh. 13:34, 35; Mint. 11:27-30) Ndlela yin’wana i ku pfuna hi ku basisa ni ku pfuxeta miako. Gabriela makwerhu wa xisati loyi a humaka ePoland, loyi kaya rakwe ri khukhuriweke hi ndhambi, a tsake ngopfu loko vamakwerhu va le mavandlheni ya le kusuhi va ta va ta n’wi pfuna. U ri: “A ndzi swi lavi ku vulavula hi swilo leswi ndzi lahlekeleke, ko va nhundzu ntsena. Kambe ndzi tsakela ku mi byela leswi ndzi vuyeriweke ha swona. Ntokoto lowu, wu ndzi tiyisekise leswaku ku va xiphemu xa vandlha ra Vukreste i lunghelo ro hlawuleka naswona swi tisa ntsako.” Vo tala lava tshameke va pfuniwa endzhaku ka mhangu na vona va titwa hi ndlela leyi fanaka. Naswona lava tirhaka swin’we na Yehovha hi ku pfuna van’wana hi ndlela yoleyo va kuma ntsako lowukulu.—Hlaya Mintirho 20:35; 2 Vakorinto 9:6, 7.

13. Xana ku pfuna van’wana swi byi tiyisa njhani vuxaka bya hina na Yehovha? Vula xikombiso.

¹³ Stephanie ni vahuweleri van’wana va kume ntsako hi ku tirha swin’we na Xikwembu, hi ku pfuna Timbhoni leti humaka ematikweni man’wana leti teke eUnited States. Va pfune mindyangu leyi balekeke hikwalaho ka nyimpi hi ku yi kumela tiyindlu to tshama leti nga ni fenichara. Stephanie u ri: “Hi khumbiwe swinene loko hi vona ndlela leyi a va tsake ha yona loko va vona rirhandzu ra vamakwerhu leri kombisiwaka emisaveni hinkwayo.” U engete a ku: “Mindyangu yoleyo yi ehleketa leswaku hi yi pfunile kambe entiyisweni, hi yona leyi hi pfuneke ngopfu. Ku va ni rirhandzu, vun’we, ripfumelo ni ku titshega hi Yehovha leswi hi swi voneke, swi tiyise ndlela leyi hi n’wi rhandzaka ha yona Yehovha naswona leswi swi hi endle hi swi tlangela swinene hinkwaswo leswi hi swi kumaka hi ku tirhisa nhlengeletano.”

NDLANDLAMUXA VUTIRHELI BYA WENA

14, 15. (a) Xana muprofeta Esaya u kombise langutelo rihi? (b) Xana vachumayeri va Mfumo namuntlha va nga ri tekelela njhani langutelo ra Esaya?

¹⁴ Xana u nga tsakela ku tirha swin’we na Yehovha hilaha ku engetelekeke? Xana u nga swi tsakela ku rhurhela laha ku nga ni xilaveko lexikulu xa vachumayeri va Mfumo? Entiyisweni, a swi bohi leswaku malandza ya Yehovha ma rhurhela endhawini ya le kule leswaku ma kombisa malwandla. Kambe vamakwerhu van’wana swiyimo swa va pfumelela ku endla tano. Langutelo ra vona ri fana ni ra muprofeta Esaya. Loko Yehovha a vutise a ku, “Xana ndzi ta rhuma mani, i mani la nga ta hi yela?” Esaya u te: “Hi mina loyi! Ndzi rhume.” (Esa. 6:8) Xana wa swi navela naswona swiyimo swa wena swa ku pfumelela ku angula hi ndlela leyi fanaka eka swilaveko swa Mfumo? Ku ni swilaveko swihi?

¹⁵ Mayelana ni ntirho wo chumayela ni wo endla vadyondzisiwa, Yesu u te: “Ntshovelo i wukulu, kambe vatirhi a hi vangani. Hikokwalaho, kombelani N’wini wa ntshovelo leswaku a rhumela vatirhi entshovelweni wakwe.” (Mat. 9:37, 38) Xana u nga tirha ensin’wini leyi nga ni xilaveko lexikulu kumbexana tanihi phayona? Kumbe, xana u nga pfuna un’wana leswaku a endla tano? Vamakwerhu vo tala va xiye leswaku ndlela leyinene yo kombisa leswaku hi rhandza Xikwembu ni vaakelani, i ku phayona endhawini kumbe ensin’wini leyi nga ni xilaveko lexikulu xa vatshoveri. Xana u nga anakanya hi tindlela tin’wana to ndlandlamuxa vutirheli bya wena? Ntsako lowukulu wu tisiwa hi ku endla tano.

16, 17. Hi byihi vuleteri lebyi engetelekeke lebyi u nga byi kumaka loko u lava ku ndlandlamuxa ntirho lowu u wu endlelaka Yehovha?

¹⁶ Xana u nga swi tsakela ku tirha eBethele kumbe ku pfuneta eka matsima yo aka tiholo ta Mfumo kumbexana tanihi mutirhi wa nkarhinyana? Ku tshama ku ri ni xilaveko xa vanhu lava nga tirhelaka Yehovha kun’wana ni kun’wana laha va nga averiwaka kona naswona va endla mintirho leyi va averiwaka yona. Leswi swi nga ha vula leswaku u nga ha averiwa ku endla ntirho wo karhi lowu ku nga ni xilaveko eka wona hambiloko u ri vuswikoti kumbe ntokoto wa ntirho wun’wana. Kambe Yehovha wa va tlangela lava tinyiketelaka ku tirha kun’wana ni kun’wana laha ku nga ni xilaveko.—Ps. 110:3.

¹⁷ Xana u navela ku kuma vuleteri lebyi engetelekeke leswaku u kota ku xi hetisisa kahle xiavelo xa wena xo kwetsima? Loko swi ri tano u nga ha fanelekela ku ya eXikolweni xa Vachumayeri va Mfumo. Xikolo lexi xi letela vamakwerhu lava rhandzaka Yehovha, lava nga eka ntirho wa nkarhi hinkwawo leswaku va ta khathalela swilaveko swa Mfumo ensin’wini. Lava va endlaka xikombelo xo ya exikolweni lexi, va fanele va tiyimisela ku amukela xiavelo xihi na xihi loko va thwasa. Xana u nga tsakela ku tirhisa lunghiselelo leri leswaku u fikelela malunghelo lama engetelekeke?—1 Kor. 9:23.

18. Xana u vuyeriwa hi yini loko u tirha na Yehovha siku na siku?

¹⁸ Tanihi vanhu va Yehovha, hi lava ku hanana siku na siku, hikuva loko hi endla tano swi kombisa leswaku hi na vunene, musa ni rirhandzu. Loko hi endla tano hi ta va ni ntsako ni ku rhula. (Gal. 5:22, 23) Ku nga khathariseki xiyimo xa wena, u nga kuma ntsako hi ku tekelela ku hanana ka Yehovha ni hi ku va un’wana wa vatirhikulobye lava rhandzekaka eka yena!—Swiv. 3:9, 10.