Hi Nga Swi Kota Ku Kuma Ntsako Ni Namuntlha
KU NGA RI khale vanhu a va nge he vabyi, va dyuhala kumbe va fa, na wena u nga byi kuma vutomi byo tano! Hambiswiritano, sweswi hi langutana ni swiyimo swo tika ni swiphiqo. I yini lexi nga hi pfunaka leswaku hi kuma ntsako namuntlha? Bibele yi hi nyika switsundzuxo leswi endlaka leswaku hi tsaka hi tlhela hi eneriseka hi vutomi sweswi. A hi kambisiseni swiphiqo swin’wana leswi hi langutanaka na swona ni ndlela leyi Bibele yi nga hi pfunaka ha yona.
NDLELA YO KUMA NTSAKO
Xitsundzuxo xa le Bibeleni: “Mukhuva wa n’wina wa vutomi a wu pfumale rirhandzu ra mali, mi ri karhi mi eneriseka hi swilo leswi nga kona.”—Vaheveru 13:5.
Namuntlha ku ni swilo swo tala leswi vanhu va vulaka leswaku hi fanele hi va na swona. Hambiswiritano, Bibele yi vula leswaku hi nga swi kota ku “eneriseka hi swilo leswi nga kona.” Njhani?
Papalata “ku rhandza mali.” Vanhu va endla swilo leswi nga onhaka rihanyo ra vona, ndyangu, vunghana, mahanyelo ni xindzhuti xa vona hikwalaho ka “ku rhandza mali.” (1 Timotiya 6:10) Sweswo ko va nyuku wa mbyana hikuva eku heteleleni munhu la rhandzaka rifuwo a nge pfuki ‘a enerisekile.’—Eklesiasta 5:10.
Vanhu i va nkoka ku tlula swilo leswi vonakaka. Swilo leswi vonakaka swa hi pfuna kambe a swi nge swi koti ku hi rhandza, i vanhu ntsena lava nga endlaka tano. Ku va ni “nakulorhi wa ntiyiso” swi endla leswaku hi tsaka.—Swivuriso 17:17.
LOKO HI YINGISA SWITSUNDZUXO SWA LE BIBELENI HI NGA HANYA VUTOMI BYO TSAKISA
KU TIYISELA MAVABYI
Xitsundzuxo xa le Bibeleni: “Mbilu leyi tsakeke i muhanyisi lonene.”—Swivuriso 17:22.
Ku fana ni murhi lowunene ntsako wu nga hi pfuna leswaku hi tiyisela mavabyi. Xana hi nga wu kuma njhani ntsako hambiloko hi vabya?
Va na la khensaka. Loko ‘masiku hinkwawo’ hi ehleketa hi swiphiqo leswi hi nga na swona a hi nge tsaki. (Swivuriso 15:15) Bibele yi vula leswaku, “tikombeni mi ri ni ku nkhensa.” (Vakolosa 3:15) Tidyondzise ku khensa swilo leswinene hambi ku ri leswitsongo. Hi nga ha tsakisiwa hi ku saseka ka dyambu loko ri pela, rimoyana ra kahle ni ku n’wayitela ka munhu loyi hi n’wi rhandzaka.
Pfuna van’wana. Hambiloko hi vabya, “ku nyika swi tisa ntsako lowukulu ku tlula ku amukela.” (Mintirho 20:35) Loko van’wana va khensa swilo leswi hi va endlelaka swona ha tsaka naswona swi endla hi nga ehleketi ngopfu hi swiphiqo swa hina. Hi nga antswisa vutomi bya hina hi ku pfuna van’wana leswaku va antswisa vutomi bya vona.
KU TIYISA VUKATI
Xitsundzuxo xa le Bibeleni: “Tiyiseka hi swilo swa nkoka swinene.”—Vafilipiya 1:10.
Vatekani lava nga tinyikiki nkarhi wo va swin’we va veka vukati bya vona ekhombyeni. Vatekani va endla kahle loko va rhangisa vukati bya vona hikuva i bya nkoka ku tlula swilo hinkwaswo.
Endlani mitirho yo karhi swin’we. Mi nga ha kunguhata ku endla mitirho yo karhi swin’we hikuva sweswo a swi nge tiendlekeli hi xiwelo. Bibele yi ri, “Vambirhi va antswa ku tlula un’we.” (Eklesiasta 4:9) Mi nga ha tlhela mi sweka swin’we, mi endla vutiolori ni ku hungasa swin’we.
N’wi kombe leswaku wa n’wi rhandza. Bibele yi khutaza vatekani ku rhandzana ni ku xiximana. (Vaefesa 5:28, 33) Ku n’wayitela, ku angarhana hi rirhandzu kumbe ku nyikana tinyiko hambi ti nga nyawuli swi nga tiyisa vukati bya n’wina. Vatekani va fanele va tiyiseka leswaku a va endli swilo leswi pfuxaka ku navela ka timhaka ta masangu ni munhu un’wana handle ka loyi va tekaneke na yena ntsena.—Vaheveru 13:4.