Xikombiso Lexinene Xa Rirhandzu Ra Vumakwerhu

1 Hi laha swi hlamuseriweke ha kona eka Vutirheli Bya Hina Bya Mfumo bya March 1990, ku hambeta ku va ni xilaveko xa xihatla ta Tiholo ta Mfumo leti engetelekeke. Vamakwerhu va endla minyikelo ya nkarhi na nkarhi leswaku va seketela Nkwama Wa Sosayiti Wa Tiholo Ta Mfumo, naswona leswi swa tsakisa hakunene. Swi pfumelelana ni moya wa Vakriste wa ku tshama va ‘tiyimisele ku pambulela van’wana.’ Ku nyika ka ku hanana ka vamakwerhu ku kombisa leswaku hi veka ku tshemba ka hina eka Xikwembu, lexi “hi nyikaka hi ntalo swilo hinkwaswo leswaku hi tikorwisa ha swona.”—1 Tim. 6:17, 18.

2 Eku sunguleni ka lembe leri, swiphephana swimbirhi leswi tsariweke marito lama nge “Contributions for Society Kingdom Hall Fund” swi rhumeriwile emabandlheni ni xikombelo xa leswaku bokisi leri hlawulekeke ra minyikelo ri simekeriwa nkwama lowu. Hambi swi ri tano, swi vonaka onge mabandlha yo tala a ma si endla tano. Hi xikombiso, hi May 1990 i mabandlha ya 249 ntsena lama nyikeleke eka nkwama lowu. Loko bokisi ro tano ra minyikelo ri nga si simekiwa ebandlheni ra ka n’wina, hi kombela mulanguteri la ungamelaka leswaku a endla malunghiselelo yo endla tano vhiki leri loko swi koteka. Nakambe, loko a rhumela mali ya Nkwama Wa Sosayiti Wa Tiholo Ta Mfumo, matsalana u fanele ku kambela leswaku swi kombisiwe kahle eka fomo leyi nge “Remittance and Credit Request” (S-AB-20).

3 Ku tlhandlekela eka nseketelo wa swa timali lowu humaka emabandlheni ni le vanh’wini, ku ve ni ku hlamula lokunene hi tindlela tin’wana. Vatirhi lava nga ni vutshila va nyikela nkarhi lowu nga ni ntikelo ni vuswikoti leswaku va pfuneta eku akiweni ka Tiholo ta Mfumo leti lavekaka. Van’wana va nyikele switirhisiwa ni swo aka. Hambi loko van’wana va vatshila va bandlha va ye eku pfuneni ka ku akiwa ka Tiholo ta Mfumo, vahuweleri van’wana va engetele nseketelo wa vona wa ntirho wa kwalaho wa nsimu. Swa khutaza ku xiya ntirhisano wa mbilu hinkwayo wa vanhu vo tala swinene. Tanihi leswi hinkwerhu ka hina “hi nga ni tinyiko leti hambaneke, hi ku ya hi leswi Xikwembu xi hi nyikeke swona,” a hi hambeteni hi ti tirhisa hi xitalo.—Varhoma 12:4, 6.

4 Xana nhlayo ya lava va veke kona eka Xitsundzuxo xa n’wina a yi ku endli u xalamukela swinene xilaveko lexi yaka emahlweni xa Tiholo ta Mfumo leti engetelekeke? Muapostola Pawulo u khutaze Vatesalonika ku kombisa ‘rirhandzu ra vona ra vumakwerhu hi mpimo lowu taleke.’ (1 Vates. 4:9, 10) Loko u hambeta u endla leswi hi tindlela leti tirhaka leti boxiweke laha, u ta va u kombisa moya wo fana ni wa Kriste wa ku avelana ni van’wana. (Mat. 10:8; Mintirho 20:35) Hi tindlela hinkwato, “yanani emahlweni mi rhandzana kukota vamakwavo.”—Vahev. 13:1.