Vanani Lava Kwetsimaka Emahanyelweni Ya N’wina Hinkwawo

1 Ku fana ni nkarhi lowu hundzeke, ku kwetsima i xilaveko xa Xikwembu eka malandza ya Xikwembu namuntlha. Xilaveko xa xihatla xisweswo xi va kona xa leswaku un’wana ni un’wana wa hina a twisisa khwatsi hayi leswaku ku kwetsima i yini ntsena, kambe ni leswaku ku fanele ku fungha vugandzeri bya hina eka Yehova hi ndlela yihi naswona ha yini. Emhakeni leyi, “Vanani Lava Kwetsimaka eMahanyelweni Ya N’wina Hinkwawo” i nhloko-mhaka leyi nga ta hlamuseriwa exiyimisweni xa siku ra nhlengeletano leyi hlawulekeke ya lembe ra ntirho ra 1991.—1 Pet. 1:15.

2 Tanihi leswi misinya ya milawu ni milawu leyi lulameke ya Yehova yi sunguriweke hi yena tanihi Xikwembu lexi Kwetsimaka, xiyimo lexi lulameke lexi hi xi tsakelaka i vuyelo lebyi kongomeke bya vuxaka bya hina lebyikulu, bya munhu hi xiyexe na xona. Hikwalaho, xiyimiso lexi xi ta ndlandlamuxa tindlela to tala to kombisa ndlela leyi hi nga antswisaka vuxaka bya hina na Xikwembu ha yona. Leswi swi katsa ku yingisa mimpimanyeto ya xona leyo kwetsima, hambi ku ri eka leswi swi nga ha xiyiwaka tanihi swilo leswintsongo. (Luka 16:10) Hi ta pfuniwa ku hlakulela ku twisisa loku enteke ka swilaveko swa Yehova leswo kwetsima ni ku tsundzuxiwa mhaka leyi leswi swi fanelaka ku kucetela ku anakanya, malangutelo ni tindlela ta hina hinkwato ha yona.

3 Tinkulumo-nkulu timbirhi leti nga ta ndlandlamuxiwa ti ta ku “Ku Titsongahatela Leswaku U Hambeta U Basisiwa” na “Ku Ndlandlamuxa Mintirho Ya Vanhu Va Yehova Lavo Kwetsima.” Tanihi leswi swiendlakalo swa misava leswi nyanyulaka siku na siku swi kandziyisaka xihatla xa minkarhi ya hina emianakanyweni ya hina, xiyimiso xa siku ra nhlengeletano leyi hlawulekeke ya lembe lerintshwa ra ntirho xi ta hi susumetela leswaku hi hambeta hi languta eka Yehova leswaku hi kuma vukongomisi ni ku lava ku n’wi tsakisa swinene hi ku tikhoma hi ndlela leyi kwetsimaka.—1 Pet. 1:14, 16.