Xalamukela Ku Sungula Tidyondzo Ta Bibele

1 Ku sungula ni ku fambisa tidyondzo ta le makaya ta Bibele i xiyenge xa xileriso xa hina tanihi Timbhoni ta Yehova. (Mat. 28:19, 20) Hikwalaho, xana u ta va un’wana wa vatirhi-kulobye va Xikwembu eku endleni ka leswi ke? (1 Vakor. 3:9) Mawaku lunghelo ronghasi leri ku nga rona ku pfuna van’wana leswaku va tiva Munhu lonkulu swinene evuakweni!

2 Hikwalaho ka leswi ku nga ni swiphiqo swo tala leswi hlanganeke ni swiendlakalo swa misava leswi hundzukaka hi ku hatlisa, vanhu vo tala va timbilu leto tshembeka va lava tinhlamulo ta leswaku ha yini swilo leswi swi humelela. Khale swinene Yehova u nyikele tinhlamulo ta swivutiso swa vona. Loko vanhu lava tshembekaka va leteriwa hi Rito ra Xikwembu, va chaveleriwa. Hikwalaho, hi fanele ku xalamukela minkarhi leyi hi pfulekeleke yo sungula tidyondzo ta Bibele.—Swiv. 3:27.

XALAMUKELA MINKARHI LEYI KU PFULEKELEKE

3 Xana u tshama u anakanya hi ku sungula dyondzo ya Bibele ni xaka ra le kusuhi kumbe munhu loyi u tolovelaneke na yena loyi a nga riki entiyisweni? Ku va tiva swi ta ku nyika mpfuno wo tirhisa ku twisisa loko swi ta eka nkarhi lowu faneleke leswaku u bula na vona hi mhaka leyi. Tsundzuka leswaku xivutiso lexi hlawuriweke khwatsi kumbe rito hi nkarhi lowu faneleke swi nga pfuxa ku tsakela ka vona ntiyiso. Loko ku lava ku tiva ka munhu ku pfuxiwile, mabulo lama tswalaka mihandzu hakanyingi ma landzela, naswona dyondzo ya Bibele yi nga sunguriwa.

4 Etimhakeni to tala mahanyelo lamanene ya munghana wa vukati wa Mukriste ma pfune ku pfula ndlela leswaku loyi a nga riki mupfumeri a nghena entiyisweni. (1 Pet. 3:1, 2) Vanghana va vukati lava nga riki vapfumeri ni swirho swin’wana swa ndyangu leswi nga riki vapfumeri hi ntolovelo va swi tlangela loko va nyikiwa nyingiso ni ku xiximiwa hi swirho swa bandlha. Ku kombisa ku khathalela ka munhu hi xiyexe eka vona swi nga yisa eku akeni ka vuxaka bya xinghana. Hi ku tirhisana ni munghana wa vukati kumbe xirho xa ndyangu lexi nga entiyisweni, u nga swi kota ku simeka dyondzo ya Bibele.

5 Loko hi ri entirhweni wa yindlu na yindlu, hi nga ringeta ku sungula dyondzo ya Bibele eka riendzo ro sungula. Xana leswi swi nga endlisiwa ku yini ke? Vahuweleri van’wana va ve ni ku humelela eku endleni ka leswi loko n’wini wa muti a vutisa swivutiso leswi nga hlamuriwaka hi ku kongoma hi buku. Loko munhu a pfumela ku hlaya buku kumbe loko a hi rhamba leswaku hi hlaya, hi nga tirhisa nkarhi lowu hi pfulekeleke leswaku hi ya emahlweni ni bulo ivi kumbexana hi kombisa dyondzo. Tirhisa ku avanyisa ka wena ehenhleni ka nkarhi lowu u nga ta tshama wona eka riendzo ro sungula. Swi nga va leswi pfunaka ku tlhelela endzhaku ka nkarhinyana kumbe esikwini ra le ndzhakunyana leswaku mi yisa bulo emahlweni. Eka maendzo lama landzelaka, u nga ha tsakela ku ya emahlweni u bula hi nhloko-mhaka leyi u yi sunguleke eka riendzo ro sungula. Kumbe u nga hlamula xivutiso lexi tlakusiweke eku heteleleni ka riendzo leri hundzeke.

MINKARHI YA XITSHUKETA

6 Ku nyikela vumbhoni bya xitshuketa ku nga va ndlela yin’wana leyi tswalaka mihandzu eka matshalatshala ya hina yo sungula tidyondzo ta le makaya ta Bibele. Emintirhweni ya hina ya siku na siku, hi hlangana ni vanhu vo tala lava va nga navelaka ku dyondza. Ku hi pfuna leswaku hi humelela, hi nga tirhisa swin’wana swa swingheniso leswi ringetiweke leswi humaka ebukwini leyi nge Reasoning leswaku hi sungula mabulo. Naswona u nga tshiki ku nyikela dyondzo ya Bibele ro sungula hikwalaho ka leswi munhu a tshamaka kun’wana ni leswi hi nga vaka hi nga ri na nkarhi wo fambisa dyondzo hi hexe.

7 Xalamukela minkarhi ya vumbhoni bya xitshuketa, naswona vana loyi a tiyimiseleke hi ku rhwala mphakelo lowunene wa swiphephana ni timagazini leswi swi nga ta kurisa ku tsakela ka muyingiseri ka ntiyiso. (Ekl. 11:1) Loko munhu a kombisa ku tsakela ntiyiso kambe a nga ri ensin’wini ya bandlha ra ka n’wina, kuma adirese ya yena ni rungula rin’wana leri fanelaka ivi u swi hundzisela ebandlheni ra laha a tshamaka kona leswaku un’wana a ta n’wi khathalela hi ndlela leyi faneleke.

8 Ntirho wa ku endla vadyondzisiwa a hi wa vanhu vo karhi ntsena. I wa hinkwavo ebandlheni. Ku tsundzuka leswaku i xileriso xa Vukriste leswaku hi va vaendli va vadyondzisiwa swi ta hi khutaza ku xalamukela minkarhi leyi hi pfulekeleke yo sungula tidyondzo ta Bibele.