Ku Twarisa Mahungu Lamanene

Hi Ndlela Ya Xikhongelo

1 Muapostola Pawulo u tsalele Vafilipiya hi ndlela leyi khutazaka, “Ndzi nga endla hinkwaswo hi matimba ya Loyi a ndzi tiyisaka.” (Vafil. 4:13) Nakambe hi fanele ku tshembela eka Yehova hi ku helela leswaku hi kuma matimba yo twarisa mahungu lamanene hi xivindzi. Hi nga swi endlisa ku yini leswi?

2 Yesu u tshikilele leswaku hi fanele “ku khongela minkarhi hinkwayo, [hi] nga heli timbilu.” (Luka 18:1) Pawulo u khongoterile, “Mi nga tshiki ku khongela.” (1 Vates. 5:17) Ina, matimba ma huma exikhongelweni. Hi fanele ku twarisa mahungu lamanene hi ndlela ya xikhongelo. Hi nga ha khongelela minkarhi yo veka vumbhoni eka van’wana, ku va ni vutlhari ni ku twisisa entirhweni wa yindlu na yindlu ni ku humelela eku fikeleleni ka timbilu ta swichudeni swa hina swa Bibele. Tanihi leswi ku nga xilaveko xa xihatla leswaku mahungu lamanene ya Mfumo ma twarisiwa makumu ma nga si fika, nakambe hi fanele ku khongelela ku ya emahlweni ka timhaka ta Mfumo emisaveni hinkwayo. (Mat. 24:14) Hi fanele ku ‘hiseka’ exikhongelweni leswaku hi kota ku papalata ku tsana ka moya kutani hi engetela ku tlangela ka hina hi lunghelo ro vulavula ni van’wana hi swikongomelo swa Yehova.—Vakol. 4:2; w62 tl. 497.

ETIDYONDZWENI TA BIBELE

3 Ha yini xikhongelo xi ri xa nkoka loko u fambisa dyondzo ya Bibele? Ku sungula dyondzo hi xikhongelo swi hi veka eka xivumbeko lexinene xa miehleketo naswona swi pfuna xichudeni ku xiya nkoka wa leswi vuriwaka. Xi dyondza ku titshega hi Yehova leswaku xi kuma nkongomiso. Xichudeni nakambe xi dyondza ndlela yo khongela ha yona hi xikombiso xa hina.—Luka 11:1.

4 Hi swihi swilo swin’wana leswi a a swi ta va swi fanerile ku swi katsa eswikhongelweni etidyondzweni ta le kaya ta Bibele? Xikhongelo xa Yesu xa xikombiso ni xikhongelo xa Pawulo exikarhi ka Vafilipiya i swikombiso leswinene. (Mat. 6:9-13; Vafil. 1:9-11) Swikhongelo swa hina a swi fanelanga swi leha, kambe swi fanele ku vulavula hi swilo leswi kongomeke. I swa nkoka leswaku hi katsa marito lama faneleke yo dzunisa Yehova hikwalaho ka mintirho ya yena leyikulu leyi nga hlayekiki. Hi nga kombisa ku xiya vukulukumba, matimba ni timfanelo ta yena leti hetisekeke. (Ps. 145:3-5) Ku boxa xichudeni xa Bibele hi vito, kumbe ku kombisa swiyimo swa xona ni ku khongelela leswaku xi endla nhluvuko wa moya swi ta pfuna. Loko a ya emahlweni, hi nga kombela ku katekisiwa hi Yehova ehenhla ka matshalatshala ya yena yo va kona eminhlanganweni ni ku avelana ntiyiso lowu a wu dyondzaka ni van’wana. Katsa swikombelo swa mikateko ya Yehova entirhweni wo chumayela wa misava hinkwayo.

EKA VAMAKWERHU VA XINUNA NI VA XISATI

5 Hinkwavo vanhu va Yehova i vatirhi-kulorhi. (1 Vakor. 3:9) Hikwalaho, loko vulawuri bya misava byi lava ku kavanyeta ku chumayeriwa ka mahungu lamanene, hi susumeteriwa ku khongelela “tihosi, ni hinkwavo lava nge switshan’wini swa le henhla.” Hi xikongomelo xihi? “Leswaku hi kota ku hanya vutomi bya ku rhula ni ku tsaka lebyi nga bya [ku chava Xikwembu] ni lebyi chavisekaka hi matlhelo hinkwawo.” (1 Tim. 2:1, 2) Swikhongelo swo tano hakunene swi pfuna vamakwerhu emisaveni hinkwayo. Hi khongela leswaku onge vafumi va nga va ni langutelo lerinene entirhweni wa hina.

6 Hi xikhongelo, hi nga kombelela vamakwerhu matimba, lava chumayelaka ehansi ka swiyimo swo nonon’hwa ni lava va nga ha vaka va vabya emoyeni, leswaku va hlanganyela hi xitalo evutirhelini. (2 Vates. 3:1, 2) Nakambe i swinene ku khongelela vakulu va bandlha, valanguteri lava famba-fambaka ni Huvo leyi Fumaka—hinkwavo “lava tirhaka exikarhi ka n’wina.”—1 Vates. 5:12.

7 Minkarhi hinkwayo hi fanele ku veka mivilelo ya hina eka Yehova. (Ps. 55:22; 1 Pet. 5:7) Ha tiyiseka leswaku ku nga khathariseki leswaku hi kombela yini, loko swi pfumelelana ni ku rhandza ka yena, u ta hi twa. (1 Yoh. 5:14) Hikwalaho, loko hi khongelela mpfuno wa Yehova leswaku hi ta hetisisa vutirheli bya hina hi xitalo, hi ta khorwiseka leswaku u ta hi twa ni ku endla ndlela ya hina yi humelela.—2 Tim. 4:5.