Mi Nga Karhali
1 1991 Yearbook yi hi hlamusela hi ku andza loku tsakisaka loku humelelaka emisaveni hinkwayo. Ku na tinhlohlorhi letintshwa ta vahuweleri ematikweni yo hambana-hambana.
2 Kambe swi njhani ensin’wini ya ka n’wina? Xana mi hlangana ni ku honisa? Xana vanhu a va ri tsakeli rungula ra Mfumo? Xana i vanhu va nga ri vangani lava nga ekaya? Xana i vantsongo lava hlamulaka kahle? Loko swi ri tano, u nga khutaziwa hi xitsundzuxo xa Pawulo eka Vagalatiya 6:9: “Loko hi ri karhi hi endla leswinene, hi nga karhaleni, hikuva hi ta tshovela hi nkarhi wa kona, loko hi nga heli mbilu.” Entiyisweni ku endla leswinene swi katsa ku chumayela mahungu lamanene ya Mfumo hi yindlu na yindlu. Hi fanele ku ya emahlweni hi chumayela hi xihatla ku kondza Yehova a vula leswaku ntirho wu herile. (Esa. 6:8) Hambi ku ri etinsin’wini to nonon’hwa, vanhu lava fanaka ni tinyimpfu va ha kumiwa.
3 Hi nga endla yini leswaku hi nga karhali evutirhelini? Ku cinca ku tshinelela kumbe swingheniso swa hina swi nga pfuna. Swiringanyeto leswinene swi kumeka eka buku leyi nge Reasoning. Xana u swi ringetile? Rungula leri komeke kambe leri kongomeke ri nga koka nyingiso wa vini vo tala va miti. Endla leswaku vanhu va swi tiva leswaku u kwalaho hikuva wena hi wexe wa va tsakela ni vuhlayiseki bya vona.
NYIKELA BUKU LEYI NGE NTIYISO
4 Hi January hi nga kombisa nkhathalelo wa hina eka van’wana hi ku nyikela yin’wana ni yin’wana ya tibuku ta khale ta matluka ya 192 leti humesiweke emahlweni ka 1980 leti bandlha ra ka n’wina ri nga na tona exitokweni. Yin’wana ya tibuku leti i Ntiyiso Lowu Yisaka eVuton’wini Lebyi Nga Heriki. Hina hi hexe hi bumabumela ni ku seketela Mfumo wa Xikwembu hi ku chumayela mahungu lamanene. Buku leyi nge Ntiyiso i xitirho lexinene xa ku pfuna van’wana leswaku va dyondza leswi engetelekeke hi Mfumo lowu hakanyingi va wu boxaka exikhongelweni, kambe va tiva swintsongo swinene ha wona.
5 Ndzima yin’wana ni yin’wana ya buku leyi yi na tinhla letinene to vulavurisana ha tona. U nga ha kuma ndzima 1 ni xifaniso lexi nga eka tluka 4 xi ri lexi pfunaka erungulweni ra wena. I mani la nga swi laviki swiyimo leswi hlamuseriwaka eka ndzimana 1? Ha yini u nga hlayi ndzimana leyi kutani u vutisa n’wini wa muti loko swiyimo swo tano swi ta va kona emisaveni? Hi ta rindza nkarhi wo fikela kwihi leswaku hi vona ku hetiseka ka xitshembiso lexi? Nhlamulo ya nyikeriwa eka ndzimana 3 eka tluka 6. Nakambe u nga ha tsakela ku kokela nyingiso eka ndzimana 10 eka tluka 9 leyi kombetelaka eka Daniel 2:44. Loko u nyikela yin’wana ni yin’wana ya tibuku ta khale, kuma nchumu lowu kongomeke eka buku yin’wana ni yin’wana lowu nga ta endla n’wini wa muti a tsakela Mfumo wa Xikwembu tanihi ntshembo lowu nga wona ntsena wa vanhu.
6 Entiyisweni hi nga khutaziwa hi hexe naswona hi tiyisiwa hi ku hlanganyela ka hina entirhweni wo chumayela ta Mfumo vhiki na vhiki. Ku engetela kwalaho, vumoya bya hina byi nga ha hlayisiwa byi ri ehenhla hi dyondzo ya nkarhi na nkarhi ya Rito ra Xikwembu ni ku hlanganyela nkarhi hinkwawo eminhlanganweni ya bandlha.—Vahev. 10:23-25.
KHUTAZA VAN’WANA LESWAKU VA TIYA
7 U nga ha tipfuna ni ku khutaza van’wana hi ku tirha na vona evutirhelini bya nsimu. (Vagal. 6:10) Ha yini u nga vutisi maphayona ni vakulu loko swi nga koteka leswaku u tirha na vona? Nakambe, lava va nga humeleriki nkarhi na nkarhi kumbe lava tsaneke va nga khutaziwa hi ku khathalela ka wena vuhlayiseki bya vona bya moya.
8 Hinkwerhu ka hina hi fanele ku tiyisela entirhweni wa Yehova hi nga karhali emasikwini lawa yo nonon’hwa ya makumu. Ku tiyisela ko tano ku ta hi pfumelela leswaku hi hlayisa ku chivirika ka hina ka Vukriste ku nga khathariseki ku nonon’hwa kumbe ku nga tsakeli ka van’wana. (Vahev. 10:36-39) Khongela eka Yehova leswaku u kuma matimba. (Esa. 40:29-31) N’wi kombele leswaku a ku pfuna u tiyisela, naswona u hlayisa langutelo lerinene ra mianakanyo. Tsundzuka, hi endla ntirho wa Xikwembu. Wa swi vona leswi hi swi endlaka entirhweni wa yena naswona a nga swi rivali. (Vahev. 6:10) Kutani ke, hi nga karhaleni! Ematshan’wini ya sweswo, ‘nkarhi hinkwawo a hi veni ni swo tala swo swi endla entirhweni wa Hosi,’ hi titshega hi Yehova leswaku a hi tiyisa hikwalaho ka ‘ntirho wa yena lowunene’—1 Vakor. 15:58; Vagal. 6:9.