U Nga Swi Endla Xana?
1 ‘Ndzi endla yini?’ wa vutisa. Swivuriso 3:27 yi hlamula yi ku: “U nga ali ku endla le’ŝinene ka loyi u nga ni fanelo ka yena, loko ŝi ri mandleni ya wena [ku swi endla, NW].” Xana swi le “mandleni ya wena” ku engetela mintirho ni ku hlanganyela ka wena entirhweni wa vuphayona bya nkarhinyana kumbe wa vuphayona bya nkarhi hinkwawo? Xana u nga swi endla sweswo?
2 Mawaku ndlela leyi a swi khutaza ha yona ku hlaya eka 1993 Yearbook leswaku a ku ri ni nhlayo-xikarhi ya maphayona ya nkarhi hinkwawo ni ya nkarhinyana ya 6 303 eAfrika Dzonga, ntsengo wa phayona rin’we eka vahuweleri va nhungu. Ina, 814 va nghenele ntirho wa vuphayona n’wexemu. Leswi swi endla vahuweleri vo tlula vambirhi hi siku lava kambisiseke swiyimo swa vona ku vona loko va ta swi kota ku endla leswi engetelekeke evutirhelini.
3 Vuphayona bya nkarhinyana i ndlela yo endlela van’wana leswinene. Hi April 1992 a ku ri ni maphayona ya nkarhinyana ya 8 611 eAfrika Dzonga. Sweswo i swinene. Vahuweleri lavanyingi va lavisisa tindlela to hamba va teka vuphayona bya nkarhinyana elembeni.
4 Ku vona loko u ta “swi endla,” kumbe e-e, u fanele u rhanga hi ku languta ku navela ka mbilu ya wena. (Mt. 22:37-39) Mintirho 20:35 yi ri: “Ku nyika, i ku kateka lo’ku tlurisaka ka ku nyikiwa.” Handle ko kanakana, lava va pfunaka emoyeni hi ku swi rhandza hi timbilu ta vona va ni ku navela lokunene. Leswaku u va muhuweleri kumbe phayona leri humelelaka, ku laveka ku navela koloko.
5 Xa vumbirhi, anakanya hi swiyimo leswi u nga eka swona. Xana u nga lulamisa mintirho ya wena ya siku na siku leswaku u tirha nkarhi hinkwawo? A hi hinkwavo lava nga swi kotaka. Kambe endzhaku ko tikambisisa hi ku khongela, lembe na lembe magidi ma kuma ndlela yo “swi endla.” (Kol. 4:5; w77 tl. 701) Hi xikombiso, mindyangu yin’wana yi hlawula tin’hweti to karhi leswaku swirho swin’wana kumbe swirho hinkwaswo swa ndyangu swi phayona nkarhinyana. Mindyangu yin’wana yi pfuna xirho xin’wana xa yona leswaku xi phayona nkarhi hinkwawo. Xana ndyangu wa ka n’wina wu ehleketisisile loko leswi swi ta koteka?—Vona Swivuriso 11:25.
6 Ku pfuna van’wana va tiva ntiyiso hi swona leswi tisaka ku eneriseka ka ntiyiso, hambi u tirha tanihi muhuweleri kumbe phayona. Ha swi tiva leswaku ntsako wa ntiyiso wu tisiwa hi ku endlela van’wana leswinene, ngopfu-ngopfu loko ‘swi ri emandleni ya hina ku swi endla.’