Tikarhatele Ku Kuma Ndleve Leyi Yingisaka

 ¹ Vanhu vo tala lava hi hlanganaka na vona evutirhelini bya hina bya yindlu na yindlu a va ti tivi timhaka ta moya. Swi nga ha endleka va khomekile hi swirho swa ndyangu, swiphiqo swa ikhonomi, kumbe swiphiqo swa vona vini. Leswaku hi sungula bulo, hakanyingi i swinene ku vulavula hi timhaka leti tsakisaka leti toloveriweke hi vanhu vo tala. Ku nga ha tirhisiwa swivutiso ku pfuxa ku tsakela, hikuva leswi swi nghenisa n’wini wa muti ebulweni. Swivutiso leswi lavaka mavonelo ya munhu leswi nga hetiki matimba swa humelela.

 ² U nga ha kuma ndleve leyi yingisaka hi ku tirhisa manghenelo yo fana ni lawa:

◼ “Avuxeni. Vito, hi mina _____ . Ndzi tshama eka yona ndhawu leyi. Vanhu vo tala lava ndzi vulavuleke na vona mixo lowu va vilerisiwa hi [boxa xiendlakalo xa kwalaho xa mahungu kumbe mhaka leyi khumbaka vanhu va kwalaho]. Xana u ehleketa leswaku Xikwembu a xi lava leswaku misava yi va hi ndlela leyi?” Yimela nhlamulo. Sweswi u nga ha fambisa xiphephana lexi nge Vutomi eMisaveni Leyintshwa Ya Ku Rhula. Langutanyana xifaniso lexi nga eka tluka 1 ni rungula leri nga eka tindzimana 1-⁠3 loko nkarhi wu pfumela. Loko ku tsakela ku ri kona, u nga ha humesa buku leyi nge Hanya Hi Masiku. U nga ha vulavula hi Pisalema 37:​9, 10, tanihi leswi yi tshahiweke eka tluka 157 ivi u yi hlaya ebukwini. Hi ku tirhisa swifaniso leswi nga eka matluka 156-⁠7, hlamusela swiyimo swa ku lulama leswi nga ta va kona emisaveni hinkwayo loko vubihi se byi herile.

 ³ Tshama u lunghekele ku fambisa minkandziyiso ya sweswinyana ya Xihondzo xo Rindza ni Xalamuka! Vanhu emisaveni hinkwayo va hlamarisiwa hi ku onhaka ka mahanyelo. Loko u hlaya Xalamuka! ya August 8, hlawula tinhla ti nga ri tingani leti u vonaka leswaku ti nga pfuxa ku tsakela eka vanhu va le nsin’wini ya ka n’wina. Ematshan’wini yo vulavula ngopfu hi swiyimo swo biha swa sweswi swa misava, komba n’wini wa muti xihloko lexi nge “Nkongomiso Lowu Hetisekeke Wa Mahanyelo,” ivi u hlamusela mimbuyelo ya ku namarhela ndzayo ya Rito ra Xikwembu. Eku heleni ka n’hweti, loko u vulavulela Xalamuka! ya September 8, hlamusela xihloko lexi nge “Nkarhi Lowu Tinxaka Hinkwato Ti Nga Ta Hanyisana Hi Ku Rhula.” Kombisa ndzayo ya Bibele ya ku va ni vuxaka lebyinene exikarhi ka tinxaka. Minkandziyiso ya sweswi ni ya khale ya Xihondzo xo Rindza ni Xalamuka! yi nga ha fambisiwa nkarhi wihi na wihi hi tindlela to hlawuleka ta ku fambisa timagazini.

 ⁴ Tsundzuka leswaku xikongomelo xa hina i ku pfuxa ku tsakela eka rungula ra Mfumo. Leswaku hi kuma ndleve leyi yingisaka, hi fanele hi rhanga hi ku koka nyingiso wa n’wini wa muti ni ku tlhontlha miehleketo yakwe. Leswi swi ta endla vanhu lava fanaka ni tinyimpfu leswaku va lava ku “yingisa le’ŝi v̌uriwaka [hi] Yehova Šikwembu” malunghana ni xikongomelo xakwe hi vanhu.​—⁠Ps. 85:⁠8.