Xana U Byala Swo Tala?
1 Ku na marito lama nge: “Loko u endla xilo hi vutalo, u ta kuma swo tala eka xona.” Leswi swi tano ngopfu-ngopfu evugandzerini bya hina. Loko hi tirhisa nkarhi wo tala ni matshalatshala hi lunghiselela minhlangano, hi chumayela rungula ra Mfumo ni ku kombisa rirhandzu eka vamakwerhu, hi ta kula ngopfu hi tlhelo ra moya. Kambe loko hi nga endli tano, vuyelo byi ta va lebyi hambaneke. Loko hi byala katsongo kumbe hi nga byali hi mbilu hinkwayo, xana hi nga langutela mimbuyelo leyi enerisaka hakunene?
2 Muapostola Pawulo u wu tsale kahle nsinya wa nawu eka 2 Vakorinto 9:6: “Loyi a byalaka switsongo, ú ta tshovela switsongo; kambe loyi a byalaka swo tala, ú ta tshovela swo tala.” Xana u byala swo tala?
3 Dyondzo Ya Munhu Hi Xiyexe Ya Bibele: Leswaku hi va vatirheli lava vekaka mihandzu, hi fanele hi sungula hi kuma swo tala edyondzweni ya hina ya munhu hi xiyexe. Hi fanele hi va ni torha ra xiviri ra moya. (Ps. 119:97, 105; Mt. 5:3) Hikwalaho ka swilaveko swa siku na siku leswi hi tshikilelaka, ku laveka matshalatshala ya vukheta leswaku hi kota ku hlakulela ku xalamukela xilaveko xa hina xa moya hi xiviri. Eka vo tala va hina, swi lava hi ‘xavisisa nkarhi.’ (Ef. 5:16) Van’wana va hlela ku pfuka ni mixo masiku man’wana leswaku va endla dyondzo ya munhu hi xiyexe. Van’wana va hlele minkarhi yin’wana ya madyambu hi xikongomelo xexo. Xana hi swi tshovela hi ndlela yihi swo tala? Hi kuma ripfumelo leri tiyeke, ntshembo lowu vangamaka ni xiyimo lexinene xa mianakanyo.—Rhom. 10:17; 15:4; 1 Pet. 1:13.
4 Minhlangano Ya Vandlha: Eka Pisalema 122:1, Davhida u te: “Nḍi ṭakile loko v̌a te ka mina: A hi yeni ndlwini ya Yehova!” Xana u titwa hi ndlela leyi fanaka? Ku byala ngopfu swi vula ku va kona nkarhi hinkwawo eminhlanganweni ya hina ya ntlhanu ya vhiki na vhiki. Tibyele leswaku a wu nge pfumeleli maxelo lama nga riki manene ma ku kavanyeta. Hakanyingi, loko hi hlula swihinga swo tala, hi kuma minkateko yo tala.
5 Hatla u fika naswona u yimanyana endzhaku ka minhlangano leswaku u bula ni vamakwenu hi ndlela leyi akaka. Ndlandlamuxa vunghana bya wena byi katsa van’wana vo tala hi laha u nga kotaka ha kona. Yi lunghiselele kahle Dyondzo ya Xihondzo xo Rindza ni minhlangano yin’wana leswaku u ta kota ku byala swo tala loko u kuma lunghelo ro hlamula. Loko u ‘cheleta’ van’wana eminhlanganweni, na wena u ta ‘cheletiwa.’—Swiv. 11:25.
6 Vutirheli Bya Nsimu: Kumbexana ku hava laha nsinya lowu wa nawu wa ku byala swo tala wu tirhaka kona hi vutalo ku tlula evutirhelini bya nsimu. Loko hi tinyika nkarhi lowu engetelekeke evutirhelini, hakanyingi hi ta kuma mintokoto yo tala leyi tsakisaka, maendzo yo vuyela lama humelelaka ku katsa ni tidyondzo letinene ta Bibele.
7 Ku byala swo tala evutirhelini bya nsimu swi fambisana ni nkoka ni ntalo. Xipfuneti lexinene ngopfu lexi nga hi pfunaka ku antswisa nkoka wa vutirheli bya hina i buku leyi nge Reasoning. Matluka 9-15 ma xaxameta swingheniso leswi tlulaka 40 leswi hlanganisaka 18 wa tinhloko-mhaka leti pfunaka ku pfuxa ku tsakela emitini. Loko u kuma ku tsakela, tiyiseka leswaku u tsala ehansi leswaku u ta tlhelela u ya tshovela mihandzu ya leswi u swi byaleke. Handle ko kanakana, matshalatshala ya wena ma ta endla leswaku u kuma dyondzo ya Bibele, naswona u nga dyondzisa un’wana ndlela yo byala swo tala.
8 Loko hi byala swo tala, hi nga rindzela mikateko leyikulu leyi humaka eka Yehovha.—Mal. 3:10.