Ku Byala Hi Xitalo Swi Tisa Mikateko Leyi Fuweke

¹ Hinkwerhu hi ku langutele hi mahlo-ngati ku hetiseka ka switshembiso swo hlawuleka leswi nga eRitweni ra Xikwembu. Ni sweswi Yehovha u hi nyika mikateko yo tala leyi endlaka leswaku hi tsakela vutomi swinene. Kambe leswaku un’wana ni un’wana wa hina a vuyeriwa, hakanyingi swi titshege hi matshalatshala lawa a ma endlaka. Hilaha muapostola Pawulo a swi vekeke hakona, “loyi a byalaka hi xitalo, u ta tlhela a tshovela hi xitalo.” (2 Kor. 9:6) Xiya swilo swimbirhi leswi nsinya lowu wa nawu wu tirhaka eka swona.

² Vutirheli Bya Un’wana Ni Un’wana Wa Hina: Ku byela van’wana mahungu lamanene loko swiyimo swa hina swi hi pfumelela swi tisa mikateko yo tala. (Swiv. 3:27, 28) Lexi tsakisaka, vo tala va byala hi xitalo hi ku endla matshalatshala lama engetelekeke ensin’wini, ku katsa ni ku teka vuphayona bya nkarhinyana kumbe bya nkarhi hinkwawo. Hinkwerhu ka hina hi nga byala hi xitalo loko hi tinyiketela ku tlhelela eka vanhu lava kombiseke ku tsakela ni loko hi ringanyeta dyondzo ya Bibele loko xiyimo xi pfumela. (Rhom. 12:11) Ku tikarhata ka hina hi tindlela teto swi ta endla leswaku hi va ni mintokoto leyi khutazaka hi tlhela hi swi tsakela swinene ku hlanganyela entirhweni wa nsimu.

³ Ku Seketela Timhaka Ta Mfumo: Pawulo u boxe mhaka ya ‘ku byala hi xitalo’ loko a vulavula hi ku nyikela hi swilo leswi vonakaka. (2 Kor. 9:6, 7, 11, 13) Namuntlha swi tele leswi hi nga swi endlaka leswaku hi seketela timhaka ta Mfumo hi xiviri. Hi nga pfuneta eku akeni ka Tiholo ta Mfumo ni Tiholo ta Tinhlengeletano. Hi nga tlhela hi tinyiketela ku hlanganyela eku basiseni ni le ku hlayiseni ka tindhawu leti ta vugandzeri bya ntiyiso. Ku tlula kwalaho, hi nga nyikela hi mali yo hakelela swilaveko swa mavandlha ya ka hina ni yo seketela ntirho wa misava hinkwayo wa ku chumayela timhaka ta Mfumo ni wa ku endla vadyondzisiwa. Loko hinkwerhu hi byarha vutihlamuleri bya hina, hi ta tsaka swinene loko hi vona mikateko leyi fuweke ya Yehovha ehenhla ka ntirho lowu, lowu simekiweke hi Xikwembu!—Mal. 3:10; Luka 6:38.

⁴ Rito ra Xikwembu ri hi khutaza ku ‘endla leswinene, hi fuwa hi mintirho leyinene, hi hanana ni ku tiyimisela ku avelana ni van’wana.’ Loko hi yingisa xitsundzuxo xexo, hi ta kuma mikateko sweswi. Hi nkarhi lowu fanaka, hi ta va hi ‘tivekela masungulo lamanene ya nkarhi lowu taka, leswaku hi ta khomelela swinene evuton’wini bya xiviri’ lebyi taka.—1 Tim. 6:18, 19.