Lavatsongo Va Lava Xikombiso Lexinene
1 Ha tsaka ku va ni lavatsongo lava engetelekaka exikarhi ka hina lava ‘dzunisaka vito ra Yehovha.’ (Ps. 148:12, 13) Vunyingi bya vona va ha ri vatsongo swinene hi malembe. Nhluvuko wa vona wu vonaka swinene hi vuleteri ni xikombiso lexi nyikeriwaka hi vatswari va vona ni van’wana lava kuleke evandlheni. Hambi swi ri tano, a hi lavi ku honisa nkucetelo wa vana van’wana lavatsongo, ngopfu-ngopfu vana va kondlo-a-ndzi-dyi lava kuleke ni vantshwa. Loko u ri entlaweni lowu wa malembe, tinhlamuselo leti ti nga ha ku pfuna.
2 Vantshwa lava ha riki ehansi ka malembe ya kondlo-a-ndzi-dyi va rhandza ku tekelela vana va kondlo-a-ndzi-dyi lavakulu. Va ni ku navela ka ntumbuluko ko lava ku fana ni vanghana va vona lavakulu lava va va xiximaka. Va tala ku xixima vantshwa van’wana lavakulu, lava vonakaka va ri ni vutivi, ni ku va emahlweni hi swilo. Hikokwalaho, va nga ha tekelela marito ya n’wina ni ndlela leyi mi tikhomaka ha yona ku katsa ni ndlela leyi mi wu tsakelaka ha yona nkoka wa swilo swa moya ni ndlela leyi mi hlanganyelaka ha yona emintirhweni ya vandlha.
3 Tanihi n’wana wa kondlo-a-ndzi-dyi la vupfeke, u ni lunghelo ni vutihlamuleri lebyikulu. Ni sweswi, xikombiso xa wena swi nga ha endleka xi ri ni nkucetelo eka vanghana va wena lavatsongo. Tivutise, ‘Xana i nkucetelo wa muxaka wihi lowu ndzi wu nghenisaka eka lavatsongo? Xana ndzi vupfile emianakanyweni, ndzi papalata vuhunguki ni “ku navela loku telaka lavantshwa” loko biha? Xana ndzi kombisa ku yingisela ni xichavo eka vatswari va mina, vakulu ni vanhu lavakulu?’ (2 Tim. 2:22; Kol. 3:20) Leswi u swi vulaka ni leswi u swi endlaka swi nga hoxa xandla swinene enhluvukweni wa moya wa vana van’wana lava xiyaka swiendlo swa wena.
4 Ku chumayela rungula ra Mfumo i ntirho lowukulu wa vandlha. Ku hlanganyela ka wena nkarhi na nkarhi hi ku swi rhandza swi nga khutaza vanghana va wena leswaku va hiseka ngopfu. Loko u kota ku nghenela ntirho wa vuphayona, vanghana va wena va ta susumeteleka hi ndlela leyi fanaka. Ku hlamula eminhlanganweni ni ku pfuna hi ku tirhandzela eku endleni ka mintirho yin’wana eHolweni ya Mfumo na swona swi nga ha veka xikombiso lexinene.
5 Hambi leswi Timotiya a a nga ha ri emalembeni ya kondlo-a-ndzi-dyi loko Pawulo a n’wi nyika xitsundzuxo lexi landzelaka, kambe n’wina vana va kondlo-a-ndzi-dyi mi nga xi tirhisa: “Kambe boxela vapfumeri entila hi mavulavulele ni mahanyele ya wena, hi rirhandzu ni ku pfumela ni ku tenga.” (1 Tim. 4:12) Ku hiseka ka wena ni ku hlanganyela hi moya-xiviri wa wena hinkwawo entirhweni wa Yehovha swi nga va ni nsusumeto lowu akaka eka vanghana va wena ni le ka lavatsongo lava ku xiyaka, swi va pfuna leswaku va kula va va vanhu lava vupfeke hi tlhelo ra moya. (Ef. 4:13) Vana va kondlo-a-ndzi-dyi lava nga swirho swa mindyangu leya ha ku sungulaka ku dyondza va nga ha kokeleka entiyisweni hi leswi va swi vonaka eka wena.
6 Xa nkoka ngopfu, ku hiseka ka wena eku kombiseni ka timfanelo letinene swi dzunisa Yehovha ni nhlengeletano yakwe. (Swiv. 27:11) Vaxiyi lavanene va ta hlamarisiwa hi ku hambana ka wena ni vantshwa va misava. Xisweswo u ni lunghelo ro hlawuleka ro pfuna lavatsongo loko hi hala tlhelo u va ni xiphemu xo dzunisa Yehovha.—Ps. 71:17.