Rito Ra Mfumo—Ku Kuma Mongo Wa Rona
1 Exifanisweni xakwe xa muhaxi, Yesu u vule leswaku mbewu leyi welaka “emisaveni leyinene” yi yimela ‘munhu loyi a yingisaka rito a tlhela a kuma mongo wa rona.’ (Mt. 13:23) Endzhaku ka loko hi yingisile timhaka ta Mfumo, xana hi wu ‘kumile mongo wa wona’? Xana ri kucetela vutomi bya hina ku fikela kwihi? Xana hi rhangise swilaveko swa Mfumo ku sungula, xisweswo hi kombisa leswaku hi wu kumile mongo wa rungula ra wona?
2 Ku twisisa lokunene ka rungula ra Mfumo ku lava leswaku munhu a va ni dyondzo ya munhu hi xiyexe. Hi fanele hi tinyika nkarhi wo anakanyisisa hi swakudya swa moya leswi hi nyikiwaka swona. Ku hlaya Xihondzo xo Rindza hi ku tsutsuma swi fana ni ku mitetela swakudya leswo xawula ni leswi akaka miri handle ko cakunha. Xana wa tinyika nkarhi wo anakanyisisa swinene hi swakudya swa moya? Leswaku hi vuyeriwa swinene, ku fanele ku va ni nsusumeto ni ndlala leyikulu ya moya. Loko leswi swi nga ri kona, mintirho yin’wana yi nga hunguta mimbuyelo ya dyondzo ya munhu hi xiyexe kumbe ku dya nkarhi lowu hi wu tirhiselaka yona. Ku namarhela xiyimiso lexinene xa dyondzo a swi olovi. Hambi leswi swi lavaka ku va ni vukheta eku ringaniseleni ka swilo swa nkoka, rifuwo ra moya leri hi ri kumaka i ra nkoka.—Swiv. 3:13-18; Kol. 1:27.
3 Xibukwana lexi nge Ku Kambisisa Matsalwa xi hi pfuna ku va ni mianakanyo leyinene leyi akaka siku rin’wana ni rin’wana, malunghana ni Mfumo. Lava ‘khathalelaka xilaveko xa vona xa moya’ va kunguhata ku tirhisa timinete ti nga ri tingani siku rin’wana ni rin’wana va hlaya tsalwa ni nhlamuselo. (Mt. 5:3) Matsalwa yo tala ma hlamusela swiphemu swo hambana-hambana swa Mfumo. Hi xikombiso, hi November 22, 1994, tsalwa leri a ku buriwa ha rona a ku ri Matewu 13:4. Nhlamuselo yi vulavule hi ntshembo wa Mfumo kutani yi hi tsundzuxa hi makhombo ya ku tolovelana ni maxaka ni vaakelani ku tlula mpimo. Mhaka ya leswaku emakaya ya Bethele emisaveni hinkwayo, ku ni bulo ra timinete ta 15 ra tsalwa ra siku mixo wa siku rin’wana ni rin’wana ra ntirho, yi kandziyisa mbuyelo ni xilaveko xo kambisisa tsalwa ra siku swin’we. Xana ndyangu wa wena wu katsa bulo leri fanaka evuton’wini bya wona bya siku na siku?
4 Loko ku tlangela ka wena Mfumo ku kula, ku ta va ni nsusumeto lowukulu wa ku avela van’wana rungula ra Mfumo. Timagazini ta Xihondzo xo Rindza ni Xalamuka! ti hi nyika leswi nga fanisiwaka ni mafurha ya mianakanyo lama nyikaka mianakanyo ya hina rungula lerinene, leri nga enkarhini. Ti hi pfuna leswaku hi hlayisa langutelo lerinene ra ndlela leyi misava yi lavaka Mfumo wa Xikwembu ha yona. Ti hi pfuna leswaku hi va vanhu va moya, lava nga ni “miehleketo ya Kriste.” (1 Kor. 2:15, 16) Leswi hinkwaswo ka swona swi nga tiyisa ntshembo wa hina ni ku andzisa ku hiseka ka hina eku aveleni ka van’wana ntshembo wa Mfumo.—1 Pet. 3:15.
5 I swa nkoka leswaku hina hi hexe hi kuma mongo wa rungula ra Mfumo. Mfumo i xitirho lexi Xikwembu xi nga ta xi tirhisela ku tlakusa vuhosi bya xona, xi herisa vuhomboloki ni ku tisa misava leyintshwa—paradeyisi. Yesu u hi byele leswaku hi wu rhangisa evuton’wini bya hina. Hi fanele ku va vafumiwa lava fanaka ni tinyimpfu lava nga ta hanya ehansi ka vulawuri bya wona. (Mt. 6:10, 33) Wu tirhise swinene nkarhi lowu u nga na wona leswaku u ta tsakela mikateko ya wona.