Mi Fanele Mi Va Vanhu Va Njhani?
1 Nkarhi wa ku avanyisa wu tshinelela vanhu hinkwavo. Bibele yi wu vula “siku ra Yehovha.” I nkarhi lowu ku avanyisa ka Xikwembu ku nga ta fikela vanhu lavo biha; nakambe i nkarhi wo ponisa lavo lulama. Vanhu hinkwavo lava nga ta va va hanya hi nkarhi wolowo va ta avanyisiwa hi ku ya hi ndlela leyi va hanyeke ha yona. Loko a anakanya hi mhaka leyi, Petro u tlakusa xivutiso lexi kambisisaka: ‘Mi fanele mi va vanhu va njhani’? U kandziyise nkoka wa ‘ku va ni vutomi lebyo hlawuleka, swiendlo swa ku tinyiketela eka Xikwembu, ni ku tsundzuka siku ra Yehovha,’ kun’we ni xilaveko xa ku ‘pfumala xivati, hi nga vi na xisolo naswona hi va ni ku rhula.’—2 Pet. 3:11-14.
2 Mahanyelo Lamanene Ni Swiendlo Swa Ku Tinyiketela Eka Xikwembu: Mahanyelo lamanene ma katsa mintirho leyi nga xikombiso leyi kombisaka ku xixima misinya ya milawu ya Bibele. (Tito 2:7, 8) Mukreste u fanele ku papalata mahanyelo ya misava lama kuceteriwaka hi vutianakanyi, ni ku navela ka nyama.—Rhom. 13:11, 14.
3 “Ku tinyiketela eka Xikwembu” ku hlamuseriwa tanihi “ku tinyiketela ka munhu hi xiyexe eka Xikwembu, loku humaka embilwini leyi susumetiwaka hi ku tlangela lokukulu ka timfanelo ta xona ta nkoka.” Ku hiseka ka hina evutirhelini i ndlela leyi xiyekaka leyi kombisaka mfanelo leyi. Nsusumeto wa hina wo chumayela wu tlula ku ku languta tanihi ntirho ntsena; wu vangiwa hi leswi hi rhandzaka Yehovha hi vuenti. (Mar. 12:29, 30) Hi ku susumetiwa hi rirhandzu lero tano, hi languta vutirheli bya hina tanihi xikombiso lexi vonakaka xa ku tinyiketela ka hina eka Xikwembu. Tanihi leswi ku tinyiketela ka hina ku faneleke ku ya emahlweni, ku hlanganyela ka hina entirhweni wo chumayela ku fanele ku va loku nga hundzukiki. Ku fanele ku va xiphemu xa nkoka xa xiyimiso xa hina xa ntirho xa vhiki na vhiki.—Hev. 13:15.
4 Ku “tsundzuka” siku ra Yehovha swi vula ku ri languta ri ri ra nkoka eka leswi hi anakanyaka ha swona siku na siku, hi nga ri teki tanihi nchumu lowu nga riki kona. Swi vula ku rhangisa swilaveko swa Mfumo evuton’wini bya hina.—Mt. 6:33.
5 Ku Pfumala Xivati, Ku Pfumala Xisolo Ni Ku Rhula: Leswi hi nga xiphemu xa ntshungu lowukulu, hi ‘hlantswe tinguvu ta hina ni ku tibasisa hi ngati ya Xinyimpfana.’ (Nhlav. 7:14) Hikwalaho, ku va “lava pfumalaka xivati” swi vula ku hlayisa vutomi bya hina lebyi tengeke bya ku tinyiketela leswaku byi nga thyakisiwi hi misava. Hi tihlayisa “hi nga ri na xisolo” hi ku papalata swilo swa misava, ku hlongorisa swilo leswi vonakaka leswi nga onhaka vumunhu bya hina bya Vukreste. (Yak. 1:27; 1 Yoh. 2:15-17) Hi kombisa leswaku hi hanya hi “ku rhula” loko hi kombisa “ku rhula ka Xikwembu” eku hanyisaneni ka hina ni van’wana.—Flp. 4:7; Rhom. 12:18; 14:19.
6 Loko hi lwisana ni swisolo swa misava hi laha ku humelelaka, a hi nge ri “landzi hanyelo ra nguva leyi,” leri soriweke hi Yehovha. Ematshan’weni ya sweswo, mintirho ya hina leyinene yi ta pfuna van’wana leswaku va vona ku hambana eka “l’a tirelaka Šikwembu ni l’a nga ši tireliki.”—Rhom. 12:2; Mal. 3:18.
7 Vito ra Yehovha ra tlakusiwa, vandlha ra tiyisiwa naswona van’wana va vuyeriwa loko hi hlayisa “mintirho leyo saseka” hi vukheta. (1 Pet. 2:12) Onge nkarhi na nkarhi hi nga va vanhu lavo tano.