Pfuna Van’wana Leswaku Va Tlangela Nkoka Wa Bibele
1 Yesu u nyike vadyondzisiwa va yena leswi a va swi lava. Luka 24:45 ya vika: “A pfula miehleketo ya [v]ona leswaku va twisisa Matsalwa.” A a swi tiva leswaku loko va lava ku amukeriwa hi Tata wa yena, a va fanele va dyondza ni ku twisisa Rito ra Xikwembu, ku nga Bibele. (Ps. 1:1, 2) Ntirho wa hina wo chumayela wu na xikongomelo lexi fanaka. Pakani ya hina i ku sungula tidyondzo ta Bibele, laha hi nga ‘va dyondzisaka ku hlayisa hinkwaswo leswi Yesu a leriseke swona.’ (Mt. 28:20) U ri karhi u tsundzuka leswi, swiringanyeto leswi landzelaka swi nga ha ku pfuna loko u endla maendzo yo vuyela.
2 Loko eka riendzo ro sungula mi bule hi buku leyi nge “Ku Lavisisa Ka Vanhu Xikwembu” u nga yisa bulo ra wena emahlweni hi ndlela leyi:
◼ “Tanihi munhu wa vukhongeri, xana u ehleketa leswaku vukhongeri byi fanele ku ya khumba njhani mahanyelo ya munhu? [Yimela nhlamulo.] Leswi Yesu Kreste a swi hlamuseleke eka Matewu 7:17-20 swi hi nyika nkongomiso wa leswaku vukhongeri bya ntiyiso byi fanele ku landzeriwa.” Hlaya tsalwa leri nga emakumu ka ndzimana 19 hi ku kongoma eka tluka 12 ra buku leyi nge Ku Lavisisa Ka Vanhu Xikwembu. Kutani u vutisa n’wini wa muti leswi a swi vonaka exifanisweni lexi nga eka tluka 13. “Hambi leswi timiliyoni ta vanhu lava tivulaka leswaku va pfumela eka Xikwembu va xi landzula hi mintirho ya vona. [Hlaya swivulwa swimbirhi swo sungula swa ndzimana 20.] Swiendlo swa madzolonga swi kombisa leswaku vukhongeri a byi wu landzeli nkongomiso lowu nyikeriweke hi Kreste wo rhandzana, hambi ku ri ku rhandza valala va hina. Loko ndzi tlhela ndzi vuya, kumbexana hi nga bula hi leswi vukhongeri byi faneleke byi va byi endla swona loko byi ta va byi humesa mihandzu leyinene.”
3 Loko u vulavule ni munhu la kombiseke ku tsakela Bibele, kumbexana xingheniso lexi xi nga ha tirha leswaku u sungula dyondzo:
◼ “Vanhu vo tala lava u vulavulaka na vona va ku byela leswaku va lava ku hanya emisaveni leyi nga ni ku rhula ni nsirhelelo. Loko sweswo ku ri leswi laviwaka hi mani na mani, ha yini hi ri emisaveni leyi taleriweke hi mpfilumpfilu ni madzolonga? [Yimela nhlamulo.] Bibele yi hi nyika nhlamulo ya xivutiso xexo.” Hlaya 2 Vakorinto 4:4. Hlamusela ndlela leyi Xikwembu xi nga ta herisa Diyavulosi ha yona ni ku tisa ku rhula ni ntsako lowu nga heriki emisaveni. Hlaya Nhlavutelo 21:3, 4. U nga ha ku: “Loko ndzi tlhela ndzi vuya, ndzi ta tsakela ku ta ku komba matsalwa man’wana lama hlamuselaka mhaka leyi u nga langutelaka misava leyi nga riki na maxangu ha yona.”
4 Loko u tirhise xingheniso lexi kongomeke leswaku u sungula dyondzo naswona ku ve ni n’wangulo lowunene, loko u vuyela u nga ha vula leswi landzelaka:
◼ “Enkarhini lowu nga hundza, hi bule hi swivangelo swa mhaka leyi ha yona swi nga swa nkoka ku dyondza Bibele. Matshalatshala lamanene yo endla leswi engetelekeke ma nga hi pfuna leswaku hi tlangela leswi Xikwembu xi hi vekeleke swona. [Hlaya Yohane 17:3.] Hi sungule nongonoko wa dyondzo ya Bibele lowu pfuneke magidi ya vanhu leswaku va dyondza swo tala mayelana ni leswi Xikwembu xi swi tshembiseke ni ndlela leyi hi nga xi tsakisaka ha yona.” Humesa buku leyi nge Hanya Hi Masiku, hlamusela swihloko swa tindzimana, kutani u kombisa ndlela leyi hi fambisaka dyondzo ya Bibele ha yona.
5 Loko wo pfuna vanhu va timbilu letinene leswaku va tlangela nkoka wa Rito ra Xikwembu, u ta va u va pfunile swinene. Vutlhari lebyi va nga byi kumaka hi ku yi dyondza byi nga va “muri w[a] v̌utomi,” lowu nga ta va tisela ntsako lowukulu.—Swiv. 3:18.