Vanani Vaendli—Ku Nga Ri Vatwi Ntsena

¹ Namuntlha, Vakreste va ntiyiso va nghenisa xitsundzuxo xa Bibele embilwini xa ku va vaendli va rito, ku nga ri vatwi ntsena. (Yak. 1:22) Leswi swi endla leswaku va hambana swinene ni lava hambi leswi va tivulaka Vakreste, va ngo endla ntirho wa Xikwembu hi nomu ntsena. (Esa. 29:13) Yesu u swi hlamusele kahle leswaku ku ta ponisiwa lava endlaka ku rhandza ka Xikwembu ntsena.—Mt. 7:21.

² Vugandzeri lebyi nga riki na mintirho ya ku chava Xikwembu i bya hava. (Yak. 2:26) Kutani hi fanele hi tivutisa, ‘Xana mintirho ya mina yi swi kombisisa njhani leswaku ripfumelo ra mina ri tiyile? I yini lexi kombaka leswaku hakunene ndzi hanya hi ku twanana ni leswi ndzi swi pfumelaka? Ndzi nga n’wi tekelerisa ku yini Yesu hi laha ku heleleke?’ Tinhlamulo leto tshembeka ta swivutiso leswi ti ta hi pfuna ku vona nhluvuko lowu hi wu endleke kumbe lowu ha ha faneleke ku wu endla eku endleni ku rhandza ka Xikwembu.

³ Tanihi valandzeri va Yesu, hi fanele hi va na pakani-nkulu evuton’wini tanihi leyi phofuriweke hi mupisalema: “Hi ta ḍunisa Šikwembu hi masiku hikwawo, hi twarisa v̌ito ra wena hi laha ku nga heriki.” (Ps. 44:8) Vukreste i ndlela ya vutomi leyi tikombisaka siku na siku ni le ka leswi hi swi endlaka. Vona ku eneriseka loku hi vaka na kona loko hi ri karhi hi kombisa hi mintirho ya hina hinkwayo ku navela loku humaka embilwini ka ku dzunisa Yehovha!—Flp. 1:11.

⁴ Ku Dzunisa Yehovha Swi Katsa Swo Tala Ku Tlula Ku Hanya Vutomi Lebyinene Ntsena: Loko mahanyelo lamanene a ko va swona ntsena leswi Xikwembu xi swi lavaka, a hi to languta ntsena eka ku lulamisa vumunhu bya hina. Hambi swi ri tano, vugandzeri bya hina nakambe byi katsa ku twarisa vukulu bya Yehovha hinkwako ni ku huwelela vito ra yena erivaleni!—Hev. 13:15; 1 Pet. 2:9.

⁵ Ku chumayela mahungu lamanene erivaleni hi wun’wana wa mintirho ya nkoka leyi hi yi endlaka. Yesu u tinyiketele entirhweni lowu hikuva a a swi tiva leswaku swi vula vutomi lebyi nga heriki eka lava va nga ta yingisa. (Yoh. 17:3) Namuntlha ntirho wo ‘vula Rito’ wa ha ri wa nkoka; i endlelo leri vanhu va nga ponisiwaka ha rona. (Mint. 6:4; Rhom. 10:13) Hi ku xiya mpfuno lowukulu, hi nga tlangela xivangelo xa ku va Pawulo a hi tsundzuxe ku “twarisa Rito,” ni ku “hiseka.”—2 Tim. 4:2.

⁶ Hi fanele hi khomeka ku fikela kwihi hi ku dzunisa Yehovha evuton’wini bya hina? Mupisalema u vule leswaku a swi ri emianakanyweni yakwe siku hinkwaro. Xana a hi titwi hi ndlela yoleyo? Entiyisweni, hi ta languta ku hlangana na munhu un’wana ku ri nkarhi lowunene wo vulavula hi vito ra Yehovha. Hi ta lava minkarhi leyi faneleke yo kongomisa bulo ra hina etimhakeni ta swa moya. Nakambe hi ta tiyimisela ku hlanganyela eka malunghiselelo ya ntirho wa nsimu lawa ya hleriweke hi vandlha. Lava swiyimo swa vona swi va pfumelelaka va nga anakanyisisa hi ntirho wa vuphayona, hikuva byona byi hi pfuna ku rhangisa ntirho wo chumayela evuton’wini bya hina bya siku na siku. Rito ra Xikwembu ri hi tiyisekisa leswaku hi va vaendli va ku rhandza ka Xikwembu lava phikelelaka, hi ta tsaka.—Yak. 1:25.