Vulavula Hi Ntiyiso Eka Muakelani Wa Wena

¹ Wun’wana wa milawu mimbirhi leyikulu hi lowu nge: “Rhandza munhu-kuloni, kukota loko u tirhandza.” (Mt. 22:39) Rirhandzu ro tano ri ta hi susumetela ku avelana ni vaakelani va hina leswinene leswi hi nga na swona—ntiyiso lowu hi wu kumeke eRitweni ra Xikwembu. Leswi timagazini ta Xihondzo xo Rindza ni Xalamuka! ti twarisaka rungula ra Bibele ra ntiyiso, loko hi hangalasa timagazini leti hi n’hweti ya May ku ta va ku ri ndlela yin’wana leyi hi ‘vulaka ntiyiso eka munhu-kulorhi’ ha yona.—Ef. 4:25.

² “Xalamuka!” ya May 8 yi fanele ku fambisiwa kukondza mphakelo wa n’wina wu hela. U nga ha sungula bulo hi ku vutisa u ku:

◼“Xana u yi vona njhani misava leyi nga riki na nyimpi? [Yimela nhlamulo.] Xana wa swi tiva leswaku vukhongeri bya misava entiyisweni byi hlohlotela tinyimpi ni ku dlayana? [Yimela nhlamulo.] Ku hambana ni sweswo, xiya leswi Bibele yi vulaka leswaku vagandzeri va Xikwembu va ntiyiso va ta swi endla.” Hlaya Esaya 2:2-4 ehenhla eka tluka 4 ra magazini, kutani u pfula eka tluka 10 u hlaya ndzimana yo sungula ehansi ka xihlokwana lexi nge “Ku Rhamba Varhandzi Va Ku Rhula.” Endzhaku ka sweswo u vutisa: “Xana wa swi tiva leswaku Xikwembu xi ta swi endla njhani sweswo? Nhlamulo yi kumeka eka magazini lowu. Ndzi ta tsakela ku ku siyela timagazini leti timbirhi hi munyikelo wa R2,00.”

³ Loko u fambisa “Xihondzo xo Rindza” xa May 15 ringeta ku kombetela eka swiendlakalo swa le mahungwini ya sweswinyana leswi endleke vanhu va titwa va nga sirhelelekanga, kutani u vutisa:

◼“Xana u anakanya leswaku ku ta laveka yini lexi nga ta hi endla hi titwa hi sirhelelekile evuton’wini lebyi? [Yimela nhlamulo.] Hi ku kongoma, xana i swinene ku tshembela leswaku vanhu va tlhantlha swiphiqo leswi vanhu va langutaneke na swona? [Yimela nhlamulo; kutani u hlaya Pisalema 146:3.] Mupisalema u tlhela a nyika xivangelo xa ku va ni ntshembo hi vumundzuku. [Hlaya Pisalema 146:5, 6.] Xihloko lexi nge, ‘Nsirhelelo Wa Xiviri—Sweswi Ni Hi Laha Ku Nga Heriki,’ xi hlamusela xivangelo xo va hi tshembela eka Yehovha Xikwembu leswaku a antswisa swiyimo emisaveni.” Fambisa timagazini timbirhi naswona u lunghiselela ku tlhela u vuya mi ta bula hi ndlela leyi swi kotekaka ha yona ku tiphina hi vutomi lebyi sirhelelekeke enkarhini wa sweswi.

⁴ Mhaka leyi nga exifunengetweni xa “Xalamuka!” ya June 8 yi ta tsakisa vanhu ensin’wini ya yindlu na yindlu ni ya mabindzu. U nga ha yi vulavulela hi ku vula leswi:

◼“Vavasati vo tala va vone xinghunghumani xo hlaseriwa hi tlhelo ra rimbewu emintirhweni. Xiyimo xi ya xi biha swinene lerova tihuvo ti sungule ku xupula lava hlaselaka ni ku rihela vahlaseriwa. Leswaku hi pfuna vanhu, hi humese xiviko lexi, lexi susaka mintsheketo leyi tolovelekeke ya mayelana ni mhaka leyi. Nakambe xi nyikela switsundzuxo leswi tirhaka eka vavasati ni le ka vavanuna mayelana ni ndlela leyi va nga tisirhelelaka ha yona leswaku va nga vi vahlaseriwa kumbe lava hlaselaka hi tlhelo ra rimbewu. Xana u nga tsakela ku hlaya nkandziyiso lowu wa magazini wa Xalamuka!? [Yimela nhlamulo.] Hi fambisa timagazini ta hina hi munyikelo wutsongo wa R2,00.”

⁵ Loko u hlawula xingheniso xo koma, u nga ha ringeta lexi:

◼“Vo tala va vona onge timagazini ta namuntlha leti rhandziwaka ngopfu ti kombisa ngopfu swixavisiwa, rimbewu, kumbe madzolonga. [N’wi kombe Xihondzo xo Rindza ni Xalamuka!] Hi hangalasa timagazini leti to tenga leti sekeriweke eBibeleni. Ta dyondzisa swinene naswona ti hi dyondzisa ku gandzela Xikwembu, ku rhandza vanhu-kulobye ni ku tikhoma kahle. Loko u tsakela muxaka lowu wa timagazini, ndza swi tiva leswaku u ta tiphina hi leswi u nga ta swi kuma eminkandziyisweni leyi.”

⁶ Loko hi hisekela ku vulavula ntiyiso eka vaakelani va hina, hi nga swi kota ku nyika lavo tala ntsako.—Mint. 8:4, 8.