Lavisisa Lava Faneriwaka Hi Vutomi
1 Xikongomelo xin’wana xa ntirho wo chumayela i ku kuma “lava hlawuleriweke vutomi lebyi nga heriki.” (Mint. 13:48) Ku hangalasiwa ka timagazini ta Xihondzo xo Rindza na Xalamuka! ku tikombe ku ri ndlela leyinene ngopfu yo chumayela, timagazini ta hina ti endla vanhu va xalamukela ntshembo wa Mfumo. Hi ta va hi fambisa timagazini hi April. Entiyisweni, laha hi kumaka ku tsakela kona, hi nga sungula tidyondzo letintshwa ta Bibele hi buku leyi nge Vutivi Lebyi Yisaka eVuton’wini Lebyi Nga Heriki. Hi leswi swiringanyeto swin’wana leswi u nga ha swi tirhisaka:
2 Loko u tirhisa “Xihondzo xo Rindza” xa April 1, u nga ha vulavulela xihloko lexi nge “Dzunisa Hosi Ya Minkarhi Ni Minkarhi!,” lexi humaka eka nkulumo ya le rivaleni ya ntsombano wa muganga wa n’wexemu, kutani u ku:
◼ “Vanhu vo tala lava hi vulavuleke na vona va pfumela eka Xikwembu. Van’wana swa va tikela ku pfumela eka xona. Xana u titwisa ku yini hi leswi? [Yimela nhlamulo.] Hi rhendzeriwe hi vumbhoni bya ntiyiso lebyi tiyisekisaka leswaku ku fanele ku ri ni Xikwembu. [Hlaya Pisalema 104:24.] Loko hi vona khamera kumbe khomphyuta, ha tiyiseka leswaku yi fanele yi endliwe hi mumaki la tlhariheke swinene. Xana swi ta va swi twala ku vula leswaku swilo leswi rharhanganeke swinene, swo tanihi misava na hina vanhu, swi lo tihundzukela?” Tirhisa ndzimana leyi nga exihlokweni leswaku u kombisa xivangelo lexi twalaka xo pfumela eka Xikwembu. Fambisa timagazini hi munyikelo lowu tolovelekeke.
3 “Xihondzo xo Rindza” xa April 15 xi na xihloko lexi nge “Lexi Endlaka Vugandzeri Bya Ntiyiso Byi Katekisiwa Hi Xikwembu.” U nga si xi kombisa, u nga ha vutisa:
◼ “Leswi ku nga ni madzana ya vukhongeri emisaveni, xana u anakanya leswaku hinkwabyo byi nga va byi amukeleka eka Xikwembu? [Yimela nhlamuselo.] Yesu u vhumbe leswaku kungakhathariseki leswi vanhu va vukhongeri byo tala va swi pfumelaka, lava va nga endliki ku rhandza ka Xikwembu a va nge amukeriwi. [Hlaya Matewu 7:21-23.] I swa nkoka leswaku hi tiva vukhongeri bya ntiyiso lebyi Yesu a vulavuleke ha byona.” Pfula eka xihloko lexi nge “Vukhongeri Bya Ntiyiso Byi Fanele Byi Humesa Mihandzu Yihi?,” lexi sungulaka eka tluka 16, kutani u bula hi xikombiso xin’we leswaku u humesa yinhla.
4 Loko u vulavulela nhloko-mhaka-nkulu ya “Xalamuka!” ya May 8, leyi nge “Loko Tinyimpi Ti Nga Ha Ri Kona,” u nga ha vula leswi:
◼ “Eka lembe-xidzana leri ku vile ni tinyimpi ta madzana, ku katsa ni tinyimpi timbirhi ta misava. Kambe kwalomu ka varhangeri hinkwavo va misava va vula leswaku va lava ku rhula. Hinkwavo lava ndzi va tivaka va vula leswi fanaka. Loko un’wana ni un’wana a lava ku rhula, ha yini va nga ku fikeleli? [Yimela nhlamulo.] Xana u anakanya leswaku ku laveka yini eka hina leswaku u vona ku rhula ka ntiyiso emisaveni?” Loko n’wini wa muti a hlamurile, pfula eka matluka 8 na 9 kutani u hlaya matsalwa yo tanihi Pisalema 46:8, 9. Hi ku tirhisa swifaniso ni matsalwa lama tshahiweke, kombisa ndlela leyi Mfumo wa Xikwembu wu nga ta tisa ku rhula loku nga ta va kona hi laha ku nga heriki. Kutani u fambisa magazini hi munyikelo lowu tolovelekeke naswona u endla malunghiselelo yo vuyela.
5 Loko u kuma vo tala lava va vulaka leswaku va khomekile, u nga ha ringeta leswi:
◼ “Hi tsakela ku pfuna vanhu lava va tshamaka va khomekile ni lava va kumaka nkarhi wuntsongo wo kambisisa timhaka ta swa moya evuton’wini. Timagazini ta hina, Xihondzo xo Rindza ni Xalamuka!, ti endleriwe ku nyikela rungula leri baka nhloko ya mhaka mayelana ni timhaka ta nkoka leti khumbaka wena ni ndyangu wa wena. Ndzi ta tsakela ku ku siyela tikopi leti leswaku u sala u ti hlaya.”
6 Tsundzuka ku nyika lava tekaka timagazini lunghelo ra ku va va endla xikhokhelo xa magazini wun’we kumbe hatimbirhi. Va ta pfuneka hakunene hi ku hlaya Xihondzo xo Rindza ni Xalamuka!, leti tisaka “timhaka le’ti ṭakisaka.”—Esa. 52:7.