Tekelelani Ripfumelo Ra Vona

¹ Muapostola Pawulo u hlamusela ripfumelo ri ri “ku tshemba loku tiyeke ehenhla ka swilo leswi languteriwaka, ni ku kholwa swinene hi tlhelo ra swilo leswi nga voniwiki.” U engetele hi ku vula leswaku “ehandle ka ku pfumela a swi endleki ku tsakisa Xikwembu.” (Hev. 11:1, 6) Pawulo u hi khutaze leswaku hi va ni ripfumelo, hi khapa hi rona naswona hi ri phikelela.—2 Kor. 4:13; Kol. 2:7; 2 Tim. 2:22.

² Ku ni swikombiso swo tala leswi xiyekaka swa ripfumelo leswi hlamuseriweke eBibeleni. Eka Vaheveru ndzima 11, Pawulo u nyika nxaxamelo wo leha wa timbhoni leti kombiseke ripfumelo leri tiyeke swinene. Eka nxaxamelo lowu ku na Avele, loyi a a ri wo sungula ku dlawela ripfumelo ra yena. Nowa u le nxaxamelweni hikuva hi ripfumelo ra yena u kombise ku chava Xikwembu loku a ku laveka leswaku a ponisa va yindlu yakwe. Abrahama u bumabumeriwa hikwalaho ka ripfumelo ni ku yingisa kakwe. Muxe wa bumabumeriwa hikwalaho ka ripfumelo rakwe u tshame a tiyile onge hi loko a vona Loyi a nga vonakiki. Swikombiso a swi tele ngopfu lerova Pawulo a vula leswaku nkarhi a wu ta n’wi helela loko a ya emahlweni a hlamusela hinkwaswo ka swona. Mawaku nkateko lowu hi nga na wona wa ku va ripfumelo ra hina ri tiyisiwa hi ku hlaya ta “vutomi [bya vona] lebyo hlawuleka bya vukhongeri”!—2 Pet. 3:11.

³ Eka lembe-xidzana ro sungula, Yesu u tlakuse xivutiso: “Loko N’wana-wa-Munhu a ta, xana ú ta kuma ku pfumela ku ri kona emisaveni xana?” (Lk. 18:8) Kutani ke, xana hi na swona swikombiso swa ripfumelo exikarhi ka hina namuntlha? Xana hi vona vavanuna ni vavasati, vana ni lavakulu, va kombisa ripfumelo leri nga tsekatsekiki eka Yehovha hilaha a swi ri ha kona hi vanhu va Xikwembu eminkarhini ya Bibele?

⁴ Swikombiso Swa Manguva Lawa Swa Ripfumelo: Swikombiso leswi xiyekaka swa ripfumelo swa kumeka hinkwako laha hi nga kona! Ripfumelo ra valanguteri lava rhangelaka exikarhi ka hina ri faneriwa hi ku tekeleriwa. (Hev. 13:7) Kambe leswi a hi swona ntsena swikombiso swa ripfumelo. Eka vandlha rin’wana ni rin’wana ku ni lava tshembekaka lava nga ni rhekhodo yo leha ya ntirho wo tshembeka eka Yehovha, hakanyingi ku tshembeka loku kombisiweke ehansi ka swiyimo swo nonon’hwa swinene.

⁵ Hi fanele hi ndhundhuzela vamakwerhu va xisati lavo tshembeka, lava hi malembe yo tala, va tiyiseleke ku kanetiwa hi vanuna va vona. Vatswari lava nga voxe va langutane ni ntlhontlho wo kurisa vana va ri voxe. Ku ni tinoni leti dyuhaleke exikarhi ka hina leti nga xwiki emintirhweni ya vandlha hambiloko ti nga ri na ndyangu lowu ti khutazaka. (Ringanisa Luka 2:37.) Hi hlamarisiwa hi ripfumelo ra lava va tiyiselaka swiphiqo leswi hambetaka swa rihanyo. Vo tala va hambeta va tirha hi ku tshembeka hambiloko va ri ni swiphiqo leswi va sivelaka leswaku va averiwa malunghelo lama engetelekeke ya ntirho. Ku ni Timbhoni letitsongo leti kombiseke ripfumelo hi xivindzi ku nga khathariseki nkaneto wa le xikolweni. Ku tinyiketela ka hina eka Xikwembu ku ya ku tiya loko hi ri karhi hi xiya ripfumelo ra maphayona lama tiyiselaka swiphiqo swo tala lembe na lembe. Ku fana na Pawulo, nkarhi wu nga hi helela loko hi ringeta ku hlamusela mintokoto hinkwayo ya ntirho wa Mfumo ni mintirho ya ripfumelo leyi endliweke hi vamakwerhu lava va xinuna ni va xisati!

⁶ Swikombiso leswi swa lava nga ni ripfumelo swa hi chavelela naswona swa hi khutaza. (1 Tes. 3:7, 8) Hi endla kahle loko hi tekelela ripfumelo ra vona hikuva “la’v̌a endlaka ŝinene v̌a ṅwi ṭakisa [Yehovha].”—Swiv. 12:22.