Va Pfuneni Leswaku Va Tlhelela Evutirhelini
1 Hi ku tiva khombo ra moya leri nga vaka kona eka Vakreste-kulobye, muapostola Pawulo u tsarile: “Hi wona nkarhi wa n’wina wa ku pfuka evurhongweni; hikuva namuntlha ku ponisiwa ku kusuhi ku tlula siku hi pfumeleke.” (Rhom. 13:11) Pawulo a a karhateka hi vamakwavo lava va khudzeheleke hi tlhelo ra moya; a a tikarhatela ku va pfuxa leswaku va tlhelela evutirhelini.
2 Entiyisweni ku nga vuriwa leswaku vusiku bya misava leyi ya khale byi le kusuhi ni ku hundza naswona mixo wa misava leyintshwa wu le kusuhi. (Rhom. 13:12) Hi ni xivangelo lexinene xo khumbeka hi vamakwerhu lava tshikeke ku hlanganyela na hina tanihi vachumayeri va mahungu lamanene. Eka lembe ra ntirho leri nga hundza, eAfrika Dzonga ntsena, vahuweleri vo tlula 1300 va tlhelele evutirhelini. Xana hi nga va pfuna njhani van’wana lava holeke leswaku va tlhela va tirhela Yehovha?
3 Leswi Vakulu Va Nga Swi Endlaka: Vunyingi bya lava holeke a byi wu fularhelanga ntiyiso; kambe byi lo tshika ku chumayela hikwalaho ka ku hetiwa matimba, swiphiqo swa munhu hi xiyexe, ku rhandza swilo leswi vonakaka, kumbe swivilelo swin’wana swa vutomi. (Lk. 21:34-36) Loko swi koteka, swi antswa ngopfu ku va pfuna va nga si hola. Matsalana wa vandlha u fanela a tivisa mufambisi wa Dyondzo ya Buku ya Vandlha loko muhuweleri a nga viki ntirho wa yena nkarhi na nkarhi. Ku nga endliwa malunghiselelo ya riendzo ra vurisi. Va fanele va ringeta ku tiva xivangelo lexi nga xona xi vangelaka xiphiqo ni ndlela leyi mpfuno wu nga nyikeriwaka ha yona.—Vona Xihondzo xo Rindza xa September 15, 1993, matluka 20-3.
4 Ndlela Leyi Van’wana Va Nga Pfunaka Ha Yona: Vo tala va hina hi tiva munhu loyi a nga hola. Ku nga ha va ku ri munhu loyi a tolovelane ngopfu na hina enkarhini lowu nga hundza. I yini lexi hi nga xi endlaka leswaku hi n’wi pfuna? Hi nga hundza hi n’wi pfuxela. Hi n’wi byela leswaku ha n’wi tsundzuka. N’wi tsakeleni naswona mi vulavula leswi akaka. Phofulani ku khumbeka ka n’wina hi yena handle ko boxa leswaku yena wa vabya emoyeni. N’wi runguleleni mintokoto leyi akaka kumbe timhaka tin’wana letinene leti hetisisiweke hi vandlha. N’wi byeleni hi Ntsombano wa Muganga wa “Varhumiwa Va Ku Rhula Ka Xikwembu” hi ku hiseka lowu nga ta va kona eku heleni ka lembe, kutani mi n’wi khutaza ku va kona. Ku tlhela a hlanganyela na vandlha swi ta n’wi pfuna ngopfu ku tlula nchumu wihi na wihi. N’wi byeleni leswaku mi nga famba na yena eminhlanganweni. Tivisani vakulu hi n’wangulo wa yena.
5 Loko munhu loyi a holeke a tlhela a va kona eminhlanganweni, a nga ha titwa a nga ntshuxekanga loko a hlangana na van’wana lava a tivaneke na vona enkarhini lowu nga hundza. Mi nga vutisi leswaku, “A wa ha ri kwihi?” Ematshan’wini ya sweswo, n’wi endleni a titwa a amukelekile. N’wi ngheniseni emabulwini ya n’wina. N’wi tiviseni eka lava a nga va tiviki. Tshamani na yena hi nkarhi wa minhlangano, tiyisekani leswaku u ni buku ya tinsimu ni tibuku leti dyondziwaka. N’wi khutazeni leswaku a tlhela a vuya, naswona mi n’wi byela leswaku mi ta n’wi pfuna loko a lava swo karhi.
6 Loko hi ri ni rirhandzu leri kufumelaka eka lava hambukeke, Yehovha na Yesu va tsaka loko munhu wo tano a hlakarhela emoyeni. (Mal. 3:7; Mt. 18:12-14) Hi nga va ni ntsako lowu fanaka na wolowo loko hi humelela eku pfuneni van’wana leswaku va tlhela va tirhela Yehovha.