Bokisi Ra Swivutiso

◼ Xana swi fanerile ku fambisa dyondzo ya Bibele ya le kaya ni makwerhu wa xinuna kumbe wa xisati la tsaneke loko u komberiwa ku endla tano hi xin’wana xa swirho swa Komiti ya Ntirho ya Vandlha?

Vakulu va ni vutihlamuleri bya ku risa vandlha, ku katsa ni swirho hinkwaswo leswi tsaneke. Va endzela vanhu volavo, kutani va vona ndlela leyi va nga va pfunaka ha yona. Loko swi fanela, leswi swi nga katsa ku fambisela munhu yoloye a tsaneke dyondzo ya Bibele leswaku a pfuneka. Buku leyi nge Ku Hleleriwa Ku Hetisisa Vutirheli Bya Hina, eka tluka 103, yi hlamusela leswaku Komiti ya Ntirho ya Vandlha hi yona yi nga ta endla xiboho malunghana ni vanhu lava nga pfunekaka hi lunghiselelo leri.

Mulanguteri wa ntirho hi yena a hlawulaka loyi a nga pfunaka emhakeni leyi, swihloko leswi nga hlayiwaka ni buku leyi nga pfunaka ngopfu. Kumbexana munhu la n’wi hlayeleke eku sunguleni kumbe un’wana loyi a n’wi tivaka ni ku n’wi xixima hi yena a nga pfunaka kahle. Makwerhu wa xisati la nga ni vuswikoti kumbe la wupfeke a nga ha komberiwa ku pfuna makwerhu wa xisati la tsaneke. Hakanyingi, a swi bohi leswaku loyi a averiweke ku ya fambisa dyondzo leyi a famba ni muhuweleri un’wana. Loko muhuweleri a averiwe ku fambisa dyondzo, a nga ha vika nkarhi wolowo, maendzo yo vuyela ku katsa ni dyondzo.—Vona Vutirheli Bya Hina Bya Mfumo bya November 1987, matluka 1-2.

Tanihi leswi xichudeni lexi xi khuvuriweke, dyondzo leyi a yi fanelanga yi teka nkarhi wo leha ngopfu. Pakani ya hina i ku pfuna munhu la tsaneke leswaku a tlhela a sungula ku va kona eminhlanganweni hinkwayo ya vandlha ni ku va muhuweleri wa nkarhi hinkwawo wa mahungu lamanene. Mulanguteri wa ntirho u ta kambela nhluvuko wa tidyondzo to tano. Vuyelo bya mpfuno lowu wa rirhandzu byi fanele byi va bya leswaku vamakwerhu lava va swi kota ku byarha vutihlamuleri bya vona emahlweni ka Yehovha naswona va “dzima timitsu” va tiya entiyisweni.—Efe. 3:17; Gal. 6:5.