Bokisi Ra Swivutiso

◼ Xana munhu loyi a heteke nkarhi wo leha a horile a nga pfuniwa njhani leswaku a tlhela a fanelekela ku va muhuweleri wa mahungu lamanene?

Swa tsakisa loko munhu loyi a holeke a kombisa leswaku u navela ku tirhela Yehovha hi mbilu hinkwayo. (Luka 15:4-6) Swi nga ha endleka leswaku munhu yoloye u pfumelele nkaneto kumbe mintshikilelo ya vutomi yi n’wi tsona nkarhi wa dyondzo ya munhu hi xiyexe, ku va kona eminhlanganweni ni ku hlanganyela entirhweni wa nsimu. Xana a nga pfuniwa njhani hi ku kongoma leswaku a kota ku endla nhluvuko wa moya?

Hinkwerhu hi fanele ku teka goza ra ku n’wi tiyisekisa hi rirhandzu ra hina ra xiviri ra Vukreste. Vakulu va ta hatla va kambela ndlela leyi a nga pfuniwaka ha yona hi ku kongoma hi tlhelo ra moya. (Yak. 5:14, 15) Loko a nga holanga nkarhi wo leha, a nga pfuniwa hi muhuweleri la nga ni ntokoto leswaku a tlhela a hisekela ntirho wa nsimu. Kambe, loko ku ri leswaku se ku hundze nkarhi wo leha munhu yoloye a nga ha hlanganyeli ni vandlha, u ta lava mpfuno lowu engetelekeke. Swi nga va swinene leswaku a fambiseriwa dyondzo ya Bibele hi buku leyi faneleke, leswaku a ta aka ripfumelo ni ku twisisa ka yena. Loko swi ri tano, mulanguteri wa ntirho u ta lunghiselela leswaku muhuweleri la fanelekaka a fambisa dyondzo yoleyo. (Hev. 5:12-14; vona Bokisi Ra Swivutiso eka Vutirheli Bya Hina Bya Mfumo bya November 1998.) Loko u tiva munhu wo karhi la lavaka mpfuno wo tona, vulavula ni mulanguteri wa ntirho evandlheni ra ka n’wina.

Loko mi nga si rhamba munhu loyi ku nga khale a horile leswaku a tlhela a hlanganyela evutirhelini, swi nga va swinene leswaku vakulu vambirhi va hlangana na yena ku vona loko a faneleka ku va muhuweleri wa Mfumo. Va ta landzela endlelo leri fanaka ni leri endliwaka loko ku hlanganiwa ni vanhu lava ha ku sungulaka ku hlanganyela, lava lavaka ku fanelekela ku va vahuweleri va mahungu lamanene. (Vona Xihondzo xo Rindza xa November 15, 1988, tluka 17.) Munhu la holeke u fanele a va ni ku navela ka xiviri ka ku avelana mahungu lamanene ni van’wana. Nakambe u fanele ku fikelela swilaveko swa xisekelo leswi xaxametiweke eka matluka 98-9 ya buku leyi nge Vutirheli Bya Hina naswona u fanele ku va kona eminhlanganweni ya vandlha minkarhi hinkwayo.

Loko munhu la sungulaka ku hlanganyela nakambe a va ni xiyimiso lexinene xa swilo swa moya, xi ta n’wi pfuna ngopfu leswaku a tiyisa vuxaka lebyinene na Yehovha ni ku hambeta a famba endleleni leyi yisaka evuton’wini lebyi nga heriki. (Mat. 7:14; Hev. 10:23-25) Ku endla ka yena “matshalatshala hinkwawo” ni ku hlakulela timfanelo ta Vukreste leti tshamaka hi masiku swi ta n’wi sivela ku tlhela a va la ‘tsaneke kumbe la nga vekiki mihandzu’ tanihi leswi a nga mudyondzisiwa la nga Mukreste.—2 Pet. 1:5-8.