Mi Nga Va Rivali Lava Holeke eMoyeni
1. Ha yini hi fanele hi khutaza vanhu lava holeke emoyeni?
1 Xana u kona munhu loyi u n’wi toloveleke loyi a holeke emoyeni? Kumbexana se u tshike ku hlanganyela ni vandlha naswona u khukhulekile. U nga ha va u hlangane ni munhu wo tano loko u ri karhi u chumayela hi yindlu ni yindlu. Hi nga rivali leswaku munhu la holeke emoyeni wa ha ri makwerhu wa moya. Hi lava ku n’wi tiyisekisa leswaku ha n’wi rhandza ni ku n’wi pfuna leswaku a tlhelela evandlheni ni le ka ‘murisi ni mulanguteri wa mimoya-xiviri ya hina.’—1 Pet. 2:25.
2. Xana hi nga n’wi khutaza njhani la holeke emoyeni?
2 Kombisa Leswaku Wa N’wi Tsakela: Munhu la holeke emoyeni, loko hi n’wi bela riqingho kumbe hi n’wi endzela swi nga ha n’wi tiyisekisa leswaku a hi n’wi rivalanga. Xana hi nga n’wi byela yini? Hi nga ha n’wi khutaza hi ku n’wi byela leswaku ha n’wi tsundzuka. Hi vulavula hi timhaka to tsakisa ni leti akaka. (Filp. 4:8) Hi nga ha n’wi byela yinhla leyi hi yi tsakeleke eminhlanganweni sweswinyana. Hi nga ha n’wi rhamba eka nhlangano lowu landzelaka evandlheni kumbe enhlengeletanweni hi tlhela hi n’wi byela leswaku hi ta n’wi vekela ndhawu kumbe ku n’wi lunghiselela xo famba ha xona.
3. Xana makwerhu un’wana wa xisati u pfuxiwe njhani hi tlhelo ra moya?
3 Makwerhu wa xisati loyi ku hundzeke malembe yo tlula 20 a horile u kumeke loko ku ri karhi ku tirhiwa nsimu. Hambileswi a a nga lavi dyondzo ya Bibele, makwerhu wa xisati loyi a n’wi endzeleke u hambete a n’wi yisela timagazini letintshwa. Endzhaku ka ntsombano wa muganga, muhuweleri u rungulele makwerhu la holeke tinhla-nkulu ta ntsombano, hiloko a hetelela a pfukile hi tlhelo ra moya.
4. Xana hi fanele hi n’wi khoma njhani makwerhu loyi a a horile kambe se a sunguleke ku ta eminhlanganweni?
4 Loko Makwerhu La Holeke A Tlhela A Sungula Ku Hlanganyela: Loko makwerhu a tlhela a sungula ku ta eminhlanganweni, xana hi fanele hi n’wi khoma njhani? Xana Yesu u va khome njhani vadyondzisiwa va yena endzhaku ka loko va n’wi lahlile swa nkarhinyana? U va vule “vamakwavo” a tlhela a kombisa leswaku wa va tshemba. U pfange no va nyika ntirho wa nkoka. (Mat. 28:10, 18, 19) Endzhakunyana ka sweswo, se a va khomekile hi ku twarisa mahungu lamanene “va nga rhuteli.”—Mint. 5:42.
5. Boxa swiyimo leswi eka swona hi faneleke hi byela vakulu malunghana ni makwerhu la holeke emoyeni.
5 Loko hi nga si byela makwerhu la holeke emoyeni nkarhi wo leha hi ta ku n’wi fambisela dyondzo ya Bibele kumbe hi nga si n’wi rhamba ku ya ensin’wini, hi fanele hi lava nkongomiso eka vakulu. Loko hi ri ensin’wini kutani hi hlangana ni muhuweleri la holeke emoyeni, hi fanele hi byela vakulu leswaku va ta n’wi pfuna hilaha swi faneleke hakona.
6. Hi wihi ntsako lowu hi nga ta va na wona loko hi pfuna lava holeke emoyeni?
6 Hilaha Bibele yi swi andlalaka hakona erivaleni, lava nga ta ponisiwa hi lava va tsutsumaka ku ya fika emakumu ntsena. (Mat. 24:13) Hikwalaho, xiyani lava khunguvanyisiweke kumbe lava fularheleke minhlangano. Loko hi lehisa mbilu hi va hi kombisa rirhandzu ra Yehovha hi ku tsakela vanhu volavo hi mbilu hinkwayo, naswona hi ta tsaka ngopfu loko hi va vona va tlhela va tirha ntirho wo kwetsima swin’we na hina.—Luka 15:4-10.