Ku Hetisisa Xihlambanyo Xa Hina Siku Na Siku

¹ Mupisalema Davhida u susumeteleke ku byela Yehovha a ku: “Hi laha nḍi nga ta ḍunisa v̌ito ra wena hi masiku, nḍi hetisa ku hlambanya ka mina e siku riṅwana ni riṅwana.” (Ps. 61:8) Davhida a a swi tiva leswaku ku endla swihlambanyo i mhaka yo tirhandzela hilaha ku heleleke. Hambiswiritano, u tlhele a tiva leswaku loko a endla xihlambanyo, a a boheka ku xi hetisisa. Nilokoswiritano, u dzunise Yehovha hikwalaho ka lunghelo ro hetisisa swihlambanyo swa yena siku na siku.

² Loko hi tinyiketela eka Yehovha, hi hlambanye hi ku tirhandzela leswaku hi ta endla ku rhandza ka yena. Hi titshikile hi endla ku tirhela Yehovha ku va ku navela ka hina ko sungula evuton’wini. (Lk. 9:23) Hikwalaho, na hina hi fanele hi hetisisa xihlambanyo xa hina siku na siku. (Ekl. 5:4-6) Ku tinyiketela ka hina erivaleni loku kombisiweke hi nkhuvulo wa mati ku fanele ku kombisiwa hi leswi hi swi endlaka evuton’wini bya hina, tanihi leswi hi swi tivaka leswaku hi ‘ku vula hi nomu, sweswo swi hi endla lava ponisiwaka.’ (Rhom. 10:10) Leswi swi katsa ku chumayela mahungu lamanene. (Hev. 13:15) Swiyimo swa vanhu swi hambana ngopfu kambe siku na siku hinkwerhu ka hina hi nga tshama hi yise nyingiso eka nkoka wa ku avelana mahungu lamanene ni van’wana.

³ Endla Minkarhi Yo Chumayela Siku Na Siku: Ku byela munhu un’wana mahungu lamanene i ntokoto lowu tsakisaka. Leswaku hi endla leswi siku na siku, hi fanele hi endla minkarhi yo chumayela nkarhi wihi na wihi lowu swiyimo swa hina swi hi pfumelelaka eka wona. Lava va sunguleke ku nyikela vumbhoni hi xitshuketa eka vanhu lava tirhaka na vona kumbe eswikolweni ni le ka vaakelani kumbe van’wana lava hlanganaka na vona siku na siku va tiphinile hi mintokoto yo tala leyi tsakisaka. Hambi ku ri ku tsala mapapila kumbe ku tirhisa riqingho ku nga va ndlela yo nyikela vumbhoni eka van’wana. Ku tirhisa tindlela leti hinkwato kun’we ni ku vekela nkarhi etlhelo nkarhi na nkarhi leswaku hi vula vumbhoni hi yindlu na yindlu ni ku endla maendzo yo vuyela swi nga hi tisela ntsako wo hlawuleka lowu vangiwaka hi ku fambisa tidyondzo ta le kaya ta Bibele. Ina, siku na siku hi nga swi kota ku endla minkarhi yo chumayela.

⁴ Makwerhu wa xisati u sungule ku hlaya Ku Kambisisa Matsalwa Siku Na Siku hi nkarhi wo wisa entirhweni. U rhambe mutirhi-kulobye leswaku va ta hlaya tsalwa ra siku swin’we, xikan’we-kan’we sweswo swi yise eka dyondzo ya Bibele ni wansati luyani. Va dyondze hafu ya awara siku na siku, ka ntlhanu hi vhiki. Mutirhi-kulobye un’wana u xiye dyondzo ya vona ya siku na siku. Eku heteleleni u vule leswaku yena i makwerhu wa xinuna la holeke. Hi ku susumetiwa hi ku hiseka ka makwerhu loyi wa xisati, u kombele nkulu leswaku a ta n’wi pfuna. Makwerhu loyi wa xisati u khumbe vutomi bya vanhu van’wana vambirhi hi ndlela leyinene hikwalaho ko landzelela leswaku a hetisisa xihlambanyo xakwe siku na siku.

⁵ Loko hi susumetiwa hi mbilu leyi teleke hi ku tlangela swilo hinkwaswo leswinene leswi Yehovha a hi endleleke swona, ku hetisisa xihlambanyo xa hina xo tinyiketela hilaha hi nga swi kotaka ha kona siku na siku swi ta hi tisela ntsako ni ku eneriseka. Ku fana na mupisalema, hi nga vula hi ku: “Nḍi ta ku ḍunisa hi mbilu hikwayo ya mina, wee Hosi, Šikwembu ša nga!”—Ps. 86:12.