Swivutiso Swa Vahlayi

◼ Xana munhu loyi a nyikelaka vutomi byakwe eka Yehova Xikwembu a nga va a tiyisile loko a ku i ku hlambanya?

Vanhu lava va rhandzaka Xikwembu xa ntiyiso ni lava va tiyimiseleke ku xi tirhela hi laha ku heleleke va fanele ku nyikela vutomi bya vona eka Yehova ivi va khuvuriwa. Hambi leswi Bibele yi nga tirhisiki rito ku “hlambanya” mayelana ni ku tinyiketa ka Vukriste, ku endla tano a swi vonaki swi nga twali.

Aid to Bible Understanding yi hlamusela leswaku ku ya hi Matsalwa ku hlambanya i “xitshembiso xa xichavo xo endla xiendlo xo karhi, ku endla magandzelo kumbe nyiko, kumbe ku nghenela ntirho kumbe xiyimo; xiboho, lexinene kumbe xo biha.” Ku hlambanya kun’wana ka rhekhodo ya Bibele ku katse xiboho xo landza ndlela yo karhi loko ro sungula Xikwembu xi endle nchumu wun’wana. Hi xikombiso, Tinhlayo 21:2 ya hlamusela: “Israel a hlambanya eka Yehova, a ku: Loko u neha tiko leri e mav̌okweni ya mina, nḍi ta lov̌isa miti ya wena, nḍi yi herisa.” (Genesa 28:20-22; Vaavanyisi 11:30-39) Ku nyikeriwa ka vutomi bya Mukriste eka Xikwembu hakunene a hi xiyimo xo tano xa ku hlambanya loku bohaka. Kahle-kahle a nga ri: ‘Loko wena, Yehova, u ndzi tsakisa ni ku ndzi tshamisekisa sweswi ni ku ndzi tshembisa vutomi lebyi nga heriki emafambiselweni lamantshwa ya swilo, ndzi tshembisa ku ku tirhela vutomi bya mina hinkwabyo.’

Bibele yi nyikela ku hlambanya kun’wana tanihi loku nga laviwangiki ni loku nga komberiwangiki. Wilson’s Old Testament Word Studies yi vula leswi hi rito ra Xiheveru leri katsekaka: “[na·daŕ] ku hlambanya, hil. ku tshembisa hi ku tirhandzela ku nyika kumbe ku endla xanchumu; mianakanyo yo sungula hi leyi yo vekela etlhelo.” Kutani hi ku tirhandzela munhu u endla ku hlambanya eka Xikwembu. Xisweswo xana ku nga anakanyiwa leswaku ku va ka munhu la tinyiketeke, mudyondzisiwa la khuvuriweke wa Yesu a swi nge endli ku hlambanya hikuva sweswi Xikwembu xi lava ku tinyiketa ka hinkwavo lava lavaka ku amukeriwa hi xona ke?a

Hambi swi ri tano, mhaka ya leswaku Yehova u na swilaveko swo karhi leswaku munhu a ta kota ku va nakulobye wakwe a swi vuli leswaku ku hava nhlawulo wa munhu hi xiyexe lowu katsekaka. Muxe u byele Vaisrayele a ku: “Nḍi v̌ekile mahlweni ka wena e v̌utomi ni rifu, e ku kateka ni ku rukana; hlawula v̌utomi leŝaku u hanya, wena ni v̌atukulu v̌a wena.” (Deuteronoma 30:19, 20; Psalma 15:1-5; ringanisa Yoxuwa 24:15; 1 Tihosi 18:21.) Tsundzuka marito ya Yesu: “Tanani ka mina, n’wina hinkwenu lava karhaleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’wina yi ta kuma ku wisa.” (Matewu 11:28, 29) Xana xexo i xilaveko xa tihanyi, ku sindzisa? Kumbe i xirhambo lexi pfumelelaka xiendlo xo tirhandzela?

Yesu u velekiwe eka rixaka leri tinyiketeke eka Xikwembu; timhaka to tala ta vutomi na rifu ra yena ti tshame ti vikiwile evuprofetweni; kutani Xikwembu xi lunghiselele miri wa Yesu ku va gandzelo. Kambe, mianakanyo ya Kriste yo tirhandzela loko a titisela ntirho wo hlawuleka yi kombisiwile emaritweni yakwe: “Kutani ndzi te: ‘Vona, ndzi tile hi laha swi nga tsariwa ha kona ehenhla ka mina, ebukwini ya Nawu ku ta endla ku rhandza ka wena, oho Xikwembu!’” (Vaheveru 10:5-10) Hi ndlela leyi fanaka, munhu un’wana ni un’wana u fanele ku tiyimisela hi yexe ku va Mukriste la tinyiketeke, la khuvuriweke.

Nakambe, Vakriste namuntlha va twisisa leswaku ku tirhisiwa koloko ka rito ro tanihi ku “hlambanya” a ku heleli endleleni leyi ku tirheke ha yona eBibeleni. Timbhoni ta Yehova i khale ti ri karhi ti tirhisa ku “hlambanya ka vukati” emicatweni leyi tiyisiwaka eTiholweni ta vona ta Mfumo.b Leswi swi pfumelelana ni nhlamuselo ya khale ya ku “hlambanya,” tanihi le nhlamuselweni leyi: “xitshembiso lexi tiyeke kumbe ku tiboha, ngopfu-ngopfu hi xivumbeko xa xihlambanyiso eka Xikwembu.”—Oxford American Dictionary, 1980, tluka 778.

Hikwalaho, a swi vonaki swi fanele ku hika ku tirhisa ka rito ku “hlambanya.” Munhu loyi a bohaka kungu ro tirhela Xikwembu a nga ha vonaka onge, eka yena, ku tinyiketa kakwe loku heleleke ku vula ku hlambanya ka munhu hi xiyexe—ku hlambanya ka ku tinyiketa. U ‘tshembisa hi ku tiya kumbe a tiboha ku endla xanchumu,’ leswi ku hlambanya ku nga swona. Emhakeni leyi, i ku tirhisa vutomi byakwe leswaku a tirhela Yehova, a endla ku rhandza ka Yena hi ku tshembeka. Munhu wo tano u fanele a khumbeka swinene-nene hi leswi. Ku fanele ku va tanihi loku nga ni mupisalema, loyi, loko a kombetela eka swilo leswi a swi hlambanyeke, a nga te: “Nḍi ta tlangela Yehova hi yini? Mikateko hikwayo ya yena yi le henhla ka mina. Nḍi ta t1akusa nḍeko wa šilamulelo, kutani nḍi ta khongela v̌ito ra Yehova. Nḍi ta tira ku hlambanya ka mina eka Yehova.”—Psalma 116:12-14; nakambe vona Psalma 50:14.

[Tinhlamuselo ta le hansi]