Bokisi Ra Swivutiso

◼ Xana ku fanele ku endliwa yini loko xivulavuri lexi averiweke nkulumo ya le rivaleni xi tsandzeka ku fika hi nkarhi eminhlanganweni?

Nkarhi wun’wana, swiyimo leswi nga papalatekiki swi ta sivela makwerhu ku fika hi nkarhi leswaku a ta nyikela nkulumo yakwe. Loko va tshemba leswaku u ta fika ku nga ri khale, vakulu va nga ha kunguhata ku ya emahlweni ni Dyondzo ya Xihondzo xo Rindza; Nkulumo ya le Rivaleni yi nga ha landzela endzhaku. Ku vuriwa yini loko swi ri erivaleni leswaku xivulavuri a xi nge fiki? Kumbexana un’wana wa swivulavuri swa kwala vandlheni a nga nyikela nkulumo yihi na yihi leyi ana se a yi lunghiseleleke.

Ku kunguhata kahle ka ha ri ni nkarhi hakanyingi swi endla leswaku xiphiqo lexi xi nga vi kona. Mulanguteri wa tinkulumo ta le rivaleni u fanele a vonana ni xivulavuri xin’wana ni xin’wana ka ha sele vhiki a xi tsundzuxa hi xiavelo xa xona. Xitsundzuxo xi fanele xi katsa nkarhi wa minhlangano, ndhawu ya Holo ya Mfumo ni nomboro ya riqingho kun’we ni ku xi komba ndlela ya ku ya eholweni hi ndlela leyi twisisekaka. Xivulavuri xi fanele xi tsala vuxokoxoko lebyi hi vukheta. Xi fanele xi teka xiavelo xa xona xi ri xa nkoka, xi endla mindzulamiso yihi na yihi etimhakeni ta munhu hi xiyexe leswaku xi ta hetisisa vutihlamuleri lebyi. Loko ku humelela swilo leswi nga papalatekiki leswi nga ta n’wi sivela ku ta nyikela nkulumo, u fanele a vonana ni mulanguteri wa tinkulumo ta le rivaleni hi xihatla leswaku ku ta endliwa malunghiselelo yo n’wi siva. Xivulavuri xi fanele xi tikarhata swinene leswaku xi nga tivisi se nkarhi wu nga ha ri kona leswaku xi ta tsandzeka ku ta. Loko xivulavuri xi hlwela naswona xi ta fika nkarhi se wu hundzile, xi fanele xi ba riqingho ri ya eHolweni ya Mfumo leswaku vamakwerhu va ta vona lexi va nga xi endlaka.

Ku tlangela swiavelo swa nkulumo ya le rivaleni, ku kunguhata ka ha ri na nkarhi ni switsundzuxo ni vulanguteri lebyi nga ni vurhon’wana swi nga endla leswaku vandlha ri vuyeriwa swinene hi tinkulumo ta le rivaleni leti nyikeriwaka vhiki na vhiki.