Minyikelo Leyi Seketelaka Ku Ndlandlamuxiwa Ka Ntirho Wa Sosayiti Wa Misava Hinkwayo

Hilaha swi vhumbiweke hakona eka Esaya 54:2, 3, vugandzeri bya Yehovha lebyi tengeke byi hambeta byi ndlandlamuka emisaveni hinkwayo. Leswi swi tano ematikweni yo hambana-hambana etiko-nkulu ra Afrika ni le swihlaleni leswi nga ekusuhi. Emalembeni ya khume lama hundzeke, ku yirisiwa ka ntirho wa Mfumo ku herisiwile etindhawini to tanihi Angola, Cameroon, Equatorial Guinea, Etiyopiya, Madagascar, Malawi, Mozambhiki na Togo. Ematikweni lawa ni man’wana laha masimu a ma lunghekele ntshovelo, varhumiwa va Gilead, mathwasana ya Xikolo xa Ndzetelo wa Vutirheli, swirho swa ndyangu wa Bethele ni van’wana va amukele swiavelo swa vona.—Mt. 9:37, 38.

Handle ko kanakana, ku andza ka vagandzeri va ntiyiso enhlengeletanweni ya Yehovha swi lava ku akiwa ka madzana ya Tiholo ta Mfumo letintshwa. Nakambe a swi fanerile ku kunguhata ku akiwa ka Tiholo ta Nhlengeletano ni ku ndlandlamuxa miako ya marhavi hambi ku ri ku akiwa ka lamantshwa. Ku hakelela mintirho leyi kun’we ni ku yisa ntirho wa Mfumo emahlweni ku nga ri laha Afrika ntsena kambe ni le swiphen’wini swin’wana swa misava swi endle leswaku ku tirhisiwa minyikelo yo tala ya Sosayiti entirhweni lowu wa misava hinkwayo.

Swifaniso leswi ni mimpfampfarhuto leyi nga eka matluka lawa mambirhi ya xiengetelo lexi swi ku nyika xivono xa leswi Sosayiti a yi ri karhi yi tikarhatela ku swi hetisisa ensin’wini ya Vantima. Leswi kombisiweke hi yin’wana ya mintirho yo aka leyi nga eku endliweni ni yin’wana leyi nga ta sunguriwa ku nga ri khale. Rhavi ra le Afrika Dzonga hi ku hiseka a ri ri karhi ri hoxa xandla swinene eka yo tala ya mintirho leyi ematikweni ya le kusuhi na rona.

Loko u languta chati ya ntirho wa nsimu eka 1996 Yearbook, u nga swi vona kahle leswi endliwaka hi vahuweleri evutirhelini ematikweni lawa. Ku andza loku xiyekaka ku ve kona ematikweni yo tala, naswona ku andza lokukulu ku vonaka eka nhlayo leyi nga tolovelekangiki ya lava vaka kona eXitsundzuxweni. Loko hi tsundzuka leswi hetisisiwaka tanihi xiphemu xa ntirho wa ku chumayeriwa ka Mfumo ni ku endla vadyondzisiwa eka matiko-nkulu laman’wana, swi endla hi vona lunghelo leri hi nga na rona ro seketela vugandzeri bya ntiyiso hi tlhelo ra swa timali.—Lk. 16:9; 1 Tim. 6:18.

Holo ya Mfumo eKwaZulu-Natal, eAfrika Dzonga, leyi akiweke hi kaye wa masiku

Holo ya Mfumo leyi akiweke hi ndlela leyi hlayisaka mali eNigeria

Holo ya Nhlengeletano eMozambhiki leyi nga ni switulu swa vanhu va 1500, yi ta hetiwa eku heleni ka 1996

Miako ya rhavi ra le Mozambhiki, yi ta sungula ku tirha hi ximun’wana xa 1996

Rhavi ra le Sierra Leone, ku kunguhatiwe leswaku ri hela ku akiwa nan’waka

Holo ya Nhlengeletano leyi nga riki na makhumbi leyi nga hela ku akiwa eMauritius, kun’we ni miako ya rhavi, leyi nga ta hela ku akiwa eku sunguleni ka 1997

Rhavi ra le Zimbabwe leri nga eku akiweni

Holo ya Nhlengeletano leyi nga riki na khumbi ni rhavi lerintshwa leri nga eku akiweni eSenegal

Rhavi lerintshwa ra le Nairobi, entsindza wa Kenya

Rhavi ra le Madagascar, leri nga ta hela ku akiwa ku nga ri khale

Miako leyi kunguhatiweke ya rhavi ra le Malawi