Hlanganyela Entirhweni Lowu Nga Ta Ka Wu Nga Ha Engetiwi
1 Eminkarhini yo hambana-hambana ematin’wini ya vanhu, a swi fanerile leswaku Yehovha a lovisa valala va yena. Hambiswiritano, hikwalaho ka musa wa yena, u lunghiselele vanhu va timbilu letinene ndlela yo ponisiwa. (Ps. 103:13) N’wangulo wa vona a wu ta vula vuyelo byo hetelela eka vona.
2 Hi xikombiso, emahlweni ka Ndhambi, hi 2370 B.C.E., Nowa a a ri “mutwarisi wa leswo lulama.” Lava nga lova hi lava honiseke xitsundzuxo xa Xikwembu. (2 Pet. 2:5; Hev. 11:7) Loko Yerusalema wu nga si lovisiwa hi 70 C.E., Yesu u ma hlamusele kahle magoza lawa a ma fanele ma tekiwa hi un’wana ni un’wana leswaku a ta pona ndzoviso lowu a wu ta wela muti. Hinkwavo lava aleke rungula rakwe ro va tsundzuxa va weriwe hi khombo. (Lk. 21:20-24) Switsundzuxo swo tano ni ku avanyisa ka Xikwembu swi vuriwe ko tala ematin’wini.
3 Ntirho Wa Manguva Lawa Wo Tsundzuxa: Khale Yehovha u vule leswaku vukari byakwe byi ta wela fambiselo ra namuntlha lero homboloka ni leswaku ku ta pona lava titsongahataka ntsena. (Sof. 2:2, 3; 3:8) Nkarhi wa ku chumayela rungula leri leri tsundzuxaka wu hela hi ku hatlisa! ‘Nhlomulo lowukulu’ wu kwala nyongeni, naswona lava titsongahataka va karhi va hlengeletiwa. Kunene, “masimu” ma “vupfele ku tshoveriwa.” Hikwalaho, a ku na ntirho wun’wana lowu nga ringanisiwaka na lowu hi nkoka ni hi xihatla xa wona.—Mt. 24:14, 21, 22; Yoh. 4:35.
4 Hi fanele hi hlanganyela eku twariseni ka xitsundzuxo xa manguva lawa eka van’wana, “hambi v̌a yingisa, kumbe v̌a nga yingisi.” Lexi i xiavelo lexi hi nyikiweke xona hi Xikwembu lexi hi nga fanelangiki hi xi honisa. (Ezek. 2:4, 5; 3:17, 18) Ku hlanganyela ka hina hi xitalo entirhweni lowu i xikombiso lexi khorwisaka xa leswaku hi rhandza Xikwembu swinene, ku khumbeka ka hina ngopfu hi vaakelani va hina, ni ripfumelo ra hina leri nga tsekatsekiki eka Yesu Kreste, Muponisi wa hina.
5 Lowu I Nkarhi Wo Teka Goza: Endzhaku ka ndzoviso wa Yehovha wa nkarhi lowu nga hundza, nkarhi hinkwawo vubihi a byi pfuka hi vuntshwa hikwalaho ka leswi Sathana ni madimona yakwe a va ha karihile. Hambiswiritano, sweswi swi ta va swi hambanile. Nkucetelo wa Sathana wu ta herisiwa. Xitsundzuxo xa misava hinkwayo malunghana ni ‘nhlomulo lowukulu’ a xi nge he laveki. (Nhlav. 7:14; Rhom. 16:20) Hi ni lunghelo ro hlawuleka ra ku va ni xiphemu entirhweni lowu nga ta ka wu nga ha engetiwi. Lowu i nkarhi wa leswaku hi tirhisa lunghelo leri swinene.
6 Malunghana ni ntirho wakwe wo chumayela, muapostola Pawulo, hi ku khorwiseka swinene, u te: “A ndzi nga vi na nandzu loko un’wana wa n’wina a ya eku loveni.” (Mint. 20:26) A nga tivonanga a ri na nandzu wa ngati hikwalaho ka ku tsandzeka kwihi na kwihi ko twarisa xitsundzuxo lexi. Ha yini? Hikuva malunghana ni vutirheli bya yena u te: “Hi swona leswi ndzi tikarhatelaka swona, ndzi ri karhi ndzi lwa hi ntamu.” (Kol. 1:29) A hi kumeni ku eneriseka loku fanaka hi ku hlanganyela hi xitalo hilaha swi nga kotekaka hakona entirhweni lowu nga ta ka wu nga ha engetiwi!—2 Tim. 2:15.