Hambeta U Landzela Yesu
1 Eka xiendlakalo xin’wana Yesu u te: “Loko munhu a lava ku ndzi landza, a a titshike, a tirhwexa [mhandzi ya yena ya nxaniso, NW] kutani a ndzi landza.” (Mt. 16:24) Entiyisweni hi lava ku amukela marito ya Yesu hi ndlela leyinene. A hi kambisiseni leswi katsekaka eka xiga xin’wana ni xin’wana xa xirhambo xakwe.
2 “A A Titshike”: Loko hi nyiketela vutomi bya hina eka Yehovha, ha titshika. Nhlamuselo ya rito ra Xigriki leri hundzuluxeriweke va ku ‘ku titshika’ i “ku vula u ku e-e.” Leswi swi vula leswaku handle ko sindzisiwa hi tshika ku navela ka hina, ku hanya vutomi byo olova, ni mintsako ya vutianakanyi—hi tiyimisela ku tsakisa Yehovha hilaha ku nga heriki.—Rhom. 14:8; 15:3.
3 ‘A Tirhwexa Mhandzi Ya Yena Ya Nxaniso’: Vutomi bya Mukreste i vutomi bya ku rhwala mhandzi ya nxaniso ya ntirho wa ku tinyiketela eka Yehovha. Ndlela yin’wana yo kombisa moya wa ku tirha hi ku tirhandzela i ku tinyiketela evutirhelini. Ku fikela sweswi elembeni leri, vahuweleri vo tala a va ri karhi va tiphina hi ntirho wa vuphayona bya nkarhinyana. Kumbexana u wun’wana wa vona naswona u nga tiyisa leswaku mikateko leyi u yi kumaka yi ku tlula kule ku tinyikela loku u ku endlaka. Lava nga swi kotiki ku tirha tanihi maphayona ya nkarhinyana, nkarhi na nkarhi va hlele ku heta nkarhi wo tala entirhweni wo chumayela tanihi vahuweleri va vandlha. Leswaku ma fikelela pakani yoleyo, mavandlha man’wana ma hlela minhlangano ya wona ya ntirho wa nsimu ka ha ri ni nkarhi ku tlula leswi ma endlisaka xiswona hi ntolovelo. Vahuweleri vo tala va tsakela ku va ni nkarhi lowu engetelekeke wa ntirho wa nsimu. Van’wana na vona va ve ni vuyelo lebyinene, loko va bohe leswaku va endzela ‘muti wun’we ntsena’ kumbe ku tirha ‘timinete ti nga ri tingani ntsena.’
4 Ndlela yin’wana leyi moya wa ku tinyiketa wu kombisiwaka ha yona i ku tivekela tipakani ta munhu hi xiyexe. Hi ku kunguhata kahle ni ku lulamisa xiyimiso xa vona, van’wana va ve maphayona ya nkarhi hinkwawo. Van’wana va kote ku hlela timhaka ta vona leswaku va tiendla va kumeka entirhweni wa le Bethele kumbe wa vurhumiwa. Van’wana va rhurhele endhawini leyi nga ni xilaveko lexikulu xa vahuweleri va Mfumo.
5 ‘A Hambeta A Ndzi Landza’: Hambileswi vadyondzisiwa va Yesu va langutaneke ni miringo yo tala, va khutaziwe hi ku hiseka ni hi ku tiyisela ka yena evutirhelini. (Yoh. 4:34) Va titwe va pfuxetiwile emimoyeni ya vona hikwalaho ka vukona bya yena ni rungula ra yena. Hi yona mhaka leyi lava n’wi landzeleke va kumeke ntsako wa xiviri. (Mt. 11:29) Hilaha ku fanaka, a hi khutazaneni leswaku hi ta tiyisela entirhweni lowu wa nkoka wa ku chumayela hi Mfumo ni wa ku endla vadyondzisiwa.
6 Onge hinkwerhu ka hina hi nga angula kahle eka xirhambo xa Yesu xa ku hambeta hi n’wi landzela hi ku hlakulela moya wa ku tinyiketa. Loko hi endla tano, hi ta va ni ntsako lowukulu sweswi ni ku langutela mikateko yo tala enkarhini lowu taka.