Vutirheli Bya Hina—Xikombiso Xa Rirhandzu Ra Xiviri
1 Hi vutirheli bya hina hi kombisa leswaku hi yingisa swileriso swimbirhi leswikulu. (Mt. 22:37-39) Ku rhandza ka hina Yehovha swi hi susumetela ku vulavula ntiyiso malunghana na yena. Rirhandzu ra hina hi vanhu-kulorhi ri hi susumetela ku va khutaza ku lava vutivi malunghana ni ku rhandza ka Xikwembu ni swikongomelo swa xona, leswaku ku fana na hina, va ta rhandza Yehovha ni ku fanelekela hakelo ya vutomi lebyi nga heriki. Kutani, hi fundzha vito ra Yehovha hi vutirheli bya hina ni ku byela vanhu-kulorhi ntshembo wa risima wa Mfumo. Ina, vutirheli bya hina i xikombiso xa rirhandzu ra xiviri hi Xikwembu ni vanhu.
2 Rirhandzu ra hina ri hi susumetela ku vulavula ni vanhu va mixaka hinkwayo eka swiyimo hinkwaswo. (1 Kor. 9:21-23) Hi xikombiso: Loko a khandziye xihaha-mpfhuka, nkulu un’wana wa Mukreste a a tshame etlhelo ka muprista wa Rhoma Khatoliki. Nkulu loyi u sungule ku burisana ni muprista hi ku n’wi vutisa swivutiso swi nga ri swingani hi vutlhari, kutani a kongomisa bulo ra vona eka Mfumo. Loko ku fika nkarhi lowu muprista a faneleke a xika eka xihaha-mpfhuka ha wona, a a amukele tibuku ta hina timbirhi. Mayana vuyelo lebyinene hikwalaho ka leswi nkulu a kombiseke rirhandzu ra xiviri eka munhu-kulobye!
3 Rirhandzu Ra Ntiyiso Ri Hi Susumetela Ku Chumayela: Lava nghenelaka ntirho wa vuphayona bya nkarhinyana ni bya nkarhi hinkwawo entiyisweni va kombisa rirhandzu ra xiviri hi Xikwembu ni munhu-kulobye. Nkarhi na nkarhi maphayona ma tirhisa nkarhi ni matimba ya wona leswaku ma pfuna van’wana hi tlhelo ra moya. I yini lexi ma susumetelaka ku endla leswi? Phayona rin’wana ri te: “Ndza swi tiva leswaku rirhandzu i mbhandzu wa moya wa Xikwembu. Hikwalaho, handle ka rona ingi ndzi nga ri kona entiyisweni nikatsongo, a ndza ha vuli ku humelela leswaku ndzi va phayona. Rirhandzu ri ndzi endla ndzi anakanyela vanhu van’wana, ndzi xalamukela swilaveko swa vona, naswona ndza swi tiva leswaku vanhu va swi lava ku kombisiwa rirhandzu.” Yesu u ri kombisile rirhandzu ro tano hi vanhu. Siku rin’wana loko yena ni vadyondzisiwa vakwe lava karhaleke va ya endhawini yin’wana leswaku va “wisanyana,” ntshungu wu va rhangerile ku ya kona. Xana Yesu u endle yini? U vekele swilaveko swa yena etlhelo hikwalaho ka leswi “a wu twela vusiwana,” ivi “a sungula ku wu dyondzisa swilo swo tala.”—Mar. 6:30-34.
4 Hambiloko vanhu va ala mahungu lamanene lawa hi va byelaka wona, ha tsaka ku tiva leswaku hikwalaho ko susumetiwa hi rirhandzu, hi endle leswi hi swi koteke leswaku hi va pfuna ku kuma ku ponisiwa. Loko hinkwerhu eku heteleleni hi avanyisiwa hi Kreste, hi ta va hi tsake ngopfu hikwalaho ka leswi hi kombiseke rirhandzu ra xiviri hi ku ‘hetisisa vutirheli bya hina hi xitalo.’—2 Tim. 4:5.