Bokisi Ra Swivutiso

◼ Xana hi nga endla yini ku antswisa minhlangano leswaku yi va leyi humelelaka?

Van’wana va nga ha va ni mboyamelo wa leswaku i vakulu ni malandza ya vutirheli lava nga ni vutihlamuleri lebyikulu bya ku humelela ka minhlangano ya vandlha hikwalaho ka leswi ku nga vona va nyikelaka tinkulumo to tala ta yona. Entiyisweni, hinkwerhu ka hina hi nga hoxa xandla eku endleni ka leswaku minhlangano yi tsakisa ni ku vuyerisa. Hi nga hoxa xandla ku endla leswaku minhlangano yi humelela swinene loko hi tirhisa tindlela ta khume leti landzelaka:

Lunghiselela nkarhi wa ha ri kona. Loko hi lunghiselela kahle, minhlangano yi ta hi tsakisa. Loko hinkwerhu ka hina hi endla leswi, minhlangano yi ta tsakisa ni ku aka swinene. Vana kona nkarhi na nkarhi. Nhlayo leyikulu ya lava vaka kona yi khutaza hinkwavo lava nga kona, yi tiyisa ku tlangela nkoka wa ku ya eminhlanganweni. Fika hi nkarhi. Loko hi va hi tshamisekile minhlangano yi nga si sungula, hi ta hlanganyela eka risimu ro pfula ni xikhongelo, xisweswo hi ta vuyeriwa swinene eka minhlangano leyi. Tana ni leswi u nga ta swi tirhisa. Loko hi ta ni Bibele ni (ti)buku leti tirhisiwaka hi nkarhi wa minhlangano, hi ta kota ku fambisana ni leswi dyondzisiwaka. Papalata ku kavanyetiwa. Hi nga ha kota ku yingisela kahle loko hi tshame hi mukhuva lowunene. Ku hlevetela ni ku tshamela ku ya exihambukelweni swi nga endla leswaku hina ni van’wana hi lahlekeriwa hi ku nyikela nyingiso. Hlanganyela. Loko hi yimisa mavoko hi tele ni ku hlamula, vo tala va khutaziwa ni ku akiwa hi tinhlamulo ta hina leti kombisaka ripfumelo. Hlamula hi ku komisa. Leswi swi endla leswaku vo tala va kuma nkarhi wa ku hlamula. Hi fanele hi twananisa tinhlamulo ta hina leto koma ni rungula leri dyondziwaka. Endla swiavelo swa wena. Loko hi ri swichudeni eXikolweni xa Vutirheli bya le Tilweni kumbe hi hlanganyela eka Nhlangano wa Ntirho, hi fanele hi lunghiselela kahle, hi pfuxeta ka ha ri ni nkarhi ni ku tikarhatela ku hetisisa swiavelo swa hina. Bumabumela lava hlanganyelaka. Byela van’wana ndlela leyi matshalatshala ya vona ma tlangeriwaka ha yona. Leswi swa va aka naswona swi va susumetela ku endla swo antswa enkarhini lowu taka. Khutazanani. Ku xeweta ka xinghana ni mabulo lama akaka emahlweni ni le ndzhaku ka minhlangano swi engetela ntsako ni vuyelo lebyi hi byi kumaka hi ku va kona eminhlanganweni.