Riendzo Leri Nga Vaka Nkateko

¹ Zakiya u amukele Yesu tanihi muyeni ekaya rakwe hi ku tsaka lokukulu. Mayana nkateko lowu riendzo rolero ri wu tiseke!—Luka 19:2-9.

² Namuntlha, tanihi Nhloko ya vandlha, Yesu Kreste u kongomisa vakulu leswaku va ‘risa ntlhambi wa Xikwembu.’ (1 Pet. 5:2, 3; Yoh. 21:15-17) Ku engetela eka ku dyondzisa eminhlanganweni ni ku rhangela entirhweni wa nsimu, valanguteri va vandlha va nyikela mpfuno wa rirhandzu eka xirho xin’wana ni xin’wana xa vandlha. Hikokwalaho, nkarhi na nkarhi, u nga ha langutela nkhathalelo wa vakulu, ekaya, eHolweni ya Mfumo, loko mi ri swin’we entirhweni wa nsimu kumbe eka swiendlakalo swin’wana. Xana u fanele u chava loko vakulu va ku endzela? Nikatsongo. Loko va ku endzela a swi vuli swona leswaku ku ni leswi u tsaneke eka swona. Kutani ke, xana hi xihi xikongomelo xa riendzo ra vurisi?

³ Pawulo u vule leswaku u lava ku endzela vamakwavo ‘ku ya vona leswaku vutomi byi njhani.’ (Mint. 15:36) Ina, tanihi varisi lava nga ni rirhandzu, vakulu va tsakela ngopfu ku tiva leswaku vutomi byi njhani. Va lava ku ku nyika mpfuno wa moya lowu nga ku pfunaka ni ku ku aka. Ku khathaleriwa ko tano ka un’wana ni un’wana hi kona loku Yehovha Murisi wa hina wa rirhandzu a navelaka leswaku un’wana ni un’wana wa hina a va na kona.—Ezek. 34:11.

⁴ Amukela Vakulu Loko Va Ku Endzela: Pakani ya Pawulo loko a endzela vamakwavo a ku ri ku ‘va nyika nyiko yo karhi ya moya leswaku va tiyisiwa, ni leswaku va khutazana.’ (Rhom. 1:11, 12) Hinkwerhu ka hina hi lava xikhutazo xa moya emasikwini lawa yo nonon’hwa yo hetelela, naswona hi lava ku pfuniwa leswaku hi tshama hi tiyile eripfumelweni. A swi kanakanisi leswaku ku tlangela ka wena riendzo ra vurisi swi ta mi nyika nkarhi wa ku khutazana hi ndlela ya risima.

⁵ Tlangela vuyelo lebyinene lebyi u nga byi kumaka eka ntirho wa vakulu wa vurisi. Loko ku ri ni mhaka leyi ku vilerisaka kumbe xivutiso, tsundzuka leswaku vakulu va kona evandlheni ku ku pfuna. U nga kanakani ku burisana na vona malunghana ni timhaka leti nga ha khumbaka vuhlayiseki bya wena bya moya. Tlangela lunghiselelo leri ra rirhandzu leri simekiweke hi Yehovha, ivi u tsakela mikateko leyi riendzo ro tano ri yi tisaka.