“Lehisani Mbilu”
1 Tanihi leswi hi swi vonaka leswaku makumu ya mafambiselo ya khale ya Sathana ma tshinele swinene, i swa nkoka leswaku hi ‘lehisa mbilu’ loko hi ri karhi hi langutela siku ra Yehovha ra ku ponisa. Ngopfu-ngopfu enkarhini lowu wo hetelela, mavuthu yo homboloka ya nala ma tiyimiserile ku hambukisa nyingiso wa hina emhakeni ya nkoka swinene ya vuhosi bya Yehovha ni ku hi ringa leswaku hi hambukisiwa hi swilaveko swa ntsandza-vahlayi swa munhu hi xiyexe. Hi ndlela leyi, Sathana u ta hi ringa leswaku hi lan’wa kumbe hi nga ha hiseki entirhweni wo chumayela ta Mfumo. (Yak. 5:7, 8; Mat. 24:13, 14) Xana hi nga kombisa ku lehisa mbilu ko tano hi tindlela tihi?
2 Hi Ku Tiyisela: Loko hi hlangana ni vanhu lava nga tsakeriki kumbe lava kanetaka evutirhelini bya hina, ku tiyisela ku ta hi pfuna leswaku hi phikelela eku chumayeleni. A hi nge chavisiwi kumbe ku hlundzukisiwa hi ku olova loko vanhu lava hi hlanganaka na vona va ri ni lunya. (1 Pet. 2:23) Nsusumeto lowu wa le ndzeni wu nga hi sivela ku vulavula hi ndlela yo biha hi vanhu lava nga ensin’wini ya hina lava nga tsakeliki kumbe lava vengaka ntirho wa hina, hi ku tiva leswaku mavulavulelo yo tano ma ta hi heta matimba, ma endla tano ni le ka lava tirhaka na hina evutirhelini.
3 Ku Phikelela Hi Ku Lehisa Mbilu: Endzhaku ka loko hi ve ni bulo lerinene ni munhu la tsakelaka evutirhelini bya nsimu ivi munhu wa kona hi nga ha n’wi kumi ekaya hi nga ha hela mbilu. Leswi swi tano ni loko vanhu lava hi dyondzaka na vona va nga endli nhluvuko kumbe va hlwela ku teka goza ra ku yimela ntiyiso. Hambiswiritano, ku phikelela hi ku lehisa mbilu hakanyingi ku hakeriwa hi vuyelo lebyinene. (Gal. 6:9) Makwerhu un’wana wa xisati u endle maendzo yo vuyela yo hlayanyana eka wansati la ha riki muntshwa emahlweni ko va dyondzo ya Bibele yi sungula. Eka maendzo yo sungula ya ntlhanu, wansati loyi a khomekile hi ku endla swilo swin’wana. Eka riendzo ra vutsevu, makwerhu u fike a tsakamisiwe hi mpfula, kambe u kume ku nga ri na munhu ekaya. Kambe hikwalaho ka leswi a a tiyimisele ku nyika wansati loyi nkarhi wo hetelela, makwerhu u tlhelerile naswona u kume wansati loyi a tiyimisele ku dyondza. Endzhaku ka kwalaho, xichudeni lexi xi endle nhluvuko lowunene naswona endzhaku ka nkarhinyana xi nyiketele vutomi bya xona eka Yehovha.
4 Ha swi tiva leswaku siku ra Yehovha a ri nge hlweli. Hikwalaho hi titshege hi ndlela leyi a nga ta endla swilo ha yona, hi ku tiva leswaku ku lehisa mbilu ka Xikwembu ku ta tisa vuyelo lebyinene. (Hab. 2:3; 2 Pet. 3:9-15) Hi fanele hi lehisa mbilu hilaha Yehovha a endlaka hakona naswona hi nga tshiki vutirheli bya hina. Hi “ripfumelo ni ku lehisa mbilu,” languta eka Yehovha tanihi yena la nga ta ku hakela hikwalaho ka ku tikarhata ka wena.—Hev. 6:10-12.