“Ambala Vumunhu Lebyintshwa”
1 Vakreste swa va tsakisa ku va va tiva ntiyiso! Hi dyondze ku hanya hi mukhuva lowu nga ta hi pfuna ku papalata ndlela ya misava. Hikwalaho ka leswi yi “hamban[eke] ni vutomi lebyi nga bya Xikwembu,” ya “ha ri emunyameni hi mianakanyo.” (Efe. 4:18) Hi dyondzisiwe ku cinca mianakanyo ya hina eka langutelo ra misava hi ku hluvula vumunhu bya khale ivi hi ambala lebyintshwa.—Efe. 4:22-24.
2 Vumunhu bya khale byi yisa eku hohlokeni ka mahanyelo, leswi vangaka ku nyamisiwa ka vanhu ni rifu. Hikwalaho, hi khutaza lava yingisaka rungula ra Mfumo leswaku va tshika vukarhi hinkwabyo, ku hlundzuka, vubihi, mavulavulelo yo biha ni nhlamba. Lava lavaka ku amukeriwa hi Xikwembu va fanele va hluvula vumunhu bya khale hi ku helela—ku fana ni loko va hluvula xiambalo lexi thyakeke.—Kol. 3:8, 9.
3 Matimba Lamantshwa Lama Susumetaka Mianakanyo: Ku ambala vumunhu lebyintshwa swi katsa ku endliwa lontshwa ematimbeni lama susumetaka mianakanyo ya hina. (Efe. 4:23) Xana munhu u swi kotisa ku yini ku cinca matimba kumbe langutelo rakwe ra mianakanyo ri va lerintshwa, ri va ni mboyamelo lowunene? Leswi swi endliwa hi ku dyondza Rito ra Xikwembu hi ku hiseka nkarhi na nkarhi ni ku anakanyisisa hi leswi ri swi vulaka. Kutani, munhu u sungula ku hlakulela ndlela leyintshwa ya ku anakanya ivi a vona swilo hi ku ya hi langutelo ra Xikwembu na Kreste. Vutomi byakwe bya cinca loko a hlakulela timfanelo to tala leti fanaka ni ta Kreste, ku katsa ni ntwela-vusiwana, tintswalo, mianakanyo ya ku titsongahata, ku rhula, ku leha mbilu ni rirhandzu.—Kol. 3:10, 12-14.
4 Loko hi ambala vumunhu lebyintshwa, hi tihambanisa ni misava. Hanyelo ra hina ri endla leswaku hi hambana ni van’wana. Hi vulavula ntiyiso naswona hi tirhisa mavulavulelo lama tengeke leswaku hi aka van’wana. Hi lawula ku hlundzuka, vukarhi, ku hokoloka, lunya ni vubihi hinkwabyo hi swi siva hi timfanelo letinene ta Xikwembu. Hi endla leswi engetelekeke ku tlula leswi languteriweke eka hina emhakeni ya ku rivalela. Hinkwaswo leswi hi swi endla hi mbilu hinkwayo.—Efe. 4:25-32.
5 U nga tshuki u hluvula vumunhu lebyintshwa. Handle ka byona a hi nge n’wi tirheli hi ndlela leyi amukelekaka Yehovha. Byi pfumelele byi ku pfuna ku koka vanhu va ta entiyisweni, naswona byi pfumelele byi dzunisa Yehovha, Muvumbi wa vumunhu bya hina lebyintshwa lebyi hlamarisaka.—Efe. 4:24.