Va Rhambe

¹ Xirhambo lexi humesiweke eka malembe-xidzana lama hundzeke, sweswi xa twarisiwa ematikweni ya 233 emisaveni hinkwayo: “Tanani, hi ta tlhandlukela nṭhav̌eni ya Yehova, . . . [u] ta hi dyonḍisa tindlela ta [yena], kutani hi ta famba e mitileni ya [yena].” (Esa. 2:3) Ku kongomisa vanhu enhlengeletanweni ya Yehovha hi yin’wana ya tindlela letinene leti hi nga va pfunaka ha tona leswaku va endla nhluvuko wa moya lowu yisaka evuton’wini lebyi nga heriki.

² Vahuweleri van’wana va nga ha kanakana ku rhambela vanhu eHolweni ya Mfumo va rindzela leswaku va rhanga va kombisa nhluvuko lowukulu edyondzweni ya le kaya ya Bibele. Hambiswiritano, minkarhi yin’wana vanhu va nga ha sungula ku ya eminhlanganweni ya vandlha hambi ku nga si sunguriwa dyondzo ya Bibele na vona. A hi fanelanga hi hlwela ku rhamba ni ku khutaza vanhu leswaku va va kona eminhlanganweni.

³ Lexi Hi Faneleke Hi Xi Endla: A hi tirhiseni swiphephana swa xirhambo hi ndlela leyinene leswaku hi tivisa vanhu minhlangano ya vandlha. Hlamusela leswaku eminhlanganweni ku ngheniwa mahala naswona a ku na minhlengo leyi komberiwaka. Hlamusela ndlela leyi minhlangano yi fambisiwaka ha yona. Hlamusela leswaku eminhlanganweni leyi ku dyondzisiwa tidyondzo ta Bibele naswona tibuku to dyondza ha tona ta kumeka. Va chumbutele leswaku vanhu lava vaka kona eminhlanganweni va huma eka mindhavuko ni swiyimo swo hambana-hambana swa vutomi. Hlamusela leswaku vanhu lava hlanganyelaka va tshama endhawini ya ka n’wina ni leswaku hinkwavo vana va amukeriwa hi mandla mambirhi. Hi fanele hi rhamba vanhu lava hi dyondzaka na vona, hi tinyiketela ku va pfuna hi ndlela yin’wana ni yin’wana leswaku va va kona.

⁴ Xin’wana xa swilo swo hetelela leswi tsariweke eBibeleni i xirhambo xa rirhandzu xa ku hlanganyela eka malunghiselelo ya Yehovha ya vutomi: “Kutani moya ni mutekiwa va hambeta va ku: ‘Tana!’ . . . Mani na mani la khomiweke hi torha a a te; mani na mani la swi navelaka a a nwe mati ya vutomi mahala.” (Nhlav. 22:17) A ku na xikhomela-ndhawu xa ku rhamba vanhu van’wana leswaku va va kona eminhlanganweni ya hina.

⁵ Hi ndlela yo profeta, Esaya 60:8 yi kombisa leswaku madzana ya magidi ya vagandzeri lavantshwa sweswi va ya emavandlheni ya vanhu va Xikwembu tanihi matuva lama “hahaka kukotisa mapapa, tani hi matuv̌a e šihahlweni ša wona.” Hinkwerhu hi nga rhamba vanhu lavantshwa leswaku va va kona eminhlanganweni ya hina naswona hi endla leswaku va titwa va ri ekaya. Hi ndlela leyi hi ta va hi tirhisana na Yehovha loko a ri karhi a hatlisisa ntirho wa ku hlengeleta.—Esa. 60:22.