Xana U Languta Ku Languteka Ka Munhu Ntsena?
1 Loko hi endla vutirheli bya hina bya le rivaleni, leswi hi swi anakanyaka ro sungula loko hi languta vanhu van’wana swi nga endla leswaku hi kanakana ku bula na vona hi mahungu lamanene. Hi xikombiso, a wu ta endla yini loko wanuna wo chavisa a ku honolela hi tihlo leri kombisaka ku ku ehleketelela loko a ku vona u nghena eka muakelani wakwe la kombiseke ku tsakela ntiyiso? Makwerhu un’wana wa xisati loyi a nga phayona, la langutaneke ni xiyimo xo tano u anakanye ku tshinelela wanuna loyi ivi a vulavula na yena. Wanuna loyi u pfuxele makwerhu loyi wa xisati hi tihanyi. Lexi hlamarisaka, u amukele rungula ra Bibele naswona hi ntsako u pfumerile ku fambiseriwa dyondzo. Hikwalaho, leswi makwerhu loyi wa xisati a nga endlangiki hi ku ya hi ku languteka ka wanuna loyi, yena ni nsati wakwe va pfulekeriwe hi ndlela yo dyondza ntiyiso.
2 Makwerhu un’wana wa xisati, eku sunguleni a a chavisiwa hi ku languteka ka jaha rin’wana ra misisi yo leha, kambe u hambete a nyikela vumbhoni hi ku komisa loko jaha leri ri ta exitolo lexi a tirha eka xona. Matshalatshala yakwe ma tise vuyelo lebyinene, jaha leri sweswi i Mbhoni leyi khuvuriweke. I yini lexi nga hi sivelaka ku hatlisela ku anakanya leswaku vanhu vo tano a va nge kombisi ku tsakela?
3 Ku Tekelela Xikombiso Xa Yesu: Yesu a swi tiva leswaku u ta nyikela hi vutomi byakwe leswaku ku vuyeriwa un’wana ni un’wana. Hikwalaho a a nga chavisiwi hi ku languteka ka vanhu van’wana. A swi tiva leswaku hambi ku ri vanhu lava nga ni mahanyelo yo biha va nga ha tiyimisela ku cinca loko va nyikiwa mpfuno lowu faneleke ni xikhutazo. (Mat. 9:9-13) U tikarhatele ku pfuna lava nga ganya ni swisiwana. (Mat. 11:5; Mar. 10:17-22) Hi nga ehleketeleli vanhu lava hi hlanganaka na vona evutirhelini hi ku ya hi leswi va langutekisaka xiswona, hi tsandzeka ku vona mbilu leyi yi nga ha vaka yi ri yinene. (Mat. 7:1; Yoh. 7:24) I yini lexi nga hi pfunaka ku tekelela xikombiso lexinene xa Yesu?
4 Hi ku dyondza ka hina Bibele, hi kote ku twisisa leswaku Rito ra Xikwembu ri ni matimba ya ku cinca langutelo, ku tikhoma ni vumunhu. (Efe. 4:22-24; Hev. 4:12) Hikwalaho, hi fanele hi va ni langutelo lerinene ivi leswin’wana hinkwaswo hi swi siyela Yehovha, ku nga Yena la tivaka leswi nga etimbilwini ta vanhu.—1 Sam. 16:7; Mint. 10:34, 35.
5 Onge ku twarisa ka hina mahungu lamanene eka vanhu va minxaka hinkwayo handle ko ya hi nghohe, ku nga khathariseki ndlela leyi va langutekaka ha yona, ku nga hoxa xandla entirhweni wa ku tshovela lowu endliwaka emasikwini lawa yo hetelela.—1 Tim. 2:3, 4.