Vanhu Va Mixaka Hinkwayo Va Ta Ponisiwa
1. I yini lexi endlaka leswaku Xikwembu xi hi amukela?
1 Musa wa Xikwembu lowu nga faneriwiki wu pfule ndlela yo ya eku ponisiweni. I ku rhandza ka Yehovha leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:3, 4) Xikwembu a xi hi amukeli hileswi hi nga va rixaka ro karhi, va xiyimo xo karhi, lava nga ni vuswikoti byo karhi kumbe hi ndlela leyi hi langutekaka ha yona, kambe xi hi amukela hikwalaho ka ripfumelo leri hi nga na rona eka xitlhavelo xa Yesu xa nkutsulo. (Yoh. 3:16, 36) Tanihi vatirhi-kulobye va Xikwembu, hi fanele hi tshika ku hlawula ndluwa hi siya hove, ku nga mboyamelo lowu nga endlaka timbilu ta hina ti nyenya vanhu lava Yehovha a va amukelaka.
2, 3. I yini lexi nga hi pfunaka leswaku hi nga ehleketeleli vanhu leswaku va ta angula hi ndlela leyi va langutekaka ha yona?
2 Papalata Ku Avanyisa: Yehovha u languta leswi vanhu va nga swona embilwini, a nga yi hi nghohe. (1 Sam. 16:7) Nakambe wa swi vona loko va ta hundzuka. Xisweswo, lava va lavaka ku n’wi tsakisa u va languta va ri lava navelekaka. (Hag. 2:7) Xana vanhu van’wana hi va languta hi ndlela leyi Xikwembu xi va langutaka ha yona?
3 Vanhu van’wana lava hi hlanganaka na vona ensin’wini, va nga ha hi chavisa hi ndlela leyi va langutekaka ha yona. Va nga ha va va ambale hi ndlela ya vusopfa kumbe ya vudlakuta, malepfu ya vona ma lo jivinini, kumbe va hoxe ni masuruvele enhompfini kumbe enon’wini. Van’wana va nga ha va va pfumala makaya. Van’wana va nga ha hi khoma hi ndlela ya tihanyi. Ematshan’wini yo va ehleketelela leswaku a va nge pfuki va ve vagandzeri va Yehovha, hi fanele hi va ni langutelo lerinene ha vona, “hikuva na hina khale a hi ri swihunguki, hi nga yingisi, [naswona] hi hambukisiwile.” (Tito 3:3) Loko hi xiya leswi, hi ta hisekela ku chumayela un’wana ni un’wana, hambi ku ri lava va langutekaka va nga faneleki.
4, 5. I yini leswi hi swi dyondzaka eka xikombiso xa Yesu ni xa Pawulo?
4 Swikombiso Swa Lembe-xidzana Ro Sungula: Yesu Kreste u tinyike nkarhi wo pfuna vanhu lava vanhu van’wana a va va languta va ri lava nga taka va nga hundzuki ni siku ni rin’we. (Luka 8:26-39) Hambileswi a a nga swi amukeli swiendlo swo biha, kambe a a swi tiva leswaku swi ta endleka leswaku vanhu va endla leswo biha evuton’wini. (Luka 7:37, 38, 44-48) Xisweswo, u kombise leswaku wa anakanyela, naswona a a ‘twela vanhu vusiwana, hikuva a va fana ni tinyimpfu leti nga riki na murisi.’ (Mar. 6:34) Xana hi nga tekelela xikombiso xa yena hilaha ku heleleke?
5 Muapostola Pawulo u khandliwe hi maribye, a biwa ni ku pfaleriwa ekhotsweni. (Mint. 14:19; 16:22, 23) Xana maxangu wolawo hinkwawo ma n’wi endle a va ni xikhomela ivi a gimeta hileswaku ku chumayela vamatiko ni tinxaka tin’wana i ku tidyela nkarhi? Doo! A a swi tiva leswaku exikarhi ka tinxaka ta vanhu ku nga kumeka va timbilu letinene, naswona a a tiyimisele ku va lava. Xana yoleyo hi yona ndlela leyi hi va langutaka ha yona vanhu va swiyimo ni mindhavuko yo hambana-hambana lava nga ensin’wini ya hina?
6. Xana langutelo ra hina ri nga va khumba njhani lava ha ku sungulaka ku hlanganyela eminhlanganweni ya vandlha?
6 Ku Amukela Van’wana Namuntlha: Vanhu vo tala va Xikwembu va tsakile leswi vamakwerhu lava va nga yiki hi nghohe va va amukeleke hi malwandla evandlheni. EHolweni ya Mfumo, le Jarimani, ku fike wanuna un’wana loyi a a fuwe malepfu naswona a ri ni misisi leyi a yi fika emakatleni, a ambale ni swiambalo swa thyaka. A a ri ni ndhuma yo biha. Hambiswiritano, loko a fika eminhlanganweni u amukeriwe hi malwandla. A a tsake ngopfu lerova vhiki leri landzeleke u tlhele a ta. U hatlise a cinca ndlela leyi a langutekaka ha yona, a tshika ku dzaha ivi yena ni xigangu xakwe va tekana ximfumo. Ku nga ri khale havambirhi swin’we ni vana va vona a va tirhela Yehovha tanihi ndyangu.
7. Xana hi nga xi tekelela njhani Xikwembu xerhu lexi nga yiki hi nghohe?
7 Onge hi nga tekelela Xikwembu xerhu lexi nga yiki hi nghohe, hi rhamba hinkwavo leswaku va tiphina hi musa wa Xikwembu lowu nga faneriwiki.
[Bokisi leri nga eka tluka 3]
“Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mint. 10:34, 35.