Tekelela Yehovha—U Nga Yi Hi Nghohe
1 Yehovha wa va khathalela vanhu. A nga yi hi nghohe, u amukela un’wana ni un’wana la endlaka ku rhandza ka yena. (Mint. 10:34, 35) Hi mukhuva lowu fanaka, Yesu a a chumayela vanhu handle ko ya hi nghohe. (Luka 20:21) Hi fanele hi tekelela xikombiso xa vona ku fana na Pawulo loyi a tsaleke a ku: “Ku ni Hosi yin’we ehenhla ka hinkwavo, leyi fuweke eka hinkwavo lava yi vitanaka.”—Rhom. 10:12.
2 Ku twarisa mahungu lamanene ya Mfumo wa Xikwembu eka vanhu hinkwavo lava hi hlanganaka na vona swi tisa ku dzuneka eka Xikwembu. Hi fanele hi hambeta hi byela vanhu van’wana rungula leri ra risima, ku nga khathariseki rixaka ra vona, xiyimo xa vona, ku dyondzeka ka vona kumbe xiyimo xa vona xa timali. (Rhom. 10:11-13) Leswi swi vula ku chumayela vanhu lava nga ta hi yingisa—vavanuna, vavasati, vantshwa ni vadyuhari. Hi fanele hi nghena emutini wun’wana ni wun’wana leswaku loyi a nga kona a kota ku twa ntiyiso.
3 Komba Munhu Un’wana Ni Un’wana Leswaku Wa N’wi Tsakela: Pakani ya hina i ku vulavula ni munhu un’wana ni un’wana loko swi koteka. Hikwalaho ka xikongomelo lexi, vahuweleri van’wana va swi kotile ku nyikela vumbhoni eka vanhu lava yaka eka dokodela, eswibedlhele, emakaya yo hlayisa vadyuhari, eka vanhu lava tirhaka etihofisini ta ntshamisano ni le tindhawini to pfuna lava a va godzomberiwile. Ku engetela kwalaho, vahuweleri van’wana va nyikele vumbhoni eka vafambisi va mikosi, valanguteri va swikolo, vadyondzisi kun’we ni vaavanyisi. Loko hi endzela vatirhela-mfumo, swa fanela hi phofula leswaku ha wu tlangela ntirho wa risima lowu va wu endlelaka tiko. Kombisa xichavo naswona hlawula swihloko leswi nga enkarhini, ngopfu-ngopfu leswi fambisanaka ni mintirho ya vona kun’we ni swiphiqo swa vona.
4 Siku rin’wana, makwerhu un’wana wa xisati u kote ku vulavula ni muavanyisi ehofisini yakwe. Endzhaku ka bulo lerinene, muavanyisi u vule marito lawa: “Xana wa swi tiva leswaku Timbhoni ta Yehovha ndzi ti rhandzela yini? Ti ni misinya ya milawu leyi tiyeke, leyi ti nga hambukiki eka yona.” Ku nyikeriwe vumbhoni bya risima eka munhu loyi wo xiximeka.
5 A hi swi tivi leswi nga etimbilwini ta vanhu. Hambiswiritano, hi ku vulavula ni un’wana ni un’wana loyi hi hlanganaka na yena, hi kombisa ripfumelo ra hina eka vuswikoti bya Xikwembu bya ku kongomisa ntirho wa hina. Ku tlula kwalaho, vanhu lava va kuma nkarhi wa ku twa ni ku angula eka rungula leri nyikaka ntshembo. (1 Tim. 2:3, 4) A hi tirhiseni nkarhi wa hina hi vutlharhi ni ku ringeta ku tekelela Yehovha, hi nga yi hi nghohe hi ku byela vanhu hinkwavo mahungu lamanene hilaha hi nga kotaka hakona.—Rhom. 2:11; Efe. 5:1, 2.