Ku Fikelela Vanhu Lava Engetelekeke Hi Mahungu Lamanene

LOKO ndzi ri karhi ndzi ehleketa hi vanhu va laha ndzi tshamaka kona, ndzi swi xiyile leswaku vo tala va tiva Timbhoni ta Yehovha ntsena hi ku twa swiviko swa mahungu. Ndzi ehleketile ndzi ku, vanhu lava ku fanele ku vulavuriwa, na vona leswaku va ta dyondza leswaku Timbhoni ta Yehovha i vamani ni leswaku ti pfumela eka yini hakunene. Kambe xana a ndzi ta va pfuna njhani? Nuna wa mina i nkulu wa Mukreste, kutani u ndzi nyike nkongomiso ni swiringanyeto swa vutlhari.

Hi kume mavonelo lama nga xilotlelo exihlokweni lexi nge, “Timagazini Leti Nyikelaka Nchavelelo Lowu Tirhaka,” lexi humesiweke eka magazini wa Xalamuka! (ya Xinghezi) ya January 8, 1995. Malunghana ni ntirho wa Mbhoni, xihloko lexi xi ri: “A a tiyiseka leswaku u hlengeleta tikopi to karhi ta khale ta timagazini ta Xalamuka! leti Timbhoni tin’wana ti ti hlengeleteke ekaya. Kutani a endzela tindzawulo leti a vonaka onge ti nga tsakela tinhloko-mhaka tin’wana.”

Hi ku hatlisa ndzi hlengelete madzana yo hlayanyana ya timagazini ndzi ri karhi ndzi pfuniwa hi nuna wa mina. Ndzi swi kotile ku hlawula tinhloko-mhaka to hambana-hambana leti fanelaka vanhu lava ndzi nga ta ringeta ku vulavurisana na vona.

Hi ku tirhisa buku ya tinqingho ni tirhekhodo ta vanhu, ndzi hlengelete nongonoko lowu kombaka swibedlhele, tihositele ni makaya yo khathalela vanhu eka wona. Ndzi tlhele ndzi tsala lava fambisaka minkosi, valanguteri va swikolo ni vatsundzuxi, vakambisisi va swa vutshunguri, vatirhela-mfumo emakhotsweni ni tihuvo ta nawu. Nongonoko wa mina a wu katsa vakongomisi va mavandla ya swindzendzele ni lava godzomberiweke hi swidzidzirisi, minhlangano ya timhaka ta mbango, ya lava lamaleke ni lava hlaseriweke hi nyimpi ni ya vakambisisi va swakudya. A ndzi va siyanga vafambisi va tihofisi ta vuhlayiseki, mintirho ya ta ntshamisano ni timhaka ta mindyangu.

Xana Ndzi Ta Vula Yini?

Xilo xo sungula lexi a ndzi xi endla loko ndzi endza a ku ri ku titivisa kahle leswaku ndzi mani. Kutani ndzi vula leswaku riendzo ra mina ri ta teka timinete ti nga ri tingani.

Loko ndzi langutane ni mulawuri a ndzi ku: “Ndzi un’wana wa Timbhoni ta Yehovha. Hambiswiritano, a ndzi telanga ku ta bula hi vukhongeri, ku nga mhaka leyi yi nga tshukaka yi nga faneleki hi nkarhi wa ntirho.” Hi ntolovelo xiyimo a xi va kahle. Kutani, loko ndzi pfumelelanisa tinhlamuselo ta mina ni xiyimo, a ndzi ya emahlweni ndzi ku: “Xivangelo xa riendzo ra mina xi kambirhi. Xo sungula, ndzi navela ku phofula ku tlangela ka mina ntirho lowu hleriwaka hi hofisi ya n’wina. Ku tlula kwalaho, a swi fanelanga swi tekeriwa ehansi loko munhu a tirhisa nkarhi wa yena ni ntamu wa yena hikwalaho ka vanhu. Matshalatshala ya wena ma bumabumeriwa hakunene.” Hakanyingi munhu loyi a byeriwaka hi ndlela leyi wa hlamala.

Sweswi munhu loyi kumbexana wa tivutisa leswaku xivangelo xa mina xa vumbirhi xa ku endza hi xihi. Ndzi ya emahlweni ndzi ku: “Xivangelo xa vumbirhi xa ku endza ka mina hi lexi: Eka magazini wa hina wa Xalamuka!, lowu humesiwaka emisaveni hinkwayo, ndzi hlawule swihloko leswi vulavulaka ngopfu-ngopfu hi muxaka wa ntirho wa wena ni swiphiqo leswi fambisanaka na wona. Ndza tiyiseka leswaku u ta swi tsakela ku tiva ndlela leyi magazini wa misava hinkwayo wu langutaka swiphiqo leswi ha yona. Ndzi ta tsakela ku ku siyela tikopi leti.” Hakanyingi a ndzi byeriwa leswaku matshalatshala ya mina ma tlangeriwa.

Vuyelo Lebyi Hlamarisaka Ni Lebyi Vuyerisaka

Loko ndzi tirhisa maendlelo lawa, vo tala va ndzi yingisele hi ku titsongahata; ko va un’we eka vanhu va 17 loyi a aleke. Ndzi ve ni mintokoto yo hlayanyana leyi a yi hlamarisa ni ku vuyerisa.

Hi xikombiso, endzhaku ko ringeta minkarhi ya mune ni ku rindza hi ku lehisa mbilu, ndzi swi kotile ku hlangana ni mukamberi wa xikolo xa muganga. A a ri munhu la khomekeke swinene. Kambe, a ri ni xinghana swinene naswona u vulavule na mina swa xinkarhana. Loko ndzi famba, u te: “Ndza ma tlangela swinene matshalatshala ya wena, naswona hi laha ku tiyeke ndzi ta yi hlaya hi vukheta buku ya wena.”

Eka nkarhi wun’wana, ndzi ye ehubyeni ya muganga, ndzi ya hlangana ni muavanyisi-nkulu, wanuna wa malembe ya le xikarhi. Loko ndzi nghena ehofisini ya yena, u tlakuse mahlo tanihi leswi a a khome maphepha a nyangatsekile.

U hlamule handle ka xinghana a ku: “Nkarhi wo tirha hi wona i Ravumbirhi nimixo ntsena, naswona ndzi ta va ndzi ri kona ndzi rindzele rungula rin’wana ni rin’wana.”

Ndzi hlamule hi xihatla ndzi ku: “Ndzi kombela u ndzi khomela hi ku va ndzi te hi nkarhi lowu nga fanelangiki,” ivi ndzi engetela ndzi ku, “Kavula, ndzi ta tsakela ku vuya nakambe hi nkarhi wun’wana. Kambe riendzo ra mina i mhaka leyi lavaka wena.”

Muavanyisi a a rhandza ku tiva. U vutisile hi rito ra xinghananyana leswaku a ndzi lava yini. Ndzi engete ndzi vula leswaku ndzi ta vuya nakambe hi Ravumbirhi.

Lexi ndzi hlamariseke u sindzisile a ku: “Ndzi kombela u tshama hansi. Xana u lava yini?”

Ku landzele bulo leri tsakisaka, naswona u kombele ku rivaleriwa hikwalaho ka leswi a nga vangiki na xinghana eku sunguleni hikuva a khomekile hakunene.

Muavanyisi u vutisile endzhaku ka nkarhinyana a ku: “Xana wa swi tiva leswaku i yini lexi ndzi xi rhandzaka hi Timbhoni ta Yehovha? Ti ni misinya ya milawu leyi tiyeke leyi ti nga yi tluliki. Hitler u ringete hinkwaswo leswi a swi koteke, kambe Timbhoni a ti yanga enyimpini.”

Loko hi nghena ehofisini havumbirhi bya hina, vamatsalana va hi vonile. Kutani mulanguteri wa vamatsalana u huwelerile hi ku olova a ku, “Muungameri a nga yi amukeli mintlawa.”

Ndzi hlamule hi ku rhula ndzi ku, “Kambe u ta hi amukela hikuva hi Timbhoni ta Yehovha. A hi vanhu lava kombelaka, naswona riendzo ra hina a ri nge teki timinete leti tlulaka tinharhu.” Ndzi khongerile embilwini ya mina hi mbilu hinkwayo ndzi ku, “Oho Yehovha, ndzi kombela swilo leswi swi famba kahle!”

Matsalana u hlamule hi ndlela leyi hambaneke a ku, “Swi lulamile, ndzi ta ringeta.” U fambile. Endzhaku ka timinete timbirhi, leti vonakeke ti ri leti nga heriki eka mina, u vuyile a landzeriwa hi muungameri. U hi yise ehofisini ya yena, a ri karhi a nga vuli nchumu a hundza makamara man’wana mambirhi.

Loko hi sungula ku vulavula, u sungule ku va ni xinghana swinene. U yi tekile minkandziyiso yo hlawuleka ya timagazini ta Xalamuka! hi ku swi rhandza loko hi n’wi nyika. Hi nkhense Yehovha hikwalaho ka nkarhi lowu wo nyikela vumbhoni lebyinene malunghana ni xikongomelo xa ntirho wa hina.

Loko ndzi anakanya mintokoto yo tala leyi tsakisaka, ndzi sungule ku tlangela swinene leswi muapostola Petro a swi vuleke loko a ku: “Hakunene ndza swi xiya leswaku Xikwembu a xi hlawuli, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) Ku rhandza ka Xikwembu hi leswaku vanhu va mindhavuko hinkwayo, va tindzimi kumbe vanhu va swikhundla swo karhi va nyikiwa nkarhi wo tiva xikongomelo xa xona hi vanhu na hi misava.—Xi nyikeriwile.