Khathalela Van’wana—Hi Ku Nga Yi Hi Nghohe Loko U Chumayela
1 Muapostola Yohane u vone ntsumi exivonweni yi ri karhi yi haha empfhukeni, yi vula mahungu lamanene lama nga heriki eka vanhu va “matiko hinkwawo ni tinyimba hinkwato ni tindzimi hinkwato ni vanhu hinkwavo.” (Nhlav. 14:6) Xana wa xi landzela xikombiso xa ntsumi xa ku nga yi hi nghohe loko u ri eku chumayeleni? Handle ko swi xiya, hi nga ha va ni langutelo ra xihlawuhlawu. Langutelo ra hina hi vanhu lava hi hlanganaka na vona ri nga khumba ndlela leyi hi va chumayelaka mahungu lamanene ha yona. Hikwalaho, hi fanele hi kombisa nkhathalelo wa rirhandzu loko hi chumayela vanhu va swiyimo swo hambana-hambana.
2 Xiyisisa Nsimu Ya N’wina: Xana ku ni valuveri kumbe vahlapfa ensin’wini ya n’wina? Va nga ha honisiwa hi ku olova. Teka goza ro lava lomu va kumekaka kona, kutani u ringeta ku va tiva ku antswa. Hi swihi swilaveko swa vona, i yini leswi va karhataka, leswi va swi rhandzaka ni leswi va nga swi rhandziki, leswi va swi chavaka naswona hi yihi ndlela leyi va khomiwaka ha yona hi xihlawuhlawu? Endla matshalatshala yo pfumelelanisa xingheniso xa wena xa rungula ra Mfumo ni swilaveko swa vona. (1 Kor. 9:19-23) Ku fana na muapostola Pawulo, hi fanele hi titwa hi ri ni ndzhwalo wo chumayela mahungu lamanene eka un’wana ni un’wana ensin’wini ya hina, ku katsa ni lava humaka ematikweni mambe, lava ndhavuko wa vona wu nga faniki ni wa hina, lava vulavulaka ririmi rimbe kumbe lava fuweke ngopfu.—Rhom. 1:14, nhlamuselo ya le hansi ya NW.
3 Hambiswiritano, u nga n’wi chumayela njhani munhu la vulavulaka ririmi rimbe? Tirhisa xibukwana lexi nge Good News for People of All Nations. U nga ha tshama u ri ni swiphephana ni tibroxara ta tindzimi leti vulavuriwaka ngopfu ensin’wini ya n’wina. (Vona Vutirheli Bya Hina Bya Mfumo bya July 2003, tl. 4, tindz. 2-3.) Ku tlula kwalaho, vahuweleri van’wana va endle matshalatshala yo dyondza maxewetelo ni xingheniso xo olova hi tindzimi tin’wana. Hakanyingi vanhu va tsaka loko va twa munhu a ringeta ku vulavula na vona hi ririmi ra rikwavo, hambiloko a dlamba-dlamba, naswona leswi swi nga ha va endla va tsakela mahungu lamanene.
4 Tekelela Yehovha: Loko hi chumayela vanhu va mindhavuko yo hambana-hambana, hi va hi tekelela Yehovha, Xikwembu xa hina lexi nga yiki hi nghohe, “lexi rhandzaka leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.”—1 Tim. 2:3, 4.